ઇઝરાયેલ-લેબનોન પીસ ડીલ: વોશિંગ્ટનમાં થયા હસ્તાક્ષર, પણ નેતન્યાહુની શરતે ટેન્શન વધાર્યું

વોશિંગ્ટન: મિડલ ઈસ્ટ (Middle East) માં છેલ્લા ઘણા મહિનાઓથી ચાલી રહેલા ભયાનક તણાવ અને લોહિયાળ જંગ વચ્ચે આખા વિશ્વ માટે એક બહુ મોટા અને રાહતના સમાચાર સામે આવ્યા છે. ઇઝરાયેલ અને લેબનોનના હિઝબુલ્લાહ (Hezbollah) લડવૈયાઓ વચ્ચે ચાલી રહેલા ભીષણ યુદ્ધનો અંત લાવવા માટે એક ઐતિહાસિક પગલું ભરવામાં આવ્યું છે. ઇઝરાયેલ અને લેબનોને સત્તાવાર રીતે શાંતિ સમજૂતીની રૂપરેખા (Peace Deal Framework) પર હસ્તાક્ષર કરી દીધા છે.

અમેરિકાની રાજધાની વોશિંગ્ટનમાં (Washington) થયેલી આ સમજૂતીને આ ક્ષેત્રમાં શાંતિ સ્થાપવા માટે એક મોટો ટર્નિંગ પોઇન્ટ (Turning Point) ગણવામાં આવી રહ્યો છે.

ત્રિપક્ષીય દસ્તાવેજ પર હસ્તાક્ષર અને વૈશ્વિક પ્રતિક્રિયા

અમેરિકાની હાજરીમાં યોજાયેલા આ કાર્યક્રમમાં અમેરિકામાં લેબેનોનના રાજદૂત નાડા હમાદેહ મોવાદ અને ઇઝરાયલના રાજદૂત યેચિયલ લાઇટર દ્વારા આ ત્રિપક્ષીય દસ્તાવેજ પર સહીઓ કરવામાં આવી હતી. આ પ્રસંગે અમેરિકન વિદેશ મંત્રી માર્કો રુબિયોએ જણાવ્યું હતું કે, "આજે અમે એક એવા પ્રવાસની શરૂઆત કરી છે જે બેશક ઘણો મુશ્કેલ હશે, પરંતુ આ પ્રવાસ અત્યંત મહત્વપૂર્ણ અને અનિવાર્ય છે." બીજી તરફ, ઇઝરાયલી રાજદૂત લાઇટરે ખૂબ જ મજબૂતાઈથી વાટાઘાટો કરવા બદલ લેબેનોની રાજદૂત હમાદેહની પ્રશંસા કરી હતી. લેબેનોનના રાજદૂતે જણાવ્યું કે આ કરાર લેબેનોનની સાર્વભૌમત્વની પુનઃસ્થાપના અને લોકોની સુરક્ષા માટે પ્રથમ કદમ છે.

હિઝબુલ્લાહના નિઃશસ્ત્રીકરણ સુધી ઇઝરાયલી સેના લેબેનોનમાં રહેશે: નેતન્યાહૂ

વોશિંગ્ટનમાં શાંતિ કરારની જાહેરાત થયાના ગણતરીના સમયમાં જ ઇઝરાયલના વડાપ્રધાન બેન્જામિન નેતન્યાહૂએ એક મોટું અને કડક નિવેદન આપ્યું છે. નેતન્યાહૂએ સ્પષ્ટ ચેતવણી આપતા જણાવ્યું છે કે, જ્યાં સુધી આતંકવાદી સંગઠન હિઝબુલ્લાહનું સંપૂર્ણપણે નિઃશસ્ત્રીકરણ (નિરસ્ત્રીકરણ) નહીં થાય, ત્યાં સુધી ઇઝરાયલી સેના દક્ષિણ લેબેનોનમાં પોતાની હાજરી જાળવી રાખશે.

જોકે, નેતન્યાહૂએ એમ પણ ઉમેર્યું હતું કે ઇઝરાયલની સેના લેબેનોનની સત્તાવાર આર્મીને બે પ્રાયોગિક વિસ્તારો (એક્સપેરિમેન્ટલ ઝોન) માં નિયંત્રણ લેવાની મંજૂરી આપશે. જેમાં એક વિસ્તાર લેબેનોનની લિતાની નદીની દક્ષિણમાં અને બીજો તેની ઉત્તરમાં આવેલો છે. અધિકારીઓએ હજુ સુધી આ ફ્રેમવર્ક ડીલની સંપૂર્ણ શરતો જાહેર કરી નથી, અને તે અગાઉના 16 એપ્રિલના યુદ્ધવિરામ કરારથી કેવી રીતે અલગ છે તેની વિગતો આવવાની બાકી છે.