'અર્નબ' વાવાઝોડાએ મચાવ્યો હાહાકાર: 300 ગામો જળમગ્ન, લોકોને બચાવવા સેના હેલિકોપ્ટર ઉતારશે?!
ઓડિશામાં 'અર્નબ' વાવાઝોડાના લીધે થઈ રહેલા મુશળધાર વરસાદે ભારે અફરાતફરી મચાવી દીધી છે. રાજ્યના ગંજમ જિલ્લામાં સ્થિતિ અત્યંત ગંભીર બની ગઈ છે, જ્યાં આશરે 300 જેટલા ગામો પૂરમાં ગરકાવ થઈ ગયા છે. આ ગામોમાં અટવાયેલા લોકોને સુરક્ષિત રીતે બહાર કાઢવા માટે રાજ્ય સરકાર હવાઈ મદદ (એરલિફ્ટ) લેવાની તૈયારી કરી રહી છે અને આ માટે કેન્દ્રીય ગૃહ મંત્રાલય સાથે સતત સંપર્કમાં છે. પરંતુ સતત વરસાદ અને આકાશમાં નીચે સુધી છવાયેલા ઘેરા વાદળોના કારણે હેલિકોપ્ટર દ્વારા કરવામાં આવતા બચાવ કાર્યમાં વિલંબ થવાની શક્યતા છે.
ઋષિકુલ્યા નદીના પાણી ગામોમાં ફરી વળ્યા, સોરડા અને અસ્કામાં ભયજનક સ્થિતિ
ગંજમ જિલ્લામાં છેલ્લા ત્રણ દિવસથી સતત પડી રહેલા ધોધમાર વરસાદના કારણે ઋષિકુલ્યા નદીના જળસ્તરમાં ભયજનક વધારો થયો છે. નદીના પાણી આસપાસના ગામો અને શહેરોમાં ફરી વળ્યા છે. ખાસ કરીને સોરડા વિસ્તારમાં પૂરની સૌથી વધુ વિપરીત અસર જોવા મળી રહી છે. આ સિવાય અસ્કા વિસ્તારમાં પણ ઋષિકુલ્યા નદી ખતરાના નિશાન નજીક વહી રહી છે. જો આગામી કલાકોમાં પણ વરસાદ ચાલુ રહેશે, તો આ વિસ્તારોમાં પરિસ્થિતિ વધુ વિકટ બની શકે છે.
રસ્તાઓ બંધ થતાં રાહત ટીમ સામે પડકાર, એર લિફ્ટ સિવાય વિકલ્પ નથી
300 જેટલા ગામો ચો તરફથી પૂરના પાણીથી ઘેરાઈ જવાથી ત્યાં સુધી પહોંચવાના તમામ રસ્તાઓ બંધ થઈ ગયા છે. જેના કારણે NDRF અને સ્થાનિક બચાવ ટુકડીઓને પૂરથી પ્રભાવિત લોકો સુધી પહોંચવામાં ભારે મુશ્કેલીઓનો સામનો કરવો પડી રહ્યો છે. જે વિસ્તારોમાં માર્ગ માર્ગે પહોંચવું અશક્ય બન્યું છે, ત્યાં એર લિફ્ટ જ એકમાત્ર આશાનું કિરણ છે.
ખરાબ હવામાન એર-રેસ્ક્યુ ઓપરેશનમાં મુશ્કેલી ઊભી કરશે
મુખ્ય સચિવ અનુ ગર્ગના જણાવ્યા અનુસાર, સરકારની પ્રથમ પ્રાથમિકતા પૂરમાં અટવાયેલા લોકોને સુરક્ષિત સ્થળે પહોંચાડવાની છે. પરંતુ સતત પડી રહેલો વરસાદ અને વાદળછાયું વાતાવરણ હેલિકોપ્ટરના ઉડ્ડયન માટે જોખમી બની શકે છે. તેથી હવામાનની સ્થિતિને ધ્યાનમાં રાખીને જ તબક્કાવાર બચાવ કામગીરી હાથ ધરવામાં આવશે. હાલમાં સમગ્ર ગંજમ જિલ્લા વહીવટીતંત્ર નદીના જળસ્તર અને વરસાદની પળેપળની સ્થિતિ પર નજર રાખી રહ્યું છે.
