ગુજરાત બાદ બુલેટ ટ્રેનના બીજા ફેઝની જાહેરાત, દેશમાં જાણો ક્યાંથી ક્યાં દોડશે ટ્રેન

દિલ્હીથી કાશીનો પ્રવાસ સાડા ત્રણ કલાકમાં કરવાનો લક્ષ્યાંક

રેલવે મંત્રી અશ્વિની વૈષ્ણવે 31 ઑક્ટોબરે આપેલી માહિતી અનુસાર, પ્રસ્તાવિત નોર્ધર્ન બુલેટ ટ્રેન કોરિડોર દિલ્હીથી શરૂ થઈને આગ્રા, કાનપુર, લખનઉ, અયોધ્યા અને વારાણસી સુધી જશે. આ નેટવર્કને આગળ પટના, સિલીગુડી થઈ ગુવાહાટી સુધી લંબાવવાની યોજના પણ જણાવાઈ છે. મંત્રીના જણાવ્યા મુજબ, આ કોરિડોરને વડાપ્રધાન નરેન્દ્ર મોદીની મંજૂરી મળી છે. પ્રસ્તાવિત સમયપત્રક મુજબ, દિલ્હીથી આગ્રા માત્ર 59 મિનિટમાં, કાનપુર 1 કલાક 45 મિનિટમાં અને લખનઉ 2 કલાક 12 મિનિટમાં પહોંચી શકાશે. વારાણસીથી લખનઉનું અંતર 1 કલાક 21 મિનિટમાં, જ્યારે વારાણસીથી પટના માત્ર એક કલાકમાં કાપી શકાશે. દિલ્હીથી વારાણસીની મુસાફરી માટે 3 કલાક 33 મિનિટનો સમય દર્શાવવામાં આવ્યો છે.

મુસાફરીના સમયમાં મોટો ઘટાડો થવાની શક્યતા

આ હાઇસ્પીડ રેલ નેટવર્ક શરૂ થયા બાદ નોકરી, શિક્ષણ, વેપાર અને સારવાર માટે એક શહેરથી બીજા શહેરમાં જતા મુસાફરોને મોટો ફાયદો થઈ શકે છે. ખાસ કરીને ઉત્તર પ્રદેશ, બિહાર અને આસામ સહિતના વિસ્તારોના મુસાફરોને હવાઈ મુસાફરીના વિકલ્પ તરીકે ઝડપી રેલ સેવા ઉપલબ્ધ થવાની આશા છે. રેલવે મંત્રીના જણાવ્યા મુજબ, આ પ્રોજેક્ટથી મધ્યમ વર્ગનાં પરિવારો, યુવાનો, નાના વેપારીઓ અને ઉદ્યોગોને પણ લાભ મળશે. જોકે, આ સમયગાળા પ્રસ્તાવિત મુસાફરીના અંદાજ છે; વાસ્તવિક સેવા શરૂ થયા બાદ સમય અને સ્ટેશનોની વિગતો નક્કી થશે.

મુંબઈ-અમદાવાદ બુલેટ ટ્રેન પ્રોજેક્ટમાંથી મળશે અનુભવ

દેશમાં હાલમાં મુંબઈ-અમદાવાદ હાઇસ્પીડ રેલ કોરિડોરનું કામ ચાલી રહ્યું છે. 508 કિલોમીટરના આ પ્રોજેક્ટમાં 12 સ્ટેશનનું આયોજન છે. સરકારી માહિતી મુજબ, આ રૂટ પર પ્રથમ બુલેટ ટ્રેન સેવા ઑગસ્ટ 2027 સુધીમાં શરૂ કરવાનો લક્ષ્યાંક છે. આ પ્રોજેક્ટના અનુભવના આધારે દેશના અન્ય હાઇસ્પીડ રેલ કોરિડોરને આગળ વધારવાની યોજના છે. 2026-27ના કેન્દ્રીય બજેટમાં દિલ્હી-વારાણસી અને વારાણસી-પટના-સિલીગુડી સહિત સાત હાઇસ્પીડ રેલ કોરિડોરની જાહેરાત કરવામાં આવી હતી.

દિલ્હી-વારાણસીના સમય અંગે સરકારી અંદાજ અલગ

નોંધનીય છે કે કેન્દ્રીય રેલવે મંત્રાલયે ફેબ્રુઆરી 2026માં દિલ્હીથી વારાણસીની મુસાફરી માટે આશરે 3 કલાક 50 મિનિટનો અંદાજ આપ્યો હતો. જ્યારે 31 ઑક્ટોબરે રેલવે મંત્રી દ્વારા જણાવવામાં આવેલો નવો અંદાજ 3 કલાક 33 મિનિટનો છે. આથી પ્રોજેક્ટની અંતિમ વિગત અને સમયમર્યાદા અંગે સત્તાવાર સ્પષ્ટતા મહત્વપૂર્ણ રહેશે.આ રીતે, નોર્ધન બુલેટ ટ્રેન કોરિડોર સાકાર થાય તો ઉત્તર અને પૂર્વ ભારતના શહેરો વચ્ચેની કનેક્ટિવિટીમાં મોટો ફેરફાર આવી શકે છે. જોકે, પ્રોજેક્ટની અંતિમ મંજૂરી, બાંધકામ અને કામગીરી શરૂ થવાની સમયમર્યાદા અંગે વધુ વિગતોની રાહ જોવી પડશે.