ટોલ વસૂલાત સિસ્ટમ એક વર્ષમાં બદલાશે, હાઇવે પર મુસાફરી કરતા કરોડો લોકોને રાહત થશે
છેલ્લું અપડેટ : 05 Dec 2025
કેન્દ્રીય માર્ગ પરિવહન મંત્રી નીતિન ગડકરીએ લોકસભાના શિયાળુ સત્ર દરમિયાન એક મહત્ત્વપૂર્ણ જાહેરાત કરી છે, જે હાઇવે પર મુસાફરી કરતા કરોડો લોકો માટે રાહતરૂપ સાબિત થશે. તેમણે કહ્યું છે કે 'હાઇવે પર હાલની ટોલ વસૂલાત સિસ્ટમ આગામી એક વર્ષમાં તબક્કાવાર બંધ કરવામાં આવશે અને તેને સંપૂર્ણપણે ઈલેક્ટ્રોનિક, બેરિયર લેસ ટોલ સિસ્ટમ દ્વારા બદલવામાં આવશે.'
શરૂ થઈ ગયું છે નવી સિસ્ટમનું ટ્રાયલ
લોકસભાના શિયાળુ સત્ર દરમિયાન કેન્દ્રીય મંત્રી નીતિન ગડકરીએ જણાવ્યું કે, 'નવી સિસ્ટમનું ટ્રાયલ 10 સ્થળોએ શરૂ થઈ ગયું છે અને એક વર્ષની અંદર તેને દેશભરમાં લાગુ કરવાનો લક્ષ્યાંક છે.'
હાલમાં FASTagના આવવાથી ટોલ પ્લાઝા પર વાહનોના રોકાણનો સમય ઘટ્યો છે, પરંતુ બેરિયર લેસ સિસ્ટમથી વાહનચાલકોને ટોલ પ્લાઝા પર રોકાવું નહીં પડે. હાલમાં દેશભરમાં લગભગ 4,500 હાઇવે પ્રોજેક્ટ્સ ચાલી રહ્યા છે, જેનો કુલ ખર્ચ આશરે 10 લાખ કરોડ રૂપિયા છે.
NETC અને FASTag
હાઇ-ટેક ટોલ પ્લાઝા તરફનું આ પગલું નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા વિકસાવવામાં આવેલા નેશનલ ઇલેક્ટ્રોનિક ટોલ કલેક્શન (NETC) પ્રોગ્રામનો ભાગ છે. આ એક રાષ્ટ્રવ્યાપી, એકીકૃત અને એકબીજા સાથે જોડાયેલ ઇલેક્ટ્રોનિક ટોલ કલેક્શન પ્લેટફોર્મ છે, જેનો ધ્યેય વિવિધ સિસ્ટમોની ઝંઝટ દૂર કરવાનો છે. આ સિસ્ટમનો મુખ્ય ભાગ FASTag છે, જે RFID ટેકનોલોજીનો ઉપયોગ કરીને યુઝર્સના લિંક્ડ બેન્ક ખાતામાંથી પૈસા કાપે છે.
UPIથી પેમેન્ટ પર દંડમાં ઘટાડો
કેન્દ્ર સરકારે તાજેતરમાં FASTag વગરના વાહનચાલકોને નોંધપાત્ર રાહત પણ આપી હતી. 15મી નવેમ્બરથી, જો કોઈ વાહનમાં FASTag ન હોય અથવા તે કામ કરતું ન હોય, તો રોકડમાં બમણો ટોલ ટેક્સ ચૂકવવાને બદલે, UPIનો ઉપયોગ કરીને ચુકવણી કરવા પર ફક્ત 1.25 ગણો ટોલ ટેક્સ વસૂલવામાં આવશે.
જૂના નિયમ મુજબ, જો કોઈ વાહનમાં ફાસ્ટેગ ન હોય અથવા તે માન્ય ન હોય, તો સામાન્ય ટોલ ફીના બમણા રોકડમાં ચૂકવવા પડતા હતા, જે એક મોટો દંડ માનવામાં આવતો હતો. જોકે, હવે ફાસ્ટેગ વગરના અથવા નિષ્ક્રિય ફાસ્ટેગવાળા વાહનો UPI દ્વારા 1.25 ગણા ટોલ ફી ચૂકવી શકશે. આનો અર્થ એ થયો કે UPI દ્વારા ચુકવણી કરતી વખતે હવે બમણો ટોલ ટેક્સ વસૂલવામાં આવશે નહીં.
