‘લાઠીઓથી ડરશો નહીં, ભાજપ હિંમત નહીં કરે’: રાહુલ ગાંધીની વિદ્યાર્થીઓને ‘ચલો દિલ્હી’ રેલીમાં જોડાવા અપીલ

લોકસભામાં વિપક્ષના નેતા રાહુલ ગાંધીએ દેશભરના વિદ્યાર્થીઓને ઇન્ડિયા ગઠબંધનની ‘ચલો દિલ્હી રામલીલા માર્ચ’માં જોડાવા અપીલ કરી છે. તેમણે પોલીસ અને લાઠીઓથી ડર્યા વિના બંધારણ અને દેશની રક્ષા માટે સાથે આવવા જણાવ્યું છે. આ રેલી 1 નવેમ્બરે દિલ્હીના રામલીલા મેદાનમાં યોજાવાની છે. વિપક્ષ મુખ્ય ચૂંટણી કમિશનર જ્ઞાનેશ કુમારને પદ પરથી હટાવવાની માગ અને મતદાર યાદીઓના વિશેષ સઘન પુનરીક્ષણ (SIR) સામે વિરોધ તેજ કરવાની તૈયારીમાં છે.

‘તમારી અભિવ્યક્તિ અને વિચારો પર હુમલો થઈ રહ્યો હોય તો જોડાઓ’

રાહુલ ગાંધીએ ગુરુવારે સોશિયલ મીડિયા પ્લેટફોર્મ એક્સ પર વીડિયો સંદેશ શેર કરીને વિદ્યાર્થીઓ અને વિવિધ વિદ્યાર્થી સંગઠનોને રેલીમાં જોડાવા અપીલ કરી હતી. તેમણે કહ્યું કે પોલીસની ચિંતા કરવાની કે લાઠીઓથી ડરવાની જરૂર નથી. તેમના દાવા મુજબ, ભાજપ આવું કરવાની હિંમત નહીં કરે. રાહુલ ગાંધીએ કહ્યું કે આ કોઈ એક રાજકીય પક્ષનો વિરોધ નથી, પરંતુ દેશના બંધારણ, અભિવ્યક્તિની સ્વતંત્રતા અને નાગરિકોના વિચારોની રક્ષા માટેનો સામૂહિક પ્રયાસ છે. તેમણે વિવિધ રાજકીય પક્ષો સાથે જોડાયેલા વિદ્યાર્થી સંગઠનોને પણ રેલીમાં ભાગ લેવા આમંત્રણ આપ્યું હતું.

મુખ્ય ચૂંટણી કમિશનર સામે ‘જનતાની અદાલત’નું આયોજન

કોંગ્રેસના નેતૃત્વ હેઠળનું ઇન્ડિયા ગઠબંધન ચૂંટણી પંચ અને કેન્દ્ર સરકાર સામે ‘વોટ ચોરી’ અભિયાનને વધુ વેગ આપવાની તૈયારીમાં છે. આ અંતર્ગત મુખ્ય ચૂંટણી કમિશનર જ્ઞાનેશ કુમાર સામે શનિવારે ‘જનતાની અદાલતમાં મહાભિયોગ’ જેવું પ્રતીકાત્મક આયોજન કરવાની યોજના છે. અહેવાલ અનુસાર, વહીવટીતંત્રે આ કાર્યક્રમ માટે રામલીલા મેદાનમાં મંજૂરી આપી નથી. ત્યારબાદ વિપક્ષી નેતાઓએ કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને કાર્યક્રમ યોજવાની તૈયારીઓ શરૂ કરી છે. આ કાર્યક્રમમાં સંસદની ચર્ચા અને અદાલતની સુનાવણીની પદ્ધતિને અનુરૂપ પ્રતીકાત્મક કાર્યવાહી કરવામાં આવશે. તેમાં ઇન્ડિયા ગઠબંધનના સાંસદો, કાનૂની નિષ્ણાતો, વકીલો, નાગરિક સમાજના પ્રતિનિધિઓ અને સામાન્ય નાગરિકોને પોતાની વાત રજૂ કરવાની તક આપવામાં આવશે. SIR દરમિયાન મતદાર યાદીમાંથી નામ દૂર થયાં હોવાનો દાવો કરનારા લોકોને પણ બોલવાની તક મળી શકે છે.

સંસદમાં પ્રસ્તાવો ફગાવાયા બાદ નવી રણનીતિ

કોંગ્રેસના સૂત્રોના જણાવ્યા અનુસાર, જ્ઞાનેશ કુમાર સામે સંસદનાં બંને ગૃહોમાં કાર્યવાહી શરૂ કરવાના વિપક્ષના પ્રયાસો સફળ ન થતાં ‘જનતાની અદાલત’નો વિચાર આગળ આવ્યો હતો. આ વર્ષે એપ્રિલમાં સંસદનાં બંને ગૃહોના પીઠાસીન અધિકારીઓએ જ્ઞાનેશ કુમાર સામે વિપક્ષ દ્વારા રજૂ કરાયેલા પ્રસ્તાવો ફગાવી દીધા હતા. આગામી પ્રતીકાત્મક કાર્યક્રમમાં મલ્લિકાર્જુન ખડગે પ્રસ્તાવ રજૂ કરશે, જ્યારે લોકસભાનાં પૂર્વ અધ્યક્ષ મીરા કુમાર કાર્યક્રમની અધ્યક્ષતા કરશે, તેવી માહિતી સૂત્રોએ આપી છે. વિવિધ પક્ષોના સાંસદોને સંસદમાં તેમની સંખ્યાના આધારે બોલવાનો સમય ફાળવવાની પણ યોજના છે.

રેલીમાં મોટી સંખ્યામાં લોકોને જોડવાનું લક્ષ્ય

1 નવેમ્બરની રેલીને સફળ બનાવવા માટે કોંગ્રેસના વરિષ્ઠ નેતાઓ રાજ્ય એકમો સાથે બેઠકો કરી રહ્યા છે. પ્રિયંકા ગાંધી વાડ્રા અને કે.સી. વેણુગોપાલ સહિતના નેતાઓ તૈયારીઓમાં જોડાયા છે. અહેવાલ મુજબ, પશ્ચિમ ઉત્તર પ્રદેશની કોંગ્રેસ એકમને રેલીમાં ઓછામાં ઓછા 25 હજાર લોકોને લાવવાનો લક્ષ્યાંક આપવામાં આવ્યો છે. હરિયાણા અને ઉત્તર પ્રદેશ સહિત દિલ્હીની આસપાસનાં રાજ્યોના નેતાઓને પણ વધુમાં વધુ લોકોને એકત્ર કરવાની જવાબદારી સોંપવામાં આવી છે. SIR અંતર્ગત મતદાર યાદીઓમાં થયેલા ફેરફારોનો વિરોધ કરતાં વિપક્ષે છેલ્લા કેટલાક સમયથી મુખ્ય ચૂંટણી કમિશનરના રાજીનામા અથવા તેમને પદ પરથી હટાવવાની માગ ઉઠાવી છે. હવે ‘જનતાની અદાલત’ અને ‘ચલો દિલ્હી’ રેલી દ્વારા આ મુદ્દે રાજકીય દબાણ વધારવાની ઇન્ડિયા ગઠબંધનની યોજના છે.