દિગ્ગજ બોક્સર જ્યોર્જ ફોરમેનનું અવસાન, 19 વર્ષની ઉંમરે જીત્યો હતો ગોલ્ડ મેડલ, મોહમ્મદ અલી સાથે પણ થઈ હતી ટક્કર
અમેરિકન બોક્સિંગ દિગ્ગજ જ્યોર્જ ફોરમેનનું શુક્રવારે (21 માર્ચ) 76 વર્ષની ઉંમરે અવસાન થઈ ગયું છે. ફોરમેન
અમેરિકન બોક્સિંગ દિગ્ગજ જ્યોર્જ ફોરમેનનું શુક્રવારે (21 માર્ચ) 76 વર્ષની ઉંમરે અવસાન થઈ ગયું છે. ફોરમેને 1968માં મેક્સિકોમાં યોજાયેલી ઓલિમ્પિકમાં ગોલ્ડ મેડલ જીત્યો હતો. ફોરમેન "રંબલ ઈન ધ જંગલ" માં મુહમ્મદ અલી સામે પણ લડ્યા હતા. 19 વર્ષની ઉંમરે, તેમણે હેવીવેઈટ ગોલ્ડ મેડલ જીત્યો.
પરિવારે મૃત્યુની પુષ્ટિ કરી
જ્યોર્જ ફોરમેનના પરિવારે તેમના સોશિયલ મીડિયા એકાઉન્ટ દ્વારા તેમના મૃત્યુની પુષ્ટિ કરી. પ્રોફેશનલ બોક્સર બન્યા પછી, ફોરમેને જમૈકાના કિંગ્સ્ટનમાં ડિફેન્ડિંગ ચેમ્પિયન જો ફ્રેઝિયરનો સામનો કરતા પહેલા સતત 37 મેચ જીતી હતી.
તેમણે બે રાઉન્ડ પછી ટેકનિકલ નોકઆઉટ દ્વારા ફ્રેઝિયરને હરાવ્યો હતો. ફોરમેન 1974માં પ્રખ્યાત 'રંબલ ઈન ધ જંગલ' માટે જાણીતા છે, જ્યાં તેમણે પોતાનું પહેલું ટાઈટલ પ્રતિષ્ઠિત મુહમ્મદ અલી સામે ગુમાવ્યું હતું.
ઝૈરે (હવે ડેમોક્રેટિક રિપબ્લિક ઓફ કોંગો) ના કિન્શાસામાં મુહમ્મદ અલીનો સામનો કરતા પહેલા ફોરમેને બે વાર સફળતાપૂર્વક પોતાના ટાઈટલનો બચાવ કર્યો, જે બોક્સિંગ ઈતિહાસની સૌથી પ્રતિષ્ઠિત મેચોમાંની એક બની. તેમના મૃત્યુ પછી, તેમના પરિવારે તેમને ઇન્સ્ટાગ્રામ પર શ્રદ્ધાંજલિ આપી અને તેમના પરિવાર પ્રત્યેના સમર્પણ અને બોક્સિંગ જગતમાં તેમના યોગદાનની પ્રશંસા કરી હતી.
ફોરમેનના પરિવારે ઇન્સ્ટાગ્રામ પર લખ્યું - 'અમારું દિલ તૂટી ગયું છે, ઊંડા દુઃખ સાથે, અમે અમારા પ્રિય જ્યોર્જ એડવર્ડ ફોરમેન સિનિયરના અવસાનની જાહેરાત કરીએ છીએ, જેમણે 21 માર્ચ, 2025ના રોજ પ્રિયજનો વચ્ચે શાંતિથી આ દુનિયા છોડી દીધી. એક સમર્પિત ઉપદેશક, એક સમર્પિત પતિ, એક પ્રેમાળ પિતા અને એક ગૌરવશાળી દાદા અને પરદાદા... તેમણે અતૂટ શ્રદ્ધા, નમ્રતા અને હેતુપૂર્ણ જીવન જીવ્યું.'
1990ના દાયકામાં નિવૃત્ત થયા પછી, ફોરમેન વિવિધ પ્રોડક્ટ્સ માટે સ્પોક્સપર્સન બન્યા હતા. તેમની સૌથી પ્રખ્યાત જાહેરાત હોમ એપ્લાયન્સિસ બ્રાન્ડ સાલ્ટન ઇન્ક માટે ઇલેક્ટ્રિક ગ્રીલની હતી. ફોરમેને તેમના પ્રોફેશનલ કરિયરનો અંત 76 જીત અને 5 હાર સાથે કર્યો, તેમણે 1997માં તેમની છેલ્લી મેચ રમી હતી.
