AUS vs ENG / પર્થ ટેસ્ટ માટે ઓસ્ટ્રેલિયાએ જાહેર કરી પ્લેઈંગ ઈલેવન, જાણો ભારતમાં કેવી રીતે જોવી આ મેચ

ઓસ્ટ્રેલિયા અને ઈંગ્લેન્ડ વચ્ચે એશિઝ સિરીઝ શુક્રવારથી પર્થમાં શરૂ થશે. ઓસ્ટ્રેલિયાએ ગુરુવારે પ્રથમ ટેસ્ટ માટે તેની પ્લેઈંગ ઈલેવનની જાહેરાત કરી છે. યજમાન ટીમ માટે બે 31 વર્ષીય ખેલાડીઓ, જેક વેધરાલ્ડ અને બ્રેન્ડન ડોગેટ ટેસ્ટ ડેબ્યુ કરશે. 2019 પછી આ પહેલીવાર છે જ્યારે બે ખેલાડીઓ એક ટેસ્ટ મેચમાં ઓસ્ટ્રેલિયા માટે પોતાનું ટેસ્ટ ડેબ્યુ કરશે.

2010-11ના પછી આ પહેલી વાર છે જ્યારે ઓસ્ટ્રેલિયન ટીમ એશિઝ સિરીઝની મેચમાં બે ખેલાડીઓને ડેબ્યુ કરવાની તક આપશે. તે સમયે ઉસ્માન ખ્વાજા અને માઈકલ બીયરે ડેબ્યુ કર્યું હતું.

ઓસ્ટ્રેલિયાનો પ્રયોગ ચાલુ

જેક વેધરાલ્ડ ઉસ્માન ખ્વાજા સાથે ઓસ્ટ્રેલિયા માટે ઈનિંગની ઓપન કરતો જોવા મળશે. 2022માં ટેસ્ટ ટીમમાં પાછા ફર્યા પછી ખ્વાજાની તે સાતમો ઓપનિંગ પાર્ટનર હશે. વેધરલ્ડે 77 ફર્સ્ટ-ક્લાસ મેચોમાં 37.47ની એવરેજથી 5,322 રન બનાવ્યા છે, જેમાં 13 સદી અને 26 અડધી સદીનો સમાવેશ થાય છે. પેટ કમિન્સ અને જોશ હેઝલવુડની ગેરહાજરીમાં મિચેલ સ્ટાર્ક બોલિંગ વિભાગનું નેતૃત્વ કરશે. બોલિંગ વિભાગની જવાબદારી સ્ટાર્ક સાથે સ્કોટ બોલેન્ડ, બ્રેન્ડન ડોગેટ અને નાથન લિયોન પર હશે.

ઓસ્ટ્રેલિયાની પ્લેઈંગ ઈલેવન

ઉસ્માન ખ્વાજા, જેક વેધરાલ્ડ, માર્નસ લાબુશેન, સ્ટીવ સ્મિથ (કેપ્ટન), ટ્રેવિસ હેડ, કેમેરોન ગ્રીન, એલેક્સ કેરી, મિચેલ સ્ટાર્ક, નાથન લિયોન, બ્રેન્ડન ડોગેટ અને સ્કોટ બોલેન્ડ.

ઈંગ્લેન્ડે 12 સભ્યોની ટીમ જાહેર કરી

અગાઉ, ઈંગ્લેન્ડે બુધવારે પર્થ ટેસ્ટ માટે 12 સભ્યોની ટીમની જાહેરાત કરી હતી. ઈંગ્લેન્ડે મેચના દિવસે કયો ખેલાડી બહાર રહેશે તે અંગે સસ્પેન્સ રાખ્યું છે. એ જોવું રસપ્રદ રહેશે કે ઈંગ્લેન્ડ ઓલ-ફાસ્ટ બોલર ટીમ ઉતારશે કે શોએબ બશીરના રૂપમાં સ્પિનર સાથે ઉતરશે.

ઈંગ્લેન્ડની ટીમ

બેન સ્ટોક્સ (કેપ્ટન), જોફ્રા આર્ચર, ગસ એટકિન્સન, શોએબ બશીર, હેરી બ્રુક, બ્રાયડન કાર્સ, ઝેક ક્રોલી, બેન ડકેટ, ઓલી પોપ, જો રૂટ, જેમી સ્મિથ અને માર્ક વુડ.

ભારતમાં ક્યાં જોઈ શકશો લાઈવ?

પર્થમાં એશિઝ સિરીઝની પહેલી મેચ ભારતીય સમય મુજબ સવારે 7:50 વાગ્યે શરૂ થશે. મેચના બરાબર અડધા કલાક પહેલા ટોસ થશે. તમે ભારતમાં ટીવી પર સ્ટાર સ્પોર્ટ્સ અને ફોનમાં જિઓ હોટસ્ટાર પર મેચ લાઈવ જોઈ શકો છો.