અમેરિકન નેતાના ભારતીયો અંગે વિવાદિત નિવેદનથી હોબાળો, ફ્લોરિડા સિટી કાઉન્સિલે લીધા આકરા પગલાં

અમેરિકામાં ફ્લોરિડા સિટી કાઉન્સિલના નેતા ચૅન્ડલર લેંગવિને ભારતીયો સામે સોશિયલ મીડિયા પર અત્યંત વાંધાજનક ટિપ્પણીઓ કરતા મોટો વિવાદ સર્જાયો છે. તેણે ભારતીયોના સામૂહિક દેશનિકાલની હાકલ કરી હતી અને આરોપ લગાવ્યો હતો કે ભારતીયો અમેરિકનોનું આર્થિક શોષણ કરવા માટે અહીં છે. વિવાદિત નિવેદનો બાદ ફ્લોરિડા સિટી કાઉન્સિલે તાત્કાલિક પગલાં લીધા છે અને આ નેતાની સત્તાઓ છીનવી લીધી છે. કાઉન્સિલે તેમની ટિપ્પણીઓની નિંદા કરતો ઠરાવ પણ પસાર કર્યો છે.

ચૅન્ડલર લેંગવિનના વિવાદાસ્પદ આરોપો

ચૅન્ડલર લેંગવિને સોશિયલ મીડિયા પોસ્ટમાં ભારતીયો પર ગંભીર આરોપો લગાવ્યા હતા. તેમણે કહ્યું હતું કે, 'અમેરિકામાં કોઈને ભારતીયોની પરવા નથી અને તેઓ ફક્ત આર્થિક શોષણ માટે અહીં છે. ભારતીયો અહીં અમેરિકનોના ખિસ્સા ખાલી કરવા માટે છે અને તેઓ અમેરિકન સંસ્કૃતિમાં એકીકૃત થઈ શકતા નથી.'

બીજી ઓક્ટોબરના રોજ પોતાના જન્મદિવસના દિવસે ચૅન્ડલર લેંગવિને અમેરિકાના પ્રમુખ ડોનાલ્ડ ટ્રમ્પને સંબોધીને તમામ ભારતીયોના વિઝા રદ કરવા અને તેમને તાત્કાલિક દેશનિકાલ કરવાની માંગ કરી હતી. સોશિયલ મીડિયા પર લખ્યું હતું કે, 'આજે મારો જન્મદિવસ છે અને હું ઈચ્છું છું કે ટ્રમ્પ બધા ભારતીય વિઝા રદ કરે અને તેમને તાત્કાલિક દેશનિકાલ કરે. અમેરિકા અમેરિકાના લોકો માટે છે.'

કાર્યવાહી અને પ્રતિબંધ

ચૅન્ડલર લેંગવિનની વાંધાજનક ટિપ્પણીઓના પગલે ફ્લોરિડા સિટી કાઉન્સિલે તેમની સામે આકરા પગલાં લીધા છે. તેને હવે કોઈપણ એજન્ડા નક્કી કરતા પહેલા સંમતિ લેવી પડશે. તેને સત્તાવાર નિવેદનો આપવાથી પ્રતિબંધિત કરવામાં આવ્યા છે. આ ઉપરાંત વિવિધ સમિતિઓમાંથી દૂર કરવામાં આવ્યા છે.

સમગ્ર અમેરિકામાં નિંદા અને રાજીનામાની માંગ

આ નિવેદનો3 પછી સમગ્ર અમેરિકામાં ભારતીય-અમેરિકન જૂથોએ ચૅન્ડલર લેંગવિનની સખત નિંદા કરી છે. ભારતીય સમુદાયે આ નિવેદનોને વંશીય ગણાવી તેમના રાજીનામાની માંગ કરી છે. આ વિવાદે અમેરિકામાં વંશીય અને ઈમિગ્રેશનના મુદ્દાઓ પર ચાલી રહેલી ચર્ચાને વધુ તીવ્ર બનાવી દીધી છે. જો કે, ભારે ટીકા થયા બાદ લેંગવિને પાછળથી સ્પષ્ટતા કરી હતી કે તેમના નિવેદનો ફક્ત કામચલાઉ વિઝા ધારકો પર નિર્દેશિત હતી, ન કે ભારતીય-અમેરિકન સમુદાય પર. પરંતુ તેમના આ સ્પષ્ટીકરણને પણ ભારતીય સમુદાય દ્વારા નકારી કાઢવામાં આવ્યું છે.