ભારતીય ક્રિકેટ માટે 'ડાર્ક ડે' સાબિત થયો 8 ડિસેમ્બર, એક જ દિવસમાં હાર્યા ત્રણ મેચ

08 ડિસેમ્બર 2024નો દિવસ ભારતીય ક્રિકેટ માટે "ડાર્ક ડે" થી ઓછો નહોતો. આ દિવસે ભારતીય ક્રિકેટ ટીમ ત્રણ અલગ-અલગ જગ્યાએ મેચ રમી રહી હતી. જેમાંથી ભારત એકપણ મેચ જીતી શક્યું નથી. આ દિવસે, ભારતીય મહિલા ટીમ ઓસ્ટ્રેલિયાની મહિલા ટીમ સામે બીજી ODI મેચ રમી રહી હતી, બીજી તરફ, બોર્ડર-ગાવસ્કર ટ્રોફી 2024-25ની બીજી ટેસ્ટ મેચ ભારતીય પુરૂષ ટીમ અને ઓસ્ટ્રેલિયાની પુરૂષ ટીમ વચ્ચે રમાઈ રહી હતી. અને એક તરફ ભારત અને બાંગ્લાદેશ વચ્ચે અંડર-19 એશિયા કપ 2024ની ફાઈનલ મેચ રમાઈ રહી હતી.

આ પણ વાંચો: એડિલેડ ટેસ્ટ હાર્યા બાદ ટીમમાં સામેલ થશે મોહમ્મદ શમી? રોહિત શર્માએ કહ્યું- 'અમે તેના પર કોઈ દબાણ...'

ટીમ ઈન્ડિયા એક જ દિવસમાં ત્રણ મેચ હારી છે

ભારતની મહિલા ટીમ vs ઓસ્ટ્રેલિયાની મહિલા ટીમ

ભારતની મહિલા ટીમ અને ઓસ્ટ્રેલિયાની મહિલા ટીમ વચ્ચે બીજી ODI મેચ 08 ડિસેમ્બર 2024ના રોજ રમાઈ હતી. આ મેચ બ્રિસ્બેનના એલન બોર્ડર ફિલ્ડમાં રમાઈ હતી. જેમાં ઓસ્ટ્રેલિયાએ 50 ઓવરમાં 8 વિકેટ ગુમાવીને 371 રન બનાવ્યા હતા. આ પછી ભારતીય મહિલા ટીમ પૂરી 50 ઓવર પણ ન રમી શકી અને 44.5 ઓવરમાં 249 રન બનાવીને ઓલઆઉટ થઈ ગઈ હતી. જેના કારણે ઓસ્ટ્રેલિયાની મહિલા ટીમ આ મેચ 122 રને જીતવામાં સફળ રહી હતી.

બોર્ડર-ગાવસ્કર ટ્રોફી 2024-25ની બીજી ટેસ્ટ મેચ

બોર્ડર-ગાવસ્કર ટ્રોફી 2024-25ની બીજી ટેસ્ટ મેચ ભારત અને ઓસ્ટ્રેલિયા વચ્ચે 6થી 8 ડિસેમ્બર દરમિયાન એડિલેડમાં રમાઈ હતી. જે ડે-નાઈટ પિંક બોલ ટેસ્ટ મેચ હતી. આ ટેસ્ટ મેચની પ્રથમ ઈનિંગમાં ટીમ ઈન્ડિયા 180 રનમાં ઓલઆઉટ થઈ ગઈ હતી. ઓસ્ટ્રેલિયા પ્રથમ ઈનિંગમાં 157 રનની લીડ લઈને ઓલઆઉટ થઈ ગયું હતું. બીજી ઈનિંગમાં ભારતીય ટીમ 175 રનમાં ઓલઆઉટ થઈ ગઈ હતી અને માત્ર 18 રનની લીડ લઈ શકી હતી. જવાબમાં ઓસ્ટ્રેલિયાએ બીજી ઈનિંગમાં 19 રનનો ટાર્ગેટ માત્ર 3.2 ઓવરમાં પૂરો કર્યો અને એડિલેડ ટેસ્ટ 10 વિકેટે જીતી લીધી.

અંડર-19 એશિયા કપ 2024 ફાઈનલ

અંડર-19 એશિયા કપ 2024ની ફાઈનલ મેચ 08 ડિસેમ્બર 2024ના રોજ દુબઈ ઈન્ટરનેશનલ ક્રિકેટ સ્ટેડિયમ ખાતે ભારત અંડર-19 અને બાંગ્લાદેશ અંડર-19 વચ્ચે રમાઈ હતી. ભારતે ટોસ જીતીને બોલિંગ કરવાનો નિર્ણય લીધો હતો. બાંગ્લાદેશની ટીમ 49.1 ઓવરમાં 198 રન બનાવીને ઓલઆઉટ થઈ ગઈ હતી. જવાબમાં ભારતીય ટીમ 35.2 ઓવરમાં 139 રન બનાવીને ઓલઆઉટ થઈ ગઈ હતી. જેના કારણે બાંગ્લાદેશ ફાઈનલ મેચ 59 રનથી જીતવામાં સફળ રહ્યું અને અંડર-19 એશિયા કપ 2024ની ટ્રોફી જીતી લીધી.