રશિયાના ન્યુક્લિયર ડિફેન્સ ફોર્સના વડાનું વિસ્ફોટમાં મોત

રશિયાના પરમાણુ પ્રોગ્રામના વડા ઇગોર કિરિલોવનું મોસ્કોમાં વિસ્ફોટમાં મોત થયું છે. તેઓ રાષ્ટ્રપતિ પુતિનની ખૂબ નજીક માનવામાં આવતા હતા. આ બ્લાસ્ટ રાષ્ટ્રપતિ ભવનથી માત્ર સાત કિલોમીટર દૂર થયો હતો. યુક્રેનની સુરક્ષા સેવાએ દાવો કર્યો છે કે તેઓએ આ ઘટનાને અંજામ આપ્યો છે.

રિપોર્ટ અનુસાર, ઇગોર કિરિલોવ તેના એપાર્ટમેન્ટમાંથી બહાર આવી રહ્યા હતા ત્યારે નજીકમાં પાર્ક કરેલા સ્કૂટરમાં વિસ્ફોટ થયો હતો. આ ઘટનામાં ઇગોર કિરિલોવની સાથે તેના સહાયકનું પણ મોત થયું હતું.

આ વર્ષે ઓક્ટોબરમાં બ્રિટને ઇગોર પર પ્રતિબંધ મૂક્યો હતો અને તેના પર યુક્રેનમાં રાસાયણિક હથિયારોના ઉપયોગ પર નજર રાખવાનો આરોપ લગાવ્યો હતો.

સોશિયલ મીડિયા પર વાયરલ થયેલા આ ઘટનાના વીડિયોમાં જોઈ શકાય છે કે ઈમારત કાટમાળમાં છે અને કાટમાળની વચ્ચે બે લોહીથી લથપથ મૃતદેહ પડેલા છે. પોલીસે ઘટના સ્થળને કોર્ડન કરી લીધું છે.

કહેવામાં આવી રહ્યું છે કે વિસ્ફોટ એટલો જોરદાર હતો કે બિલ્ડિંગને સંપૂર્ણ નુકસાન થયું છે. કિરિલોવના મૃત્યુ બાદ રશિયન સંસદના ડેપ્યુટી સ્પીકરે કહ્યું છે કે આ ઘટનાને ખૂબ જ સાવચેતીપૂર્વક આયોજન સાથે અંજામ આપવામાં આવ્યો હતો. પરંતુ તેની હત્યાનો બદલો લેવામાં આવશે.

ઈગોરને એપ્રિલ 2017માં ન્યુક્લિયર ફોર્સના ચીફ બનાવવામાં આવ્યા હતા. આ પહેલા તેઓ દેશના રેડિયેશન, કેમિકલ અને જૈવિક હથિયાર વિભાગના વડા પણ રહી ચૂક્યા છે.