IND vs NZ / બીજી ટેસ્ટમાં વિરાટ કોહલીના નિશાના પર હશે ડોન બ્રેડમેન સહિતના દિગ્ગજ ખેલાડીઓના રેકોર્ડ્સ

ભારતીય ટીમનો સ્ટાર બેટ્સમેન વિરાટ કોહલી આ દિવસોમાં ન્યુઝીલેન્ડ સામે ત્રણ મેચની ટેસ્ટ સીરીઝ રમી રહ્યો છે. ન્યુઝીલેન્ડ સામેની પ્રથમ ટેસ્ટમાં વિરાટ કોહલીનું બેટ ગર્જ્યું હતું. તે પ્રથમ ઈનિંગમાં ખાતું પણ ખોલાવી શક્યો ન હતો, પરંતુ બીજી ઈનિંગમાં તેણે 70 રન બનાવ્યા હતા. જોકે, ટીમ ઈન્ડિયાને પ્રથમ ટેસ્ટમાં હારનો સામનો કરવો પડ્યો હતો.

હવે ફેન્સને બીજી ટેસ્ટમાં કિંગ કોહલી પાસેથી મોટી ઈનિંગ્સની અપેક્ષા છે. બીજી ટેસ્ટ 24 ઓક્ટોબરથી પુણેના મહારાષ્ટ્ર ક્રિકેટ એસોસિએશન સ્ટેડિયમમાં રમાશે. આ મેચમાં વિરાટ કોહલીની નજર ઘણા રેકોર્ડ્સ પર હશે.

પુણેમાં વિરાટ કોહલીના નિશાના પર ઘણા રેકોર્ડ હશે

ડેવિડ વોર્નરને પાછળ છોડવાની તક

વિરાટ કોહલી વર્લ્ડ ટેસ્ટ ચેમ્પિયનશિપ (WTC) માં સતત સારું પ્રદર્શન કરી રહ્યો છે. તેણે 38.77ની એવરેજથી 2,404 રન બનાવ્યા છે, જેમાં 4 સદી અને 11 અડધી સદી સામેલ છે. હવે તેની પાસે ન્યુઝીલેન્ડ સામેની બીજી ટેસ્ટમાં માત્ર 20 રન બનાવીને WTCમાં ભૂતપૂર્વ ઓસ્ટ્રેલિયન ઓપનર ડેવિડ વોર્નરના 2,423 રનને પાર કરવાની તક છે.

ડોન બ્રેડમેનથી આગળ નીકળી જશે

વિરાટ કોહલીએ અત્યાર સુધી કુલ 29 ટેસ્ટ સદી ફટકારી છે. આ બાબતમાં તે ઓસ્ટ્રેલિયાના દિગ્ગજ ડોન બ્રેડમેનની બરાબરી પર છે, જેણે ટેસ્ટમાં પણ 29 સદી ફટકારી હતી. હવે પુણેમાં કોહલી પાસે ખાસ તક છે. જો કોહલી ન્યુઝીલેન્ડ સામેની બીજી ટેસ્ટમાં સદી ફટકારે છે તો તે તેની ટેસ્ટ કારકિર્દીની 30મી સદી ફટકારી દેશે અને ડોન બ્રેડમેનથી આગળ નીકળી જશે.

સનથ જયસૂર્યાની આગળ નીકળવાની તક

હાલમાં, વિરાટ કોહલી ગ્રેગ ચેમ્પલ, સનથ જયસૂર્યા, બ્રેન્ડન મેક્કુલમ, તમીમ ઇકબાલની બરાબરી ટેસ્ટમાં 31 અડધી સદી ફટકારવાના રેકોર્ડમાં સામેલ છે. હવે પુણે ટેસ્ટમાં અડધી સદી ફટકાર્યા બાદ કોહલી આ બધાથી આગળ નીકળી જશે.

ગ્રેહામ ડોલિંગને પાછળ છોડી દેશે

જો કોહલી ન્યુઝીલેન્ડ સામેની બીજી ટેસ્ટ મેચમાં 29 રન બનાવશે તો તે ન્યુઝીલેન્ડના ગ્રેહામ ડોલિંગને પાછળ છોડી દેશે. આમ કરવાથી કોહલી ભારત-ન્યુઝીલેન્ડ ટેસ્ટમાં ચોથો સૌથી વધુ રન બનાવનાર બેટ્સમેન બની જશે. ન્યુઝીલેન્ડના ગ્રેહામે ભારત અને ન્યુઝીલેન્ડ વચ્ચેની ટેસ્ટમાં કુલ 964 રન બનાવ્યા છે અને વિરાટ કોહલીએ 936 રન બનાવ્યા છે.