અફઘાનિસ્તાનની જીતથી બદલાઈ ગયું ભારતના ગ્રુપનું સમીકરણ, હજુ પણ સેમીફાઈનલની રેસમાં છે ચારેય ટીમો

અફઘાનિસ્તાને ICC મેન્સ T20 વર્લ્ડ કપ 2024માં ઓસ્ટ્રેલિયાને 21 રને હરાવીને ઐતિહાસિક પ્રદર્શન કર્યું હતું. 23 જૂન (રવિવાર) ના રોજ કિંગ્સટાઉનના આર્નોસ વેલ ગ્રાઉન્ડમાં રમાયેલી મેચમાં ઓસ્ટ્રેલિયાને જીતવા માટે 149 રન બનાવવાના હતા, પરંતુ ટીમ 19.5 ઓવરમાં 127 રન સુધી જ સિમિત રહી હતી. આ સાથે ગ્રુપ-1નું સમીકરણ બદલાઈ ગયું છે.

ગ્રુપ-1નું સમીકરણ રસપ્રદ બન્યું

ઓસ્ટ્રેલિયા સામે અફઘાનિસ્તાનની જીતને કારણે સુપર 8માં ગ્રુપ-1નું સમીકરણ સંપૂર્ણપણે બદલાઈ ગયું છે. આ ગ્રુપની ચારેય ટીમો હજુ પણ સેમીફાઈનલની રેસમાં છે. જો કે આ ગ્રુપમાંથી માત્ર બે ટીમોને જ સેમીફાઈનલમાં જવાની તક મળશે. જો ઓસ્ટ્રેલિયાએ અફઘાનિસ્તાનને હરાવ્યું હોત તો ભારત અને ઓસ્ટ્રેલિયા બંને સેમિફાઈનલમાં પહોંચી ગયા હોત. પરંતુ આ થઈ શક્યું નહીં. અફઘાનિસ્તાનની જીતને કારણે બાંગ્લાદેશને પણ થોડી રાહત મળી છે. ચાલો જાણીએ ચારેય ટીમના સેમીફાઈનલમાં પહોંચવાના સમીકરણ.

ભારત - ટીમ ઈન્ડિયા માટેનું સમીકરણ એકદમ સરળ છે. જો ભારતીય ટીમ ઓસ્ટ્રેલિયાને હરાવશે તો તે સેમીફાઈનલમાં પહોંચી જશે. ઓસ્ટ્રેલિયા સામેની હાર તેના પર કોઈ પણ રીતે અસર કરશે નહીં, બસ શરત એટલી કે તે મોટા માર્જિનથી ન હોય. ભારતની નેટ રન રેટ હાલમાં +2.425 છે. જો તે ઓસ્ટ્રેલિયા સામે મોટા માર્જીનથી હારે છે અને અફઘાનિસ્તાન બાંગ્લાદેશ સામે જીતે છે, તો જ તેની બહાર થવાની સંભાવના રહેશે. આવી સ્થિતિમાં ઓસ્ટ્રેલિયા અને અફઘાનિસ્તાન નેટ રન રેટના આધારે ભારતને પાછળ છોડી શકે છે.

ઓસ્ટ્રેલિયા - અફઘાનિસ્તાન સામેની હાર બાદ ઓસ્ટ્રેલિયાની ટીમ હાલમાં મુશ્કેલીમાં છે. હવે તેણે 24મી જૂને સેન્ટ લુસિયામાં રમાનાર મેચમાં ભારતને હરાવવું પડશે. તેને બાંગ્લાદેશની મદદની પણ જરૂર પડશે અને આશા રાખવી પડશે કે બાંગ્લાદેશ તેની છેલ્લી મેચમાં અફઘાનિસ્તાનને હરાવશે. ઓસ્ટ્રેલિયાની વર્તમાન નેટ રન-રેટ +0.223 છે. જો તે ભારત સામે હારે તો પણ તેને બાંગ્લાદેશના સમર્થનની જરૂર પડશે. પછી જો બાંગ્લાદેશ અફઘાનિસ્તાનને હરાવશે તો ત્રણ ટીમોના બે-બે પોઈન્ટ હશે અને નેટ રન રેટના આધારે નિર્ણય લેવામાં આવશે.

