સ્થાનિક સ્વરાજ્યની ચૂંટણીમાં મોટો ઉલટફેર, 36 વર્ષ પછી અજમેરમાં કૉંગ્રેસનો ઐતિહાસિક વિજય

રાજસ્થાનમાં સ્થાનિક સ્વરાજ્યની સંસ્થાઓની ચૂંટણીના સોમવારે જાહેર થયેલા પરિણામોએ રાજ્યના શહેરી રાજકારણમાં મોટો ઉલટફેર સર્જ્યો છે. સત્તાધારી ભારતીય જનતા પાર્ટી અને વિરોધ પક્ષ કૉંગ્રેસ બંને માટે આ પરિણામો મિશ્ર સાબિત થયા છે. એક તરફ ભાજપે જયપુર, કોટા અને અલવર જેવા મુખ્ય શહેરોમાં પોતાની સરસાઈ જાળવી રાખી છે, તો બીજી તરફ કૉંગ્રેસે 36 વર્ષ પછી ભાજપના ગઢ ગણાતા અજમેરમાં ઐતિહાસિક વિજય મેળવીને સૌને ચોંકાવી દીધા છે.

રાત્રે 8.30 વાગ્યા સુધીમાં જાહેર થયેલા 10,244 વોર્ડ પૈકીના 10,235 વોર્ડના પરિણામો મુજબ ભાજપ 4,179 બેઠકો સાથે આગળ રહ્યું છે, જ્યારે કૉંગ્રેસે 3,613 બેઠકો જીતી છે. આ ચૂંટણીમાં અપક્ષ ઉમેદવારોએ પણ મોટો પ્રભાવ પાડતાં 2,273 બેઠકો પોતાના નામે કરી છે. બાકીની બેઠકો RLP, BSP, BAP, CPIM અને આમ આદમી પાર્ટી જેવા નાના પક્ષોના ફાળે ગઈ છે.

10 મહાનગરપાલિકાઓમાં ભાજપ અને કોંગ્રેસ વચ્ચે કાંટાની ટક્કર

રાજસ્થાનની 10 મ્યુનિસિપલ કોર્પોરેશનોમાં ભાજપ અને કૉંગ્રેસ વચ્ચે કાંટાની ટક્કર જોવા મળી છે.

ભાજપનું વર્ચસ્વ

ભાજપ જયપુર, કોટા અને અલવરમાં સૌથી મોટા પક્ષ તરીકે ઉભરી આવ્યો છે. જ્યારે ઉદયપુર અને ભીલવાડામાં ભાજપે સ્પષ્ટ બહુમતી હાંસલ કરી લીધી છે.

વસુંધરા રાજેના ગઢમાં કોંગ્રેસની જીત

બીકાનેરમાં કૉંગ્રેસે સ્પષ્ટ બહુમતી મેળવી છે, જ્યારે અજમેર અને પાલીમાં કૉંગ્રેસ સૌથી મોટો પક્ષ બન્યો છે. પૂર્વ મુખ્યમંત્રી વસુંધરા રાજેના ગૃહ નગર ઝાલાવાડમાં પણ કૉંગ્રેસે વિજય મેળવ્યો છે.

જોધપુરમાં ભાજપ અને કોંગ્રેસ વચ્ચે ટાઈ

ભરતપુરમાં અપક્ષ ઉમેદવારોનું સૌથી મજબૂત પ્રદર્શન રહ્યું છે, જ્યારે જોધપુરમાં ભાજપ અને કૉંગ્રેસ વચ્ચે લગભગ સરખી બેઠકો સાથે ટાઈ જેવી સ્થિતિ સર્જાઈ છે.

અજમેરમાં 36 વર્ષ પછી ભાજપનો પરાજય

રાજ્ય ચૂંટણી પંચના આંકડા મુજબ, અજમેરમાં ભાજપ 36 વર્ષ પછી ચૂંટણી હારી ગયું છે. અજમેરના 80 વોર્ડમાંથી કૉંગ્રેસે 37 બેઠકો જીતીને સૌથી મોટો પક્ષ બનવાનું ગૌરવ મેળવ્યું છે, જ્યારે ભાજપને 32 અને અપક્ષોને 11 બેઠકો મળી છે. ગત ચૂંટણીમાં ભાજપને 48 બેઠકો મળી હતી અને કૉંગ્રેસ માત્ર 18 બેઠકો પર અટકી ગઈ હતી.

જયપુરમાં ભાજપ બહુમતીથી માત્ર 1 બેઠક દૂર, પૂર્વ મેયરની હાર

જયપુર મહાનગરપાલિકાના 150 વોર્ડમાં ભાજપ સ્પષ્ટ બહુમતીથી માત્ર એક બેઠક છેટું રહી ગયું છે. ભાજપે 75 વોર્ડમાં જીત મેળવી છે, જ્યારે કૉંગ્રેસને 50 અને અપક્ષોને 12 બેઠકો મળી છે.

પૂર્વ મેયરની હાર: કૉંગ્રેસ છોડીને ભાજપની ટિકિટ પર લડેલા જયપુરના પૂર્વ મેયર જ્યોતિ ખંડેલવાલ કૉંગ્રેસના ઉમેદવાર સુનિતા મેથી સામે હારી ગયા છે.

મેયર પદના દાવેદારની જીત: ભાજપના સુનિલ કોઠારી, જેમને મેયર પદના પ્રબળ દાવેદાર માનવામાં આવે છે, તેઓ પોતાની બેઠક જીતી ગયા છે.

રાજસ્થાનની જનતાએ 'વિકસિત ભારત-વિકસિત રાજસ્થાન'ના સંકલ્પને સ્વીકાર્યો છે. આ પરિણામો ભાજપના શાસન અને વિકાસ એજન્ડામાં જનતાના વધતા વિશ્વાસને દર્શાવે છે.

— ભજનલાલ શર્મા, મુખ્યમંત્રી, રાજસ્થાન

આ ચૂંટણીએ દર્શાવી દીધું છે કે જે તફાવત અગાઉ લગભગ આઠ ટકા જેટલો રહેતો હતો, તે હવે ઘટીને માત્ર એક ટકાની આસપાસ આવી ગયો છે.

— ગોવિંદ સિંહ ડોટાસરા, પ્રદેશ પ્રમુખ, કૉંગ્રેસ

ડિડવાના-કુચામન જિલ્લાની પરબતસર નગરપાલિકાના વોર્ડ 13 માંથી લડનારા ભાજપના ઉમેદવાર કૈલાશચંદને ફક્ત 1 જ મત મળ્યો હતો.
નાગૌર જિલ્લાની રિયાંબડી નગરપાલિકાના વોર્ડ 15 માંથી ચૂંટણી લડનારા કૉંગ્રેસના ઉમેદવારને પણ માત્ર 1 જ મત મળ્યો હતો.