મ્યાનમારના કેકે પાર્કમાં 494  બિલ્ડિંગો તોડી પડાઈ, 952 શંકાસ્પદોને ચીન ડિપોર્ટ કરાયા

ચીન, મ્યાનમાર અને થાઈલેન્ડની એજન્સીઓએ સાયબર ફ્રોડને લઈને સંયુક્ત કાર્યવાહી કરી છે. મ્યાનમારના મ્યાવાદી વિસ્તારમાં જુગાર અને ઓનલાઈ છેતરપિંડી સામે કરવામાં આવેલી કાર્યવાહીમાં મ્યાનમારના કેકે પાર્કમાં 494 બિલ્ડિંગને તોડી પાડવામાં આવી છે. આ સાથે યાતાઈ ન્યૂ સિટીમાં ઓનલાઈન ફ્રોડ ફેલાવતા વિસ્તારને સંપૂર્ણરીતે સાફ કરી દેવામાં આવ્યો છે. 

ઓનલાઈન ફ્રોડના સૌથી મોટા અડ્ડા પર કાર્યવાહી

મ્યાનમારના આ વિસ્તારની તુલના ભારતના ઝારખંડમાં સ્થિત સાયબર ઠગની જગ્યા 'જામતાડા' સાથે કરી શકાય છે. ભારતમાં છેલ્લા કેટલાક સમયથી જામતાડા ડિઝિટલ ફ્રોડનો અડ્ડો હતો. જોકે, પોલીસે શખ્ત કાર્યવાહી કરતાં હાલ પરિસ્થિત બરાબર થવા લાગી છે.

ઓપરેશનમાં ઝડપાયેલા ચીનના નાગરિકોને ડિપોર્ટ કરાયા

ચીનના જાહેર સુરક્ષા મંત્રાલયના મ્યાનમારમાં ક્રિમિનલ ઇન્વેસ્ટિગેશન બ્યુરોના WeChat એકાઉન્ટ પર ગત ગુરુવારે આપવામાં આવેલી માહિતી મુજબ, આ ઓપરેશન દરમિયાન 952 ચીની શંકાસ્પદ નાગરિકો ઝડપાયા હતા, તેમને ચીનમાં પરત મોકલવામાં આવ્યા હતા. 

ચીન, મ્યાનમાર અને થાઈલેન્ડ મળીને ઓનલાઈન ફ્રોડ સામે એક્શન

તમને જણાવી દઈએ કે, આ ઓપરેશનને અંજામ આપવા માટે ચીને પબ્લિક સિક્યોરિટી વિભાગના ટાસ્ક ફોર્મને ત્યાં મોકલ્યો હતો. ટાસ્ક ફોર્સે મ્યાનમાર અને થાઇલેન્ડના કાયદા અમલીકરણ અધિકારીઓ સાથે મળીને મ્યાવાદીમાં કામગીરી હાથ ધરી હતી. ત્રણેય દેશોએ જુગાર અને છેતરપિંડી પ્રવૃત્તિઓ પર દરોડા અને કડક કાર્યવાહીનું સંકલન કર્યું હતું.

આ મામલે ચીનનું કહેવું છે કે, અહીંયા જુગારનો અડ્ડો હતો. ટેલિકોમ છેતરપિંડી વિસ્તારમાં આરોપી દ્વારા ઘણા સમયથી ચીની નાગરિકોને ઓનલાઈન છેતરપિંડીનો શિકાર બનાવતા હતા, જેનાથી ગંભીર નુકસાન થઈ રહ્યું હતું. 

સંયુક્ત કાર્યવાહી કરીને જુગાર અને છેતરપિંડીના અડ્ડાઓ તોડી પડાયા

આ વર્ષની શરૂઆતમાં ચીન, મ્યાનમાર અને થાઈલેન્ડ દ્વારા ટેલિકોમ અને ઓનલાઈન છેતરપિંડીના ડામવા માટે મંત્રી સ્તરે સમન્વય સ્થાપિત કર્યો હતો. આ હેઠળ ઘણી વખતે સંયુક્ત કાર્યવાહી કરવામાં આવી હતી. ચીનના સરકારી અખબાર ગ્લોબલ ટાઈમ્સ અનુસાર, મ્યાનમારના અધિકારીઓએ ઓક્ટોબરમાં ચીન અને થાઈલેન્ડ સાથેના અગાઉના કરારો અનુસાર મ્યાનમારના માયાવાદી અને અન્ય વિસ્તારોમાં કાર્યવાહી શરૂ કરીને શંકાસ્પદોની ધરપકડ કરી હતી. આ સાથે જુગાર અને છેતરપિંડીના અડ્ડાઓ તોડી પાડવામાં આવ્યા હતા.

15 ડિસેમ્બરના રોજ ત્રણેય દેશોના પોલીસદળોએ પહેલાવાર મ્યાવાદીના કેકે પાર્ક, યાતાઈ ન્યૂ સિટી અને અન્ય મોટાપાયે ચાલતા જુગાર-છેતરપિંડી પાર્કોમાં સંયુક્ત રીતે નિરીક્ષણ કરવામાં આવ્યું હતું. આ પછી 16 થી 19 ડિસેમ્બર દરમિયાન ત્રણેય એજન્સીઓએ અહીં એક કાર્યવાહી શરૂ કરી હતી. ઓનલાઈન છેતરપિંડી અને જુગારના આ અડ્ડાને તોડી પાડવામાં આવ્યા હતા. 

આ કાર્યવાહી બાદ, ચીનના જિલિન અને હેનાન પ્રાંતના પોલીસ એકમોને ધરપકડ કરાયેલા શંકાસ્પદોને ચીન પાછા લાવવાનો નિર્દેશ આપવામાં આવ્યો હતો. ત્રણેય દેશોના સંયુક્ત પ્રયાસો દ્વારા, આ વર્ષે માયાવાદીમાં ઓનલાઈન જુગાર અને ટેલિકોમ છેતરપિંડીમાં સંડોવાયેલા 7600થી વધુ ચીની નાગરિકોને સ્વદેશ પરત મોકલવામાં આવ્યા છે.

આ કામગીરીમાં કેકે પાર્કમાં 494 ઈમારતોને તોડી પાડવાનો અને યાતાઈ ન્યૂ સિટીમાં છેતરપિંડી ઝોનની સંપૂર્ણ સફાઈનો સમાવેશ થાય છે. એક વરિષ્ઠ ચીની અધિકારીએ જણાવ્યું હતું કે, ટેલિકોમ અને ઓનલાઈન છેતરપિંડી આંતરરાષ્ટ્રીય સમુદાય માટે એક સામાન્ય પડકાર છે.