અફઘાનિસ્તાન - અફઘાનિસ્તાનની ટીમને સેમીફાઈનલમાં પહોંચવા માટે બાંગ્લાદેશની ટીમને હરાવવી પડશે. આ ઉપરાંત ભારત ઓસ્ટ્રેલિયા સામે જીતે તેવી અપેક્ષા રાખવી પડશે. જો અફઘાનિસ્તાન બાંગ્લાદેશ સામે હારે છે, તો એવી અપેક્ષા રાખવી પડશે કે ઓસ્ટ્રેલિયા ભારત સામે મોટા માર્જિનથી હારી જાય. અફઘાનિસ્તાનની નેટ રન રેટ હાલમાં -0.650 છે. જો ઓસ્ટ્રેલિયા જીતશે તો અફઘાનિસ્તાને બાંગ્લાદેશ સામે મોટા અંતરથી જીત મેળવવી પડશે.

બાંગ્લાદેશ - બાંગ્લાદેશને ક્વોલિફાય થવા માટે ચમત્કારની જરૂર છે. જોકે ટેકનિકલી તે હજુ પણ રેસમાં છે. બાંગ્લાદેશને અફઘાનિસ્તાન સામે મોટા માર્જીનથી જીતવું પડશે. સાથે જ આશા રાખવી જોઈએ કે ભારતીય ટીમ ઓસ્ટ્રેલિયાને હરાવે. હવે બાંગ્લાદેશ કોઈ પણ સંજોગોમાં ભારતથી આગળ નીકળી શકે તેમ નથી. બાંગ્લાદેશની નેટ રન રેટ હાલમાં -2.489 છે.

તમને જણાવી દઈએ કે T20 વર્લ્ડ કપ 2024ના સુપર-8માં 4 ટીમોના બે ગ્રુપ છે. આ બંને ગ્રુપમાંથી જે બે ટીમ ટોપ પર રહેશે તેમને સેમિફાઈનલમાં જગ્યા મળશે. ગ્રુપ-1માં ભારત ઉપરાંત બાંગ્લાદેશ, ઓસ્ટ્રેલિયા અને અફઘાનિસ્તાન છે. વેસ્ટ ઈન્ડિઝ, યુએસએ, સાઉથ આફ્રિકા અને ડિફેન્ડિંગ ચેમ્પિયન ઈંગ્લેન્ડને ગ્રુપ-2માં રાખવામાં આવ્યા છે.

T20 વર્લ્ડ કપ 2024માં બાકીની મેચોનું શેડ્યૂલ

• 23 જૂન - યુએસએ vs ઈંગ્લેન્ડ, બાર્બાડોસ, રાત્રે 8 વાગ્યે
• 24 જૂન - વેસ્ટ ઈન્ડિઝ vs સાઉથ આફ્રિકા, એન્ટિગુઆ, સવારે 6 વાગ્યે
• 24 જૂન - ઓસ્ટ્રેલિયા vs ભારત, સેન્ટ લુસિયા, રાત્રે 8 વાગ્યે
• 25 જૂન - અફઘાનિસ્તાન vs બાંગ્લાદેશ, સેન્ટ વિન્સેન્ટ, સવારે 6 વાગ્યે
• 27 જૂન - સેમિફાઈનલ 1, ગયાના, સવારે 6 વાગ્યે
• 27 જૂન - સેમિફાઈનલ 2, ત્રિનિદાદ, રાત્રે 8 વાગ્યે
• 29 જૂન - ફાઈનલ, બાર્બાડોસ, રાત્રે 8 વાગ્યે