જમ્મુ-કાશ્મીરમાં ફેલાઇ રહસ્યમય બીમારી, અત્યાર સુધીમાં 14 લોકોના મોત

જમ્મુ-કાશ્મીરના કેન્દ્રશાસિત પ્રદેશ રાજૌરીમાંથી એક ચોંકાવનારો કિસ્સો સામે આવ્યો છે. અહીંના બાધલ ગામમાં રહસ્યમય બીમારીને કારણે અત્યાર સુધીમાં 14 લોકોના મોત થઈ ગયાં છે. આ મૃત્યુ છેલ્લા 30 દિવસમાં થયા છે અને મૃત્યુ પામેલાઓમાં ત્રણ પરિવારોના 11 બાળકો અને ત્રણ પુખ્ત વયના લોકોનો સમાવેશ થાય છે. આ બનાવથી બાધલ ગામ અને આસપાસના વિસ્તારના લોકોમાં ભયનો માહોલ ફેલાયો છે. સરકારે આ મામલાની તપાસ માટે આરોગ્ય ટીમો તૈનાત કરી છે.

આ  પણ વાંચો : આજે PM મોદી રાષ્ટ્રને 3 અગ્રણી યુદ્ધ જહાજો કરશે સમર્પિત, ભારતીય નૌકાદળની વધશે તાકાત 

શું છે સમગ્ર મામલો?

હકીકતમાં, છેલ્લા 30 દિવસમાં રાજૌરીના કોતરંકા સબ-ડિવિઝનના બધાલ ગામમાં ત્રણ પરિવારના 11 બાળકો અને ત્રણ પુખ્ત વયના લોકોના મોત થયા છે. અધિકારીઓના જણાવ્યા અનુસાર, સરકારે આરોગ્યની ટીમોને ઓળખવા, નમૂના એકત્રિત કરવા અને સંભવિત સ્વાસ્થ્ય જોખમોને સંબોધવા માટે આ વિસ્તારમાં તૈનાત કરી છે.

એક પછી એક મોતના કારણે ભય ફેલાયો 

મળતી માહિતી મુજબ સફીના કૌસરનું જમ્મુની એક હોસ્પિટલમાં મૃત્યુ થયું હતું. પછી બે દિવસમાં તેના અન્ય ત્રણ ભાઈ-બહેનો પણ મૃત્યુ પામ્યા. બે લોકો હજુ પણ મોત સાથે જંગ લડી રહ્યા છે. સોમવારે તેના દાદા મોહમ્મદ રફીકનું રાજૌરીની એક હોસ્પિટલમાં અવસાન થયું હતું. ગયા મહિનાની શરૂઆતમાં ગામમાં બે પરિવારના નવ લોકોના મોત થયા હતા. પ્રાથમિક તબક્કે એવું લાગતું હતું કે આ મૃત્યુ ફૂડ પોઈઝનિંગના કારણે થયા છે. જો કે, મોટાભાગના ગ્રામજનોએ સમાન લક્ષણોની ફરિયાદ કરતા પરિસ્થિતિ ગંભીર માનવામાં આવી હતી. આ પછી સરકારે આ મામલે હસ્તક્ષેપ કર્યો અને દેશની ઘણી આરોગ્ય સંસ્થાઓમાંથી નિષ્ણાતોને બોલાવવામાં આવ્યા.

શું કહે છે ડોકટરો?

ગયા મહિને જમ્મુની સરકારી મેડિકલ કોલેજ હોસ્પિટલના એક ડૉક્ટરે કહ્યું હતું કે પ્રાથમિક તપાસ મુજબ રહસ્યમય મૃત્યુનું કારણ વાયરલ ઇન્ફેક્શન હતું. જો કે, ડૉક્ટરે એમ પણ કહ્યું કે અંતિમ નિર્ણય પર પહોંચવા માટે વધુ અભ્યાસની જરૂર છે. પુણેના રાષ્ટ્રીય વાયરસ વિજ્ઞાન સંસ્થા, PGI ચંદીગઢ, AIIMS દિલ્હી અને નેશનલ સેન્ટર ફોર ડિસીઝ કંટ્રોલ (NCDC), દિલ્હીના નિષ્ણાતોની ટીમે પણ કેસની તપાસમાં મદદ કરવા ગામની મુલાકાત લીધી છે.