રિટાયરમેન્ટ બાદ રોહિત અને કોહલીને સોંપાઈ નવી જવાબદારી, ખુદ BCCI સેક્રેટરી જય શાહે જણાવ્યું
ટી20 વર્લ્ડ કપ જીત્યા બાદ ભારતીય ટીમ સાતમા આસમાને છે. રોહિત શર્માની કે
ટી20 વર્લ્ડ કપ જીત્યા બાદ ભારતીય ટીમ સાતમા આસમાને છે. રોહિત શર્માની કેપ્ટન્સીમાં ટીમ ઈન્ડિયાએ શાનદાર જીત હાંસલ કરી હતી. તેણે 2007થી આ ટ્રોફી જીતી છે. વિજેતા બન્યા બાદ ભારતના ત્રણ દિગ્ગજ ખેલાડીઓએ નિવૃત્તિ લીધી હતી. સૌથી પહેલા વિરાટ કોહલીએ T20 ઈન્ટરનેશનલમાંથી નિવૃત્તિની જાહેરાત કરી. તેના પછી કેપ્ટન રોહિત અને ઓલરાઉન્ડર રવિન્દ્ર જાડેજાએ પણ આ ફોર્મેટમાંથી નિવૃત્તિ લીધી છે.
BCCI સેક્રેટરીએ જણાવ્યો નવો ટાર્ગેટ
ટીમ ઈન્ડિયાએ ટી20 વર્લ્ડ કપ જીતી લીધો છે અને હવે આવતા વર્ષે બે મોટી આઈસીસી ઈવેન્ટ જીતવાની તૈયારીઓ ચાલી રહી છે. ભારતીય ક્રિકેટ કંટ્રોલ બોર્ડ (BCCI)એ આ માટે તૈયારીઓ શરૂ કરી દીધી છે. T20 વર્લ્ડ કપ બાદ નિવૃત્તિ લેનારા ખેલાડીઓ હવે 2025માં યોજાનારી બે મોટી ટૂર્નામેન્ટ જીતવાની તૈયારી શરૂ કરશે. BCCIના સચિવ જય શાહે કહ્યું કે, ટીમ ઈન્ડિયાનું આગામી લક્ષ્ય ચેમ્પિયન્સ ટ્રોફી અને ICC વર્લ્ડ ટેસ્ટ ચેમ્પિયનશિપની ફાઈનલ જીતવાનું છે.
સિનિયર ખેલાડીઓ ચોક્કસ રમશેઃ જય શાહ
જય શાહે અનુભવી સિનિયર ખેલાડીઓ સાથેની મજબૂત ટીમના મહત્ત્વ પર પ્રકાશ પાડતા વિશ્વ ટેસ્ટ ચેમ્પિયનશિપ અને ચેમ્પિયન્સ ટ્રોફી જીતવા પર ભાર મૂક્યો હતો. જય શાહના કહેવા પ્રમાણે, "આ ટીમ જે રીતે આગળ વધી રહી છે, અમારો હેતુ વર્લ્ડ ટેસ્ટ ચેમ્પિયનશિપની ફાઈનલ અને ચેમ્પિયન્સ ટ્રોફી જીતવાનો છે. ત્યાં પણ લગભગ આ જ ટીમ રમશે. સિનિયર ખેલાડીઓ ચોક્કસથી હશે.'' છેલ્લા એક દાયકામાં ભારતીય ટીમ મોટી ફાઇનલમાં હારવા માટે જાણીતી હતી, પરંતુ છેલ્લા 12 મહિનામાં બે ICC ફાઇનલમાં હાર્યા બાદ ટીમે ટાઇટલનો દુકાળ ખતમ કરી દીધો છે.
ચેમ્પિયન્સ ટ્રોફીનું ટાઇટલ ફરીથી જીતવા પર નજર
આવતા વર્ષે ફેબ્રુઆરી-માર્ચમાં પાકિસ્તાનની ધરતી પર ચેમ્પિયન્સ ટ્રોફીનું આયોજન થવાનું છે. તે પછી, જૂન 2025માં, વર્લ્ડ ટેસ્ટ ચેમ્પિયનશિપની ફાઇનલ લોર્ડ્સ, લંડનમાં યોજાશે. ભારતે 2013માં ચેમ્પિયન્સ ટ્રોફીની ફાઈનલ જીતી હતી. જે બાદ 2017માં ટીમ ઈન્ડિયા ફાઈનલમાં પાકિસ્તાન સામે હારી ગઈ હતી. ભારત આ ટૂર્નામેન્ટ ફરી જીતવા માગશે.
હવે ટેસ્ટ ચેમ્પિયન બનવાનો વારો
વર્લ્ડ ટેસ્ટ ચેમ્પિયનશિપની વાત કરીએ તો 2021માં ભારત ન્યૂઝીલેન્ડ સામે ફાઇનલમાં હારી ગયું હતું. જે બાદ ઓસ્ટ્રેલિયાએ 2023માં હરાવ્યું હતું. સતત બે વખત વર્લ્ડ ટેસ્ટ ચેમ્પિયનશિપની ફાઇનલમાં હાર્યા બાદ હવે ભારતની નજર આ ટૂર્નામેન્ટ જીતવા પર છે.
