IND vs NZ / ODI સિરીઝ પહેલા ટીમ ઈન્ડિયાને લાગ્યો ઝટકો, પ્રસિદ્ધ કૃષ્ણા બહાર થયો; કોણ લેશે તેનું સ્થાન?

ન્યુઝીલેન્ડ પ્રવાસ દરમિયાન ટીમ ઈન્ડિયાને મોટો ઝટકો લાગ્યો છે. સ્ટાર ફાસ્ટ બોલર પ્રસિદ્ધ કૃષ્ણા ન્યુઝીલેન્ડ સામેની આગામી પાંચ મેચની ODI સિરીઝમાંથી બહાર થઈ ગયો છે. પ્રસિદ્ધ હજુ સુધી તેની હેમસ્ટ્રિંગ ઈજામાંથી સંપૂર્ણપણે સ્વસ્થ નથી થયો, જેના કારણે તે ODI સિરીઝમાં ભાગ નહીં લઈ શકે. તેના સ્થાને આકિબ નબીને ODI ટીમમાં સામેલ કરવામાં આવી શકે છે. ભારતીય ક્રિકેટ બોર્ડ (BCCI) ના એક સૂત્રએ આ માહિતી જાહેર કરી છે. નહીંને વેસ્ટ ઈન્ડિઝ સામેની બીજી ODI દરમિયાન ડાબા પગમાં હેમસ્ટ્રિંગ ઈજા થઈ હતી. ત્યારથી, તે બેંગલુરુમાં BCCIના સેન્ટર ઓફ એક્સેલન્સ (CoE) ખાતે તેની ફિટનેસ પર કામ કરી રહ્યો છે, પરંતુ હજુ સુધી તે સંપૂર્ણપણે સ્વસ્થ નથી થયો.

પ્રસિદ્ધ કૃષ્ણા ODI સિરીઝમાંથી બહાર

સમાચાર એજન્સી PTIના અહેવાલ મુજબ, ભારતીય ફાસ્ટ બોલર પ્રસિદ્ધ કૃષ્ણા 4 નવેમ્બરથી શરૂ થનારી ન્યુઝીલેન્ડ સામેની પાંચ મેચની ODI સિરીઝમાંથી બહાર થઈ ગયો છે. BCCIના એક સૂત્રએ બુધવારે PTIને જણાવ્યું હતું કે પ્રસિદ્ધ કૃષ્ણા ન્યૂઝીલેન્ડ સામેની ODI સિરીઝનો ભાગ નહીં બને કારણ કે તે હજુ સુધી તેની હેમસ્ટ્રિંગ ઈજામાંથી સંપૂર્ણપણે સ્વસ્થ નથી થયો. જમ્મુ અને કાશ્મીરના ફાસ્ટ બોલર આકિબ નબીએ લિંકનમાં ઈન્ડિયા A અને ન્યુઝીલેન્ડ A વચ્ચેની પ્રથમ બિનસત્તાવાર રેડ-બોલ મેચમાં પ્રભાવ પાડ્યો હતો. તેથી, પ્રસિદ્ધ કૃષ્ણાની જગ્યાએ નબીને ટીમમાં સામેલ કરી શકાય છે.

BCCIના સૂત્રએ જણાવ્યું હતું કે, "પ્રસિદ્ધની રિકવરી સારી રીતે પ્રગતિ કરી રહી છે. તે 1 અને 2 નવેમ્બરના રોજ બેંગલુરુમાં સેન્ટર ઓફ એક્સેલન્સ ખાતે મેચ સિમ્યુલેશન અને ફિટનેસ ટેસ્ટમાંથી પસાર થવાનો છે. જોકે, ટીમ મેનેજમેન્ટ અને સિલેક્શન કમિટી માને છે કે પ્રસિદ્ધ કૃષ્ણાએ ટેસ્ટ મેચો માટે સંપૂર્ણપણે તૈયાર રહેવું જોઈએ, કારણ કે તેની ODI કરતાં ટેસ્ટમાં વધુ જરૂર છે." જોકે, BCCIએ હજુ સુધી પ્રસિદ્ધ કૃષ્ણાના બહાર થવા પર સત્તાવાર પુષ્ટિ નથી કરી.