જેના માટે CSKએ ખર્ચ્યા લાખો તેણે લીધી હેટ્રિક, હાર્દિક પંડ્યાને ગોલ્ડન ડક પર કર્યો આઉટ

હાર્દિક પંડ્યા અત્યારે તોફાની ફોર્મમાં છે. તેણે સૈયદ મુશ્તાક અલી ટ્રોફીમાં પોતાના બેટથી તબાહી મચાવી છે. પંડ્યાની બેટિંગને જોઈને એવું લાગી રહ્યું હતું કે તેને રોકવો અશક્ય છે, પરંતુ ચેન્નાઈ સુપર કિંગ્સના બોલરે પંડ્યાની ગતિ પર બ્રેક લગાવી અને તેને ગોલ્ડન ડક પર આઉટ કર્યો હતો. આ બોલરનું નામ શ્રેયસ ગોપાલ છે જેણે સૈયદ મુશ્તાક અલી કર્ણાટક તરફથી રમતા બરોડા સામે હેટ્રિક લીધી હતી.

આ પણ વાંચો: VIDEO / ખાસ મિત્ર સચિનને ન ઓળખી શક્યો વિનોદ કાંબલી, પછી અચાનક પકડી લીધો હાથ

આ મેચમાં પ્રથમ બેટિંગ કરતા કર્ણાટકે આઠ વિકેટ ગુમાવીને 169 રન બનાવ્યા હતા. બરોડાએ આ લક્ષ્યાંક 18.5 ઓવરમાં છ વિકેટ ગુમાવીને હાંસલ કરી લીધો હતો. જોકે ગોપાલની બોલિંગની ઘણી ચર્ચા થઈ રહી છે. ગોપાલને ચેન્નાઈએ 30 લાખ રૂપિયાની મૂળ કિંમતમાં ખરીદ્યો હતો.

પંડ્યા બ્રધર્સને આઉટ કર્યા

આ મેચમાં ગોપાલે બરોડાની ઈનિંગ્સની 11મી ઓવરમાં હેટ્રિક લીધી હતી. તેણે આ ઓવરના પહેલા જ બોલ પર શાશ્વત રાવતને આઉટ કર્યો, જે 63 રન બનાવીને પવેલિયન પરત ફર્યો. તે પછીના બોલ પર ઈનફોર્મ બેટ્સમેન હાર્દિક તેની સામે હતો. ગોપાલે પહેલા જ બોલ પર હાર્દિકને કેચ આઉટ કર્યો હતો. આ પછી હાર્દિકનો ભાઈ અને બરોડાનો કેપ્ટન કૃણાલ મેદાન પર આવ્યો અને ગોપાલે તેને પણ પહેલા જ બોલ પર પવેલિયનનો રસ્તો બતાવ્યો. આ પછી ગોપાલે ભાનુ પાનિયાને પોતાનો શિકાર બનાવ્યો હતો. તેણે ચાર ઓવરમાં 19 રન આપીને ચાર વિકેટ લીધી હતી.

જોકે, શિવાલિક શર્મા અને વિષ્ણુ સોલંકીએ અંતમાં શાનદાર બેટિંગ કરી અને ટીમને જીત તરફ દોરી ગયા. શિવાલિકે 21 બોલમાં 22 રન બનાવ્યા હતા. સોલંકીએ 21 બોલમાં 28 રનની ઈનિંગ રમી હતી. આ સિવાય અતિત શેઠ છ રન બનાવીને અણનમ રહ્યો હતો.

અભિનવ મનોહરની શાનદાર ઈનિંગ

અગાઉ કર્ણાટકે અભિનવ મનોહરની તોફાની ઈનિંગના આધારે મજબૂત સ્કોર બનાવ્યો હતો. તેણે 34 બોલમાં છ છગ્ગાની મદદથી 56 રનની અણનમ ઈનિંગ રમી હતી. તેના સિવાય સમરને 35 બોલમાં 38 રન,  કૃષ્ણા શ્રીજીતે નવ બોલમાં ત્રણ છગ્ગાની મદદથી 22 રન બનાવ્યા હતા. શ્રેયસ ગોપાલે 16 બોલમાં 18 રનની ઈનિંગ રમી હતી.