કેવી રીતે થઈ બોર્ડર ગાવસ્કર ટ્રોફીની શરૂઆત? જાણો શું છે આ નામ રાખવા પાછળનું કારણ

ભારત અને ઓસ્ટ્રેલિયા વચ્ચે પાંચ મેચની બોર્ડર-ગાવસ્કર ટ્રોફી 2024-25ની પાંચમી અને અંતિમ ટેસ્ટ મેચ સિડનીમાં રમાઈ રહી છે. આ સિરીઝ 22 નવેમ્બર 2024થી શરૂ થઈ હતી અને હવે છેલ્લી મેચ ચાલી રહી છે. ભારત અને ઓસ્ટ્રેલિયા વચ્ચે 1947થી ટેસ્ટ મેચ રમાઈ રહી છે. પરંતુ શું તમે જાણો છો કે બોર્ડર-ગાવસ્કર ટ્રોફી પહેલીવાર ક્યારે શરૂ થઈ હતી અને આ સિરીઝનું આવું નામ રાખવા પાછળનું કારણ શું છે? ચાલો તમને તેના વિશે જણાવીએ.

આ પણ વાંચો: IND vs AUS / સિડની ટેસ્ટનો બીજો દિવસ સમાપ્ત, રિષભ પંતે ફટકારી તોફાની ફિફ્ટી, ભારત 145 રનથી આગળ

પ્રથમ બોર્ડર-ગાવસ્કર ટ્રોફી ક્યારે રમાઈ હતી?

પ્રથમ બોર્ડર-ગાવસ્કર ટ્રોફી વર્ષ 1996માં ભારત અને ઓસ્ટ્રેલિયા વચ્ચે રમાઈ હતી. ભારત અને ઓસ્ટ્રેલિયા વચ્ચે ક્રિકેટનું 50મું વર્ષ 1996માં શરૂ થયું હતું અને તેને યાદગાર બનાવવા માટે ભારતીય ક્રિકેટ કંટ્રોલ બોર્ડ (BCCI) અને ક્રિકેટ ઓસ્ટ્રેલિયા (CA) એ બંને ટીમો વચ્ચે પાંચ મેચની ટેસ્ટ સિરીઝનું આયોજન કર્યું હતું. બોર્ડર-ગાવસ્કર ટ્રોફીના નામ સાથે રમવાનું નક્કી કર્યું હતું. ત્યારથી, ભારત અને ઓસ્ટ્રેલિયા વચ્ચે પાંચ મેચની બોર્ડર-ગાવસ્કર ટ્રોફી રમાય છે.

બોર્ડર-ગાવસ્કર ટ્રોફીનું નામ કેવી રીતે પડ્યું?

ભારત અને ઓસ્ટ્રેલિયા વચ્ચેની પાંચ મેચની ટેસ્ટ સિરીઝ અન્ય કોઈ નામે રમાઈ શકી હોત. પરંતુ વર્ષ 1996 સુધી વિશ્વ ક્રિકેટમાં માત્ર બે બેટ્સમેન એવા હતા જેમણે ટેસ્ટ ક્રિકેટના ઈતિહાસમાં 10,000થી વધુ રન બનાવ્યા હતા. આ કારણોસર ઓસ્ટ્રેલિયાના એલન બોર્ડર અને ભારતના મહાન સુનીલ ગાવસ્કરના સન્માનમાં ભારત અને ઓસ્ટ્રેલિયા વચ્ચે બોર્ડર-ગાવસ્કર ટ્રોફી શરૂ કરવામાં આવી હતી.

બોર્ડર-ગાવસ્કર ટ્રોફીની પ્રથમ વિજેતા ટીમ

જ્યારે બોર્ડર-ગાવસ્કર ટ્રોફી વર્ષ 1996માં પ્રથમ વખત શરૂ કરવામાં આવી હતી, ત્યારે આ ટ્રોફી હેઠળ માત્ર એક જ ટેસ્ટ મેચ રમાઈ હતી જે દિલ્હીના અરુણ જેટલી સ્ટેડિયમમાં યોજાઈ હતી. સચિન તેંડુલકરની કપ્તાનીમાં ભારતે આ મેચ 7 વિકેટે જીતી હતી.

ભારત અને ઓસ્ટ્રેલિયા વચ્ચે 1996થી 16 વખત બોર્ડર-ગાવસ્કર ટ્રોફી રમાઈ છે. જેમાં ભારત 10 વખત અને ઓસ્ટ્રેલિયા 5 વખત બોર્ડર-ગાવસ્કર ટ્રોફી જીત્યું છે. 2003-04માં બંને ટીમો વચ્ચેની સિરીઝ 1-1થી ડ્રો રહી હતી.

બોર્ડર-ગાવસ્કર ટ્રોફીના ટોપ સ્કોરર

બોર્ડર-ગાવસ્કર ટ્રોફીના ઈતિહાસમાં સૌથી વધુ રન બનાવવાનો રેકોર્ડ આજે પણ મહાન ભારતીય બેટ્સમેન સચિન તેંડુલકરના નામે છે. તેંડુલકરે 65 ઈનિંગ્સમાં 56.24ની એવરેજથી 3262 રન બનાવ્યા હતા. ઓસ્ટ્રેલિયા તરફથી રિકી પોન્ટિંગ 51 ઈનિંગ્સમાં 57.70ની એવરેજથી 2555 રન સાથે ટોપ સ્કોરર છે.

બોર્ડર-ગાવસ્કર ટ્રોફીમાં સૌથી વધુ વિકેટ લેનાર બોલર

બોર્ડર-ગાવસ્કર ટ્રોફીમાં સૌથી વધુ વિકેટ લેવાનો રેકોર્ડ ઓસ્ટ્રેલિયાના નાથન લિયોનના નામે છે. લિયોને 47 ઈનિંગ્સમાં 116 વિકેટ લીધી છે. તેના પછી પૂર્વ ભારતીય સ્પિનર ​​રવિચંદ્રન અશ્વિન 42 ઈનિંગ્સમાં 114 વિકેટ સાથે બીજા સ્થાને છે.