દિલ્હી બોર્ડરો જડબેસલાક, અંબાલામાં ઈન્ટરનેટ બંધ, ખેડૂત આંદોલનથી ગભરાઈ સરકાર
પંજાબની ખનૌરી બોર્ડર પર છેલ્લા 10 મહિનાથી પડાવ નાંખી રહેલા ખેડૂતોનું એક જૂથ આજે
પંજાબની ખનૌરી બોર્ડર પર છેલ્લા 10 મહિનાથી પડાવ નાંખી રહેલા ખેડૂતોનું એક જૂથ આજે દિલ્હી તરફ કૂચ કરવા જઈ રહ્યું છે. ખનૌરી બોર્ડર પર ભૂખ હડતાળ પર બેઠેલા ખેડૂતોએ દરેક ઘરમાંથી એક વ્યક્તિ આવવાની હાકલ કરી છે. ખેડૂતોની કૂચની જાહેરાત બાદ વહીવટીતંત્ર સજ્જ થઈ ગયું છે. દિલ્હી પોલીસે માર્ચ પહેલા દિલ્હીની તમામ બોર્ડરો પર સુરક્ષામાં સખ્તાઈ કરી દીધી છે. એક વરિષ્ઠ પોલીસ અધિકારીના જણાવ્યા અનુસાર, “દિલ્હી પોલીસ એલર્ટ પર છે અને સરહદ પર સુરક્ષા કડક કરવામાં આવી છે. હાલમાં, સિંધુ બોર્ડર પર થોડી સંખ્યામાં દળો તૈનાત કરવામાં આવ્યા છે, પરંતુ પંજાબ-હરિયાણા સરહદની શંભુ સરહદ પરની સ્થિતિ જોતાં તેમાં વધારો થઈ શકે છે.
આ પણ વાંચોઃ VIDEO: 'દિલ્હી કૂચ'નો આરંભ થતાં ખેડૂતોએ બેરિકેડ હટાવ્યા, પોલીસનો ટીયરગેસનો મારોઃ ઈન્ટરનેટ બંધ
અંબાલામાં 9 ડિસેમ્બર સુધી ઈન્ટરનેટ બંધ
ખેડૂતોના આંદોલનને જોતા અંબાલામાં આજથી 9મી ડિસેમ્બર સુધી ઈન્ટરનેટ સેવા બંધ કરી દેવામાં આવી છે. રાજ્ય સરકાર દ્વારા જારી કરવામાં આવેલા આદેશમાં કહેવામાં આવ્યું છે કે અંબાલાના ડાંગદેહરી, લોહગઢ, માનકપુર, દાડિયાના, બારી ઘેલ, લહાર્સ, કાલુ માજરા, દેવી નગર, સદ્દોપુર, સુલતાનપુર અને કાકરૂ ગામોના વિસ્તારોમાં ઈન્ટરનેટ સેવા બંધ રહેશે.
સરહદો પર કડક સુરક્ષા
અંબાલાની શંભુ બોર્ડર પર ગુરુવારે મોડી સાંજ સુધી પોલીસ પ્રશાસનની ઉચ્ચ સ્તરીય ટીમ હાજર રહી હતી. આમાં આઈજી અંબાલા અને એસપી અંબાલાએ ઘટનાસ્થળની મુલાકાત લીધી હતી અને તમામ સુરક્ષા વ્યવસ્થાની સમીક્ષા કરી હતી. બીજી તરફ હરિયાણાના દાતા સિંહ બોર્ડર પર સુરક્ષા દળોને ફરી એલર્ટ કરવામાં આવ્યા હતા. સુરક્ષા દળોએ પંજાબના ખેડૂતોને 'દિલ્લી માર્ચ'થી રોકવા માટે વ્યૂહરચના તૈયાર કરી છે.
101 ખેડૂત-મજૂરોનું એક જૂથ શંભુ બોર્ડરથી દિલ્હી તરફ કૂચ કરશે
શંભુ સરહદ પર ખેડૂત નેતા સર્વન સિંહ પંઢેરે જણાવ્યું હતું કે, 101 ખેડૂતોનું જૂથ શંભુ સરહદ વિરોધ સ્થળથી આજે બપોરે 1 વાગ્યે દિલ્હી તરફ પગપાળા કૂચ શરૂ કરશે. પંઢેરે જણાવ્યું હતું કે, "આ લડાઈ લડતાં 297 દિવસ થઈ ગયા છે અને ખનૌરી બોર્ડર પર આમરણાંત ઉપવાસનો 11મો દિવસ છે. આજે બપોરે 1 વાગ્યે, 101 ખેડૂત-મજૂરોનું એક જૂથ શંભુ બોર્ડરથી દિલ્હી તરફ કૂચ કરશે.
પગપાળા જનારાને ન અટકાવવા જોઈએ
ગુરુ તેગ બહાદુરે 6 ડિસેમ્બર 1675ના રોજ પોતાનું બલિદાન આપ્યું હતું. તેથી, 101 ખેડૂતોના જૂથનું નેતૃત્વ સુરજીત સિંહ ફૂલ (બિનરાજકીય) દ્વારા કરવામાં આવશે. ટીયર ગેસથી બચવા માટે ખેડૂતો ભીના રૂમાલની મદદ લેશે. તેમણે કહ્યું કે સરકાર શું કરશે તે એમણે વિચારવાનું છે. જો સરકાર હજુ પણ તેમને કૂચ કરતા અટકાવશે તો આ તેમનો નૈતિક વિજય ગણાશે. અમે પગપાળા જતા હોઈએ તો ખેડૂતોને રોકવાનું કોઈ કારણ ન હોવું જોઈએ.
શાળાઓ બંધ રાખવાનો આદેશ
અંબાલા જિલ્લા વહીવટીતંત્રે ભારતીય નાગરિક સુરક્ષા સંહિતા (BNSS) ની કલમ 163 હેઠળ એક આદેશ જારી કર્યો છે કે, જિલ્લામાં પાંચ કે તેથી વધુ વ્યક્તિઓની કોઈપણ ગેરકાયદેસર સભા પ્રતિબંધિત છે. ડેપ્યુટી કમિશનર દ્વારા જારી કરાયેલા આદેશ મુજબ, આગામી આદેશો સુધી પગપાળા, વાહન અથવા અન્ય માધ્યમથી કોઈ પણ સરઘસ કાઢવા પર પ્રતિબંધ મૂકવામાં આવ્યો છે, દરમિયાન, વહીવટીતંત્રે ખેડૂતોની રેલીના કારણે આજે અંબાલામાં તમામ શાળાઓને બંધ રાખવાનો આદેશ આપ્યો છે.
દાતાસિંહવાલા બોર્ડર પર સુરક્ષા દળો એલર્ટ
હરિયાણા સરહદ પર બહુસ્તરીય બેરિકેડિંગ ઉપરાંત કેન્દ્રીય અર્ધલશ્કરી દળોને પણ તૈનાત કરવામાં આવ્યા છે. નરવાણા-પટિયાલા નેશનલ હાઈવે પર દાતાસિંહવાલા બોર્ડર પર બેરીકેડ લગાવવામાં આવ્યા છે અને ખેડૂતોને એકઠા થવા પર રોક લગાવી દેવામાં આવી છે નરવાના કેનાલ પૂલ દાતાસિંહવાલા બોર્ડર પર સુરક્ષા દળોની 14 કંપનીઓ તૈનાત કરવામાં આવી છે.
