LPG સિલિન્ડરની અછતને લઈ ચિંતા કરવાની જરૂર નથી: મિડલ ઈસ્ટ સંકટ વચ્ચે કેન્દ્ર સરકારનું મોટું આશ્વાસન

મિડલ ઈસ્ટમાં ચાલી રહેલા યુદ્ધના કારણે વૈશ્વિક એનર્જી માર્કેટમાં અસ્થિરતા સર્જાઈ છે. ભારત પર તેની અસર અને ઈંધણની સંભવિત અછતની ચર્ચાઓ વચ્ચે કેન્દ્રીય મંત્રી પીયૂષ ગોયલે દેશવાસીઓને મોટું આશ્વાસન આપ્યું છે. તેમણે સ્પષ્ટ કર્યું છે કે ભારતમાં ઈંધણ કે LPGની કોઈ જ અછત નથી.

સરકારની સ્થિતિ પર ચાંપતી નજર

તિરુચિરાપલ્લીમાં મીડિયા સાથે વાત કરતા પીયૂષ ગોયલે જણાવ્યું હતું કે, "દેશમાં ઈંધણનો પૂરતો જથ્થો ઉપલબ્ધ છે અને અછત જેવી કોઈ સ્થિતિ નથી. સરકાર આંતરરાષ્ટ્રીય પરિસ્થિતિ પર સતત નજર રાખી રહી છે અને સંબંધિત વિભાગો સમયાંતરે સ્થિતિની સમીક્ષા કરી રહ્યા છે જેથી સપ્લાય ચેઈન ખોરવાય નહીં."

સરકારે એસેન્શિયલ કોમોડિટી એક્ટ (EC Act) લાગુ કર્યો

વધતા વૈશ્વિક દબાણ અને સપ્લાયમાં આવતા અવરોધોને જોતા, કેન્દ્ર સરકારે સાવચેતીના ભાગરૂપે 'આવશ્યક ચીજવસ્તુ ધારો' (EC Act) લાગુ કર્યો છે. પેટ્રોલિયમ મંત્રાલયે તમામ રિફાઇનરીઓને આદેશ આપ્યો છે કે તેઓ મહત્તમ LPGનું ઉત્પાદન કરે અને હાઇડ્રોકાર્બનનો પ્રવાહ પણ LPG પૂલ તરફ વાળે, જેથી ઘરગથ્થુ રસોઈ ગેસનો સપ્લાય જળવાઈ રહે.

કોને કેટલી પ્રાધાન્યતા મળશે?

નવા ફ્રેમવર્ક મુજબ, ઘરેલું ગ્રાહકોને ગેસ વિતરણમાં ટોચની અગ્રતા આપવામાં આવી છે. ઘરોમાં પાઈપ્ડ નેચરલ ગેસ (PNG) અને વાહનો માટે CNGનો 100% સપ્લાય સુનિશ્ચિત કરવામાં આવ્યો છે. ટી-પ્રોસેસિંગ અને મેન્યુફેક્ચરિંગ યુનિટ્સને તેમના સરેરાશ વપરાશના 80% સપ્લાય મળશે. ખાતરના પ્લાન્ટ્સને તેમના પાછલા 6 મહિનાના સરેરાશ વપરાશના 70% ગેસ ફાળવવામાં આવશે.

શા માટે ઉભી થઈ ચિંતા?

ભારતની જરૂરિયાતનો આશરે 30% ગેસ 'સ્ટ્રેટ ઓફ હોર્મુઝ' (Strait of Hormuz) દ્વારા આયાત કરવામાં આવે છે. વર્તમાન ભૌગોલિક તણાવને કારણે આ રસ્તા પર ટ્રાફિક અને લોજિસ્ટિક્સ પડકારો ઉભા થયા છે. જોકે, સરકાર હવે અન્ય વિકલ્પો અને વેપારના રસ્તાઓ પણ શોધી રહી છે જેથી લાંબા ગાળે કોઈ સમસ્યા ન સર્જાય.