IPL 2026 Trade / કન્ફર્મ થઈ સંજુ સેમસન-રવિન્દ્ર જાડેજાની ડીલ, કુલ 10 ખેલાડીઓ થયા ટ્રેડ; અહીં જુઓ લિસ્ટ
છેલ્લું અપડેટ : 15 Nov 2025
IPL 2026 મિની ઓક્શન પહેલા 15 નવેમ્બરે તમામ ફ્રેન્ચાઈઝી BCCIને તેમની રિટેન્શન અને રિલીઝ લિસ્ટ સબમિટ કરશે. તે પહેલા, ઘણા ખેલાડીઓનો ટ્રેડ થયો હતો. જેમાંથી સૌથી ચર્ચિત ટ્રેડ રવિન્દ્ર જાડેજા અને સંજુ સેમસનનો હતો. જ્યારે મુંબઈ ઈન્ડિયન્સે બે ખેલાડીઓને ટ્રેડ કર્યા હતા.
રવિન્દ્ર જાડેજા
સિનીયર ઓલરાઉન્ડર અને ચેન્નાઈ સુપર કિંગ્સ (CSK) નો ભૂતપૂર્વ કેપ્ટન રવિન્દ્ર જાડેજા ટ્રેડ પછી આગામી IPL સિઝનમાં રાજસ્થાન રોયલ્સ (RR) તરફથી રમશે. CSK માટે 12 સિઝન રમી ચૂકેલો જાડેજા લીગના સૌથી અનુભવી ખેલાડીઓમાંથી એક છે, જેણે 250થી વધુ મેચ રમી છે. ટ્રેડ હેઠળ, તેની લીગ ફી 18 કરોડ રૂપિયાથી ઘટાડીને 14 કરોડ રૂપિયા કરવામાં આવી છે.
સંજુ સેમસન
રાજસ્થાન રોયલ્સ (RR) નો કેપ્ટન અને ભારતીય વિકેટકીપર-બેટ્સમેન સંજુ સેમસન હવે ચેન્નાઈ સુપર કિંગ્સ (CSK) તરફથી તેની વર્તમાન લીગ ફી 18 કરોડ રૂપિયા સાથે રમશે. લીગના સૌથી અનુભવી ખેલાડીઓમાંથી એક સેમસન 177 IPL મેચ રમ્યો છે. CSK તેની કારકિર્દીમાં ફક્ત ત્રીજી ફ્રેન્ચાઈઝી હશે. સંજુએ 2013માં IPLમાં પ્રવેશ કર્યો હતો. આ સિનિયર ખેલાડી 2016 અને 2017માં દિલ્હી કેપિટલ્સ માટે રમ્યો હતો.
સેમ કરન
ઈંગ્લેન્ડના ઓલરાઉન્ડર સેમ કરન 2.4 કરોડ રૂપિયાની વર્તમાન લીગ ફી પર સફળ ટ્રેડ બાદ ચેન્નાઈ સુપર કિંગ્સ (CSK) માંથી રાજસ્થાન રોયલ્સ (RR) માં જોડાયો છે. 27 વર્ષીય ખેલાડીએ 64 IPL મેચ રમી છે અને RR તેની ત્રીજી ફ્રેન્ચાઈઝી હશે. તેણે અગાઉ 2019, 2023 અને 2024માં પંજાબ કિંગ્સનું પ્રતિનિધિત્વ કર્યું હતું અને અન્ય સિઝનમાં તે CSK માટે રમ્યો હતો.
મોહમ્મદ શમી
અનુભવી ફાસ્ટ બોલર મોહમ્મદ શમી સનરાઈઝર્સ હૈદરાબાદ (SRH) માંથી લખનૌ સુપર જાયન્ટ્સ (LSG) માં ગયો છે. IPL 2025 સિઝન પહેલા 10 કરોડ રૂપિયામાં SRHના બીજા સૌથી મોંઘો ખેલાડી રહેલો શમી તેની વર્તમાન ફી સાથે LSGમાં ગયો છે. આ સિનિયર ફાસ્ટ બોલર પાસે અનુભવનો ભંડાર છે. તેણે 2013માં IPL ડેબ્યુ કર્યા પછી પાંચ ફ્રેન્ચાઈઝી માટે 119 મેચ રમી છે. તેણે 2023માં 17 મેચમાં 28 વિકેટ સાથે પર્પલ કેપ જીતી હતી.
