લોકસભાના પૂર્વ સ્પીકર મીરા કુમાર ૩૦ ઓક્ટોબરે CEC સામે ઇન્ડિયા ગઠબંધનના 'જાહેર મહાભિયોગ' (પબ્લિક ઇમ્પીચમેન્ટ) ની અધ્યક્ષતા કરશે

મુખ્ય ચૂંટણી કમિશનર (CEC) જ્ઞાનેશ કુમાર સામે INDIA ગઠબંધન દ્વારા 30 ઓક્ટોબરે ‘જાહેર મહાભિયોગ’ કાર્યક્રમ યોજવામાં આવશે. લોકસભાનાં પૂર્વ સ્પીકર મીરા કુમાર આ કાર્યક્રમની અધ્યક્ષતા કરશે. દિલ્હી પોલીસે હોટેલ અશોક અને રામલીલા મેદાનમાં કાર્યક્રમ યોજવાની મંજૂરી ન આપતાં હવે કોંગ્રેસ અધ્યક્ષ મલ્લિકાર્જુન ખડગેના સત્તાવાર નિવાસસ્થાને તેનું આયોજન કરવામાં આવ્યું છે. આ કાર્યક્રમમાં વિવિધ રાજકીય પક્ષો અને સિવિલ સોસાયટીના પ્રતિનિધિઓ ભાગ લેશે. મતદાર યાદીઓની સ્પેશિયલ ઇન્ટેન્સિવ રિવિઝન (SIR) પ્રક્રિયાથી પ્રભાવિત થયેલા લોકો પણ પોતાની વાત રજૂ કરશે. ગુરુવારે ખડગેના નિવાસસ્થાને યોજાયેલી INDIA ગઠબંધનના નેતાઓની બેઠકમાં આ નિર્ણય લેવામાં આવ્યો હતો. બેઠકમાં કોંગ્રેસ સાંસદ પ્રિયંકા ગાંધી વાડ્રા, જયરામ રમેશ અને CPI(M)ના સાંસદ જોન બ્રિટાસ સહિતના નેતાઓ હાજર રહ્યા હતા.

‘માત્ર પ્રતીકાત્મક કવાયત નહીં, લોકોના આક્રોશનું પ્રતિબિંબ’

બેઠક બાદ CPI(M)ના સાંસદ જોન બ્રિટાસે જણાવ્યું કે આ કાર્યક્રમને માત્ર પ્રતીકાત્મક કે મોક કવાયત તરીકે નહીં, પરંતુ ‘જાહેર મહાભિયોગ’ તરીકે યોજવાનો નિર્ણય લેવામાં આવ્યો છે. તેમના જણાવ્યા અનુસાર, આ કાર્યક્રમ ચૂંટણી પ્રક્રિયા અંગે લોકોના આક્રોશ અને તેમની અપેક્ષાઓને રજૂ કરશે. મહાભિયોગ દરમિયાન સત્તાપક્ષની બેઠકો પર કોણ બેસશે તેવા સવાલના જવાબમાં બ્રિટાસે કહ્યું કે કોઈ પણ તે બેઠકો પર બેસવા માગતું નથી, કારણ કે તેને મુખ્ય ચૂંટણી કમિશનરના સમર્થન તરીકે જોવામાં આવી શકે છે.

‘ચૂંટણી ગેરરીતિઓ સામે લડત ચાલુ રહેશે’: ખડગે

કોંગ્રેસ અધ્યક્ષ મલ્લિકાર્જુન ખડગેએ જણાવ્યું કે કથિત ચૂંટણી ગેરરીતિઓ સામે વિપક્ષનું આંદોલન ચાલુ રહેશે. તેમણે મુખ્ય ચૂંટણી કમિશનર જ્ઞાનેશ કુમાર પર ખોટું કામ કરવાનો આરોપ પણ લગાવ્યો હતો. ખડગેએ કહ્યું, “અમે લડીશું, કારણ કે લોકશાહીમાં જ્યાં સુધી તમે લડશો નહીં, ત્યાં સુધી લોકો જાગૃત થશે નહીં.” કોંગ્રેસ સાંસદ ગૌરવ ગોગોઈએ જણાવ્યું કે આ કાર્યક્રમનો હેતુ મતદાર યાદીઓમાં રહેલી કથિત વિસંગતતાઓ અને મત ચોરીના આરોપો અંગે ચિંતા વ્યક્ત કરવાનો છે. સાથે જ મતદાનના અધિકારોની રક્ષા માટે વિપક્ષી એકતા દર્શાવવાનો પણ પ્રયાસ કરવામાં આવશે.

1 નવેમ્બરે દિલ્હીમાં વિપક્ષની રેલી

આ કાર્યક્રમ 1 નવેમ્બરે દિલ્હીમાં યોજાનારી વિપક્ષની રેલી પહેલાં યોજાઈ રહ્યો છે. INDIA ગઠબંધનનો આરોપ છે કે મતદાર યાદીઓમાં સુધારાની પ્રક્રિયા અને કથિત ‘મત ચોરી’ના મુદ્દે ગંભીર ચિંતાઓ ઊભી થઈ છે. વિપક્ષ આ મુદ્દે ચૂંટણી પ્રક્રિયાની પારદર્શિતા અને મતદારોના અધિકારોનો પ્રશ્ન ઉઠાવી રહ્યું છે.