કર્ણાટક: રોડ અકસ્માતમાં વરિષ્ઠ IAS અધિકારી સહિત ત્રણ લોકોના મોત

કર્ણાટકના કલબુર્ગી જિલ્લામાં એક માર્ગ અકસ્માત થયો હતો. આ ઘટનામાં રાજ્યના વરિષ્ઠ IAS અધિકારી મહંતેશ બિલગી સહિત ત્રણ લોકોના મોત થયા છે. મહંતેશ બિલગી કર્ણાટક રાજ્ય ખનિજ નિગમના મેનેજિંગ ડિરેક્ટર તરીકે સેવા આપતા હતા. તેઓ એક પારિવારિક લગ્નમાં હાજરી આપવા માટે રામદુર્ગથી કલબુર્ગી જઈ રહ્યા હતા ત્યારે તેમની કાર અકસ્માતનો ભોગ બની હતી.

કાર પલટી જતા મોત મળી

મળતા અહેવાલ મુજબ, વરિષ્ઠ IAS અધિકારી મહંતેશ બિલગી, તેમના ભાઈ અને અન્ય એક વ્યક્તિ સાથે, બેલગાવી જિલ્લાના રામદુર્ગથી કલબુર્ગી જઈ રહ્યા હતા, જ્યાં તેઓ એક પારિવારિક લગ્નમાં હાજરી આપવા માટે જઈ રહ્યા હતા. જેવરગી તાલુકાના ગૌનાલી ક્રોસ પાસે અચાનક એક કૂતરો તેમની કારની સામે આવી ગયો. કૂતરાને બચાવવાનો પ્રયાસ કરતી વખતે, ડ્રાઇવરે કાબુ ગુમાવ્યો અને કાર પલટી ગઈ. આ અકસ્માતમાં મહંતેશ બિલગી, તેમના ભાઈ શંકર બિલગી અને ઈરન્ના શિરાસાંગીનું મોત થયું છે.

ડીકે શિવકુમારે શોક વ્યક્ત કર્યો

વરિષ્ઠ IAS અધિકારી મહંતેશ બિલગીના નિધનના સમાચાર મળતાં જ વહીવટી વર્તુળોમાં શોક ફેલાઈ ગયો. નાયબ મુખ્યમંત્રી ડીકે શિવકુમારે પણ સોશિયલ મીડિયા પર એક પોસ્ટમાં મહંતેશ બિલગીના નિધન પર શોક વ્યક્ત કર્યો હતો.

મળતી માહિતી પ્રમાણે IAS અધિકારી મહંતેશ બિલગીના ભાઈ શંકર બિલગી અને ઈરન્ના શિરાસાંગીનું ઘટનાસ્થળે જ મોત થયું હતુ. જ્યારે મહંતેશ બિલગીને કલબુર્ગીની એક ખાનગી હોસ્પિટલમાં દાખલ કરવામાં આવ્યા હતા, ત્યારે ડોકટરો તેમને બચાવી શક્યા ન હતા.

મહંતેશ 2012 બેચના IAS અધિકારી હતા

મહંતેશ બિલગીનો જન્મ 27 માર્ચ, 1974ના રોજ થયો હતો અને તેઓ 2012 બેચના કર્ણાટક કેડરના અધિકારી હતા. તેમણે કર્ણાટક રાજ્ય ખનિજ નિગમના મેનેજિંગ ડિરેક્ટર તરીકે સેવા આપી હતી. આ પહેલા, તેમણે BESCOM ના મેનેજિંગ ડિરેક્ટર તરીકે પણ સેવા આપી હતી. તેમણે દાવણગેરે અને ઉડુપી જેવા જિલ્લાઓમાં પણ IAS અધિકારી તરીકેની સેવા આપી હતી.