મયંક માર્કંડે
લેગ-સ્પિનર મયંક માર્કંડે કોલકાતા નાઈટ રાઈડર્સ (KKR) માંથી સફળ ટ્રેડ કર્યા પછી તેની ભૂતપૂર્વ ફ્રેન્ચાઈઝી મુંબઈ ઈન્ડિયન્સ (MI) માં પાછો ફરશે. KKR દ્વારા 30 લાખ રૂપિયાની ફીમાં ખરીદાયેલ માર્કંડે તેના વર્તમાન પગાર પર MIમાં જોડાશે. માર્કંડેએ પોતાની IPL કારકિર્દી MIથી શરૂ કરી હતી, તે 2018, 2019 અને 2022માં ફ્રેન્ચાઈઝી માટે રમ્યો હતો. તે 2021માં રાજસ્થાન રોયલ્સ અને 2023 અને 2024માં સનરાઈઝર્સ હૈદરાબાદ માટે રમ્યો હતો. તેણે 37 IPL મેચોમાં 37 વિકેટ લીધી છે.
અર્જુન તેંડુલકર
બોલિંગ ઓલરાઉન્ડર અર્જુન તેંડુલકર મુંબઈ ઈન્ડિયન્સથી લખનૌ સુપર જાયન્ટ્સ (LSG) માં જોડાયો છે. અર્જુન તેની વર્તમાન ફી 30 લાખ રૂપિયા સાથે LSGમાં જોડાશે. 2021ની IPL ઓક્શનમાં મુંબઈ ઈન્ડિયન્સ દ્વારા પ્રથમ પસંદગી પામ્યા બાદ તેણે 2023માં ફ્રેન્ચાઈઝી માટે IPLમાં ડેબ્યુ કર્યું હતું.
નીતિશ રાણા
રાજસ્થાન રોયલ્સ (RR) માંથી ટ્રેડ થયા બાદ લેફટી બેટ્સમેન નીતિશ રાણા હવે દિલ્હી કેપિટલ્સ (DC) નું પ્રતિનિધિત્વ કરશે. તે તેની વર્તમાન ફી 4.2 કરોડ રૂપિયા સાથે DCમાં જશે. 100થી વધુ મેચ રમી ચૂકેલા રાણાએ 2023માં કોલકાતા નાઈટ રાઇડર્સનું નેતૃત્વ કર્યું હતું, જ્યારે શ્રેયસ અય્યર ઈજાને કારણે બહાર થઈ ગયો હતો.
ડોનોવન ફરેરા
દિલ્હી કેપિટલ્સ (DC) તરફથી સફળ ટ્રેડ બાદ ઓલરાઉન્ડર ડોનોવન ફરેરા તેની ભૂતપૂર્વ ફ્રેન્ચાઈઝી, રાજસ્થાન રોયલ્સ (RR) માં પાછો ફરશે. ટ્રાન્સફર એગ્રીમેન્ટ મુજબ, તેની ફી 75 લાખ રૂપિયાથી વધારીને 1 કરોડ રૂપિયા કરવામાં આવી છે.
શાર્દુલ ઠાકુર
ગઈ સિઝનમાં લખનૌ સુપર જાયન્ટ્સ માટે રિપ્લેસમેન્ટ તરીકે રમનાર બોલિંગ ઓલરાઉન્ડર શાર્દુલ ઠાકુરને મુંબઈ ઈન્ડિયન્સ સાથે 2 કરોડ રૂપિયામાં ટ્રેડ કરવામાં આવ્યો હતો. 2025ની મેગા ઓક્શનમાં શાર્દુલ અનસોલ્ડ રહ્યો હતો.
શેરફેન રધરફોર્ડ
IPL 2026 પહેલા શેરફેન રધરફોર્ડને ગુજરાત ટાઈટન્સથી મુંબઈ ઈન્ડિયન્સમાં ટ્રેડ કરવામાં આવ્યો છે. વેસ્ટ ઈન્ડિઝના લેફટી બેટ્સમેન શેરફેન રધરફોર્ડને મુંબઈ ઈન્ડિયન્સ દ્વારા 2.6 કરોડ રૂપિયામાં સાઈન કરવામાં આવ્યો છે, જે MI ફ્રેન્ચાઈઝીમાં તેની વાપસી દર્શાવે છે. રધરફોર્ડ છેલ્લે 2020માં મુંબઈ માટે રમ્યો હતો.
