IPL 2024 / આજે મળશે પ્રથમ ફાઈનલિસ્ટ, ક્વોલિફાયર-1માં કોલકાતા-હૈદરાબાદ વચ્ચે થશે ટક્કર

IPL 2024ની પ્લેઓફ મેચો આજથી (21 મે, મંગળવાર) શરૂ થશે. પ્લેઓફમાં પ્રથમ મેચ ક્વોલિફાયર-1 તરીકે પોઈન્ટ્સ ટેબલ પર પહેલા અને બીજા સ્થાને રહેલી ટીમો વચ્ચે રમાશે, જેમાં કોલકાતા નાઈટ રાઈડર્સ અને સનરાઈઝર્સ હૈદરાબાદ ટકરાશે. કોલકાતા અને હૈદરાબાદ વચ્ચે રમાનારી મેચ ટૂર્નામેન્ટની પ્રથમ ફાઈનલિસ્ટ ટીમ નક્કી કરશે.

કોલકાતા અને હૈદરાબાદ વચ્ચે ક્વોલિફાયર-1 અમદાવાદના નરેન્દ્ર મોદી સ્ટેડિયમમાં સાંજે 7.30 વાગ્યાથી રમાશે. આ મેચ જીતનારી ટીમ ફાઈનલ પહોંચી જશે, જ્યારે હારનાર ટીમને ફાઈનલમાં પહોંચવાની વધુ એક તક મળશે. હારનાર ટીમ ક્વોલિફાયર-2 રમીને ફાઈનલમાં પ્રવેશ કરી શકશે.

તમને જણાવી દઈએ કે કોલકાતા નાઈટ રાઈડર્સે સૌથી વધુ મેચ જીતીને પોઈન્ટ ટેબલમાં નંબર વનનું સ્થાન મેળવ્યું છે. KKR 14 લીગ મેચોમાંથી 9 જીતી અને 3 હારી, જ્યારે ટીમની બે મેચ વરસાદને કારણે અનિર્ણિત રહી. બીજી તરફ, પેટ કમિન્સની કપ્તાનીવાળી સનરાઈઝર્સ હૈદરાબાદે 14 લીગ મેચોમાંથી 8 જીતી અને 5માં હારનો સામનો કરવો પડ્યો, જ્યારે ટીમની એક મેચ અનિર્ણિત રહી.

KKR એ લીગ મેચમાં હૈદરાબાદને હરાવી હતી

કોલકાતા નાઈટ રાઈડર્સે IPL 2024માં તેમની પ્રથમ લીગ મેચ સનરાઈઝર્સ હૈદરાબાદ સામે રમી હતી. કોલકાતાએ આ મેચ 4 રને જીતી લીધી હતી. મેચમાં પ્રથમ બેટિંગ કરતા KKRએ 20 ઓવરમાં 208/7 રન બનાવ્યા હતા. જ્યારે હૈદરાબાદની ટીમ 20 ઓવરમાં 204/7 રન બનાવી શકી હતી. હવે એ જોવાનું રસપ્રદ રહેશે કે ક્વોલિફાયર-1માં કઈ ટીમ કોના ઉપર વિજય મેળવે છે.

કોલકાતા વિ હૈદરાબાદ હેડ ટુ હેડ

કોલકાતા નાઈટ રાઈડર્સ અને સનરાઈઝર્સ હૈદરાબાદ વચ્ચે અત્યાર સુધીમાં 26 મેચ રમાઈ છે. આ મેચોમાં કોલકાતાએ શાનદાર લીડ મેળવી છે અને 17માં જીત મેળવી છે, જ્યારે હૈદરાબાદ માત્ર 9 મેચ જીતવામાં સફળ રહ્યું છે. આવી સ્થિતિમાં આજે ક્વોલિફાયર મેચમાં પણ કોલકાતા નાઈટ રાઈડર્સ સનરાઈઝર્સ હૈદરાબાદ પર પ્રભુત્વ જમાવતી જોવા મળી શકે છે.