કોણ છે 15 વર્ષની ઉમા કાશ્વી? WPL ઓક્શનમાં વેચાયેલી સૌથી નાની ઉંમરની ખેલાડી બની
માત્ર 15 વર્ષની ઉંમરે વિશ્વની સૌથી મોટી વિમેન્સ T20 લીગમાં સ્થાન મેળવવું એ એક મોટી સિદ્ધિ છે. કર્ણાટકની યુવા ઓલરાઉન્ડર ઉમા કાશ્વીએ 28 ઓક્ટોબરે વિમેન્સ પ્રીમિયર લીગ (WPL) 2027ના ઓક્શનમાં ઈતિહાસ રચ્યો. તેને 10 લાખ રૂપિયાની બેઝ પ્રાઈઝ પર દિલ્હી કેપિટલ્સની ટીમમાં સામેલ કરવામાં આવી. આ સાથે ઉમા WPL ઈતિહાસમાં ઓક્શનમાં વેચાયેલી સૌથી નાની ઉંમરની ખેલાડી બની.
ઉમાએ ગયા વર્ષના રેકોર્ડને તોડી નાખ્યો. અગાઉ, આ સિદ્ધિ દિયા યાદવના નામે હતી, જેને દિલ્હી કેપિટલ્સે 10 લાખ રૂપિયામાં 16 વર્ષની ઉંમરે ખરીદી હતી. રસપ્રદ વાત એ છે કે, દિયા પણ આ જ કિંમતે દિલ્હી કેપિટલ્સની ટીમમાં જોડાઈ હતી. ગઈ સિઝનમાં જેમિમા રોડ્રિગ્સની આગેવાની હેઠળની ટીમ માટે રમીને તે લીગમાં ડેબ્યુ કરનારી સૌથી નાની ઉંમરની ખેલાડીઓમાંની એક બની હતી. અગાઉ, મુંબઈ ઈન્ડિયન્સે 2025ના મિનીઓક્શનમાં 16 વર્ષની વિકેટકીપર-બેટ્સમેન જી. કમાલિનીને ખરીદી હતી. હવે ઉમાએ આ ખેલાડીઓને પાછળ છોડી દીધી છે અને એક નવો રેકોર્ડ બનાવ્યો છે.
ઉમા કાશ્વી કોણ છે?
કર્ણાટકની વતની ઉમા કાશ્વી એક ઓલરાઉન્ડર છે. માત્ર 15 વર્ષની ઉંમરે તે ભારતીય અંડર-19 મહિલા ટીમનો ભાગ હતી. તે જમણા હાથે બેટિંગ કરે છે અને ઓફ-સ્પિન બોલિંગમાં પણ નિષ્ણાત છે. તેની પ્રતિભાને જોતા તેને 2027માં બાંગ્લાદેશ અને નેપાળમાં યોજાનાર ICC અંડર-19 મહિલા T20 વર્લ્ડ કપ માટે ભારતીય ટીમમાં પસંદગી માટે દાવેદાર માનવામાં આવે છે. ઉમાએ શ્રીલંકા સામે ભારતીય અંડર-19 ટીમ માટે ડેબ્યુ કર્યું હતું. આજ સુધી તેણે ભારત માટે બે યુથ વિમેન્સ ODI અને ત્રણ યુથ વિમેન્સ T20I રમી છે. આ મેચોમાં તેની બોલિંગ ખાસ રહી છે. તેણે ત્રણ T20 મેચમાં ચાર વિકેટ અને બે ODIમાં બે વિકેટ લીધી છે.
ઘરેલુ ક્રિકેટમાં પણ પોતાની તાકાત બતાવી છે
ઉમાએ ઘરેલુ ક્રિકેટમાં પણ તેના પ્રદર્શનથી પ્રભાવિત કર્યા છે. તાજેતરમાં, વિદર્ભ સામે મહિલા અંડર-19 ટી20 ટ્રોફી મેચ દરમિયાન તેનો એક વીડિયો સોશિયલ મીડિયા પર વાયરલ થયો હતો. નાગપુરના સિવિલ લાઈન્સ સ્ટેડિયમમાં રમાયેલી આ મેચ દરમિયાન તેનો સામનો અચાનક એક વાંદરો સાથે થયો, જે ચર્ચાનો વિષય બન્યો. જોકે, મેદાન પર ઉમાનું પ્રદર્શન પણ એટલું જ પ્રભાવશાળી હતું. કર્ણાટક અંડર-19 ટીમે મેચ 6 રનથી જીતી લીધી અને ઉમાને પ્લેયર ઓફ ધ મેચ જાહેર કરવામાં આવી. તેણે ચાર ઓવરમાં માત્ર 18 રન આપીને ત્રણ વિકેટ લીધી. તેના પ્રદર્શને ફરી એકવાર સાબિત કર્યું કે તે આટલી નાની ઉંમરે બોલથી મેચનો માર્ગ બદલી શકે છે.
ઉમા વૈભવ કરતાં માત્ર 12 દિવસ નાની છે
ઉમા કાશ્વીનો જન્મ 9 એપ્રિલ, 2011ના રોજ થયો હતો. તે IPL ઓક્શનમાં વેચાનારા સૌથી નાના ખેલાડી વૈભવ સૂર્યવંશી કરતા માત્ર 12 દિવસ નાની છે. 27 માર્ચ, 2011ના રોજ જન્મેલો વૈભવ ઈન્ડિયન પ્રીમિયર લીગની ઓક્શનમાં વેચાનારા સૌથી નાનો ખેલાડી છે. હવે ઉમાએ WPLમાં વેચાનારા સૌથી નાના ખેલાડી બનીને મહિલા ક્રિકેટમાં પોતાનું નામ બનાવ્યું છે.
