રાહતના સમાચાર: Telegramની ભારતમાં થઈ વાપસી, પણ હજુ 30 જૂન સુધી...!

ભારતમાં લાખો લોકો મેસેજિંગ અને ચેનલ અપડેટ્સ માટે ટેલિગ્રામ (Telegram) નો ઉપયોગ કરે છે. પરંતુ છેલ્લા કેટલાક દિવસોથી NEET પરીક્ષાના કારણે ટેલિગ્રામ યુઝર્સ આ એપનો ઉપયોગ કરી શકતા ન હતા, તેમજ કેટલાક યુઝર્સને તેને ડાઉનલોડ કરવામાં પણ મુશ્કેલી પડી રહી હતી અને અમુક કિસ્સાઓમાં આ એપ એપ સ્ટોર (App Store) અને પ્લે સ્ટોર (Play Store) પર પણ દેખાતી ન હતી. મંગળવારે Telegram પર લાદવામાં આવેલા કામચલાઉ પ્રતિબંધો હટાવી લેવામાં આવ્યા છે, જેના પછી તેની મેસેજિંગ સેવાઓ ફરીથી શરૂ થઈ ગઈ છે. NEET-UG રી-એક્ઝામ (ફરીથી લેવાયેલી પરીક્ષા) દરમિયાન સુરક્ષાના કારણોસર સમગ્ર દેશમાં ટેલિગ્રામને ૨૨ જૂન સુધી બ્લોક કરવામાં આવ્યું હતું. હવે યુઝર્સ Telegram એપને Google Play Store અને Apple App Store પરથી ફરીથી ડાઉનલોડ અને ઇન્સ્ટોલ કરી શકે છે. જોકે, પ્લેટફોર્મ પર મેસેજ અથવા પોસ્ટ એડિટ કરવાની સુવિધા ૩૦ જૂન સુધી બંધ રહેશે.

શું હતો સમગ્ર મામલો?

NEET પરીક્ષા સાથે જોડાયેલા કથિત પેપર લીક મામલામાં તપાસ એજન્સીઓએ કેટલાય ડિજિટલ પ્લેટફોર્મ્સ પર નજર રાખી હતી. આ દરમિયાન ટેલિગ્રામ સાથે જોડાયેલી કેટલીક ચેનલો અને ગ્રુપો પણ તપાસના દાયરામાં આવ્યા હતા. જોકે, હવે સ્થિતિ સ્પષ્ટ થઈ ચૂકી છે અને પ્લેટફોર્મ સામાન્ય રીતે કામ કરી રહ્યું છે. આનાથી એવા વિદ્યાર્થીઓ, કન્ટેન્ટ ક્રિએટર્સ અને બિઝનેસ યુઝર્સને મોટી રાહત મળી છે જેઓ રોજબરોજ Telegramનો ઉપયોગ કરે છે. અહેવાલો અનુસાર, કેટલીક Telegram ચેનલોનો ઉપયોગ પરીક્ષા સંબંધિત માહિતી ફેલાવવા માટે કરવામાં આવ્યો હતો.

આ કારણે લગાવવામાં આવ્યો હતો બેન

ગયા અઠવાડિયે MeitY (ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રાલય) એ સાવચેતીના ભાગરૂપે ભારતમાં Telegram પર કામચલાઉ પ્રતિબંધ લગાવી દીધો હતો. આ નિર્ણય NEET ની રી-એક્ઝામ પહેલાં લેવામાં આવ્યો હતો જેથી પરીક્ષા સંબંધિત કોઈ પણ ખોટી માહિતી ફેલાતી અટકાવી શકાય. સરકારનો આરોપ હતો કે Telegram પર NEET રી-એક્ઝામ સાથે જોડાયેલા ફેક (નકલી) પ્રશ્નપત્રો, ભ્રામક માહિતી અને અન્ય છેતરપિંડીભરી પ્રવૃત્તિઓ ફેલાઈ રહી હતી. આ જ કારણે પ્લેટફોર્મ પર આ કાર્યવાહી કરવામાં આવી હતી. Telegram પર બેન લગાવતા પહેલાં ૩ જૂને સરકારી અધિકારીઓએ Telegramના પ્રતિનિધિઓ સાથે બેઠક પણ કરી હતી.

આ બેઠક દરમિયાન પ્લેટફોર્મ પર ફેલાઈ રહેલી ખોટી માહિતી અને ફેક કન્ટેન્ટ અંગે ચિંતા વ્યક્ત કરવામાં આવી હતી. ત્યારબાદ કેન્દ્ર સરકારે ટેલિગ્રામ એપ, તેની સાથે જોડાયેલી વેબ લિંક્સ અને તેના વેબ વર્ઝનને પણ ૨૨ જૂન સુધી બ્લોક કરવાનો નિર્ણય લીધો હતો. NEET રી-એક્ઝામ ૨૧ જૂને સફળતાપૂર્વક આયોજિત કરવામાં આવી હતી. રાહતની વાત એ રહી કે પરીક્ષા દરમિયાન અત્યાર સુધી કોઈ પણ પ્રકારની છેતરપિંડી, નકલી પેપર કે ખોટી પ્રવૃત્તિનો કોઈ અહેવાલ સામે આવ્યો નથી.

Telegramના CEOએ આ બેનનો વિરોધ કર્યો હતો

ટેલિગ્રામના સ્થાપક અને CEO પાવેલ ડુરોવ (Pavel Durov)એ પ્લેટફોર્મ પર એક અઠવાડિયાના બેન લગાવવાના સરકારના નિર્ણયની આલોચના કરી હતી. તેમણે સોશિયલ મીડિયા પ્લેટફોર્મ X પર એક પોસ્ટમાં જણાવ્યું હતું કે, કેટલાક લોકો દ્વારા કથિત રીતે લીક થયેલા પરીક્ષાના પેપરો શેર કરવાના કારણે આખા ટેલિગ્રામ પ્લેટફોર્મ પર પ્રતિબંધ મૂકવો યોગ્ય નથી. ડુરોવનું કહેવું હતું કે આ નિર્ણયથી ભારતના 15 કરોડથી વધુ કાયદેસરના ટેલિગ્રામ યુઝર્સ પ્રભાવિત થયા, જ્યારે કાર્યવાહી તે લોકો પર થવી જોઈતી હતી જેઓ પરીક્ષા સંબંધિત કન્ટેન્ટ લીક કરવા અથવા ફેલાવવા માટે જવાબદાર હતા. તેમણે ઉમેર્યું કે કેટલાક લોકોની ભૂલની સજા લાખો સામાન્ય યુઝર્સને ન મળવી જોઈએ.