Video: "શેરીઓમાં મહાભિયોગ નથી ચાલતો!"—CEC જ્ઞાનેશ કુમાર વિરુદ્ધ અભિયાનને શિવસેના નેતાએ કોંગ્રેસની 'નાટકબાજી' ગણાવી!
મુખ્ય ચૂંટણી કમિશનર (CEC) જ્ઞાનેશ કુમાર વિરુદ્ધ ઈન્ડિયા ગઠબંધન દ્વારા જાહેર જનતા વચ્ચે જાહેર મહાભિયોગ કાર્યક્રમ યોજવાની હિલચાલ સામે શિવસેના નેતા સંજય નિરુપમે આકરા પ્રહારો કર્યા છે. મુંબઈ ખાતે મીડિયા સાથે વાતચીત કરતાં તેમણે વિપક્ષી ગઠબંધનના આ પગલાને ગેરબંધારણીય અને માત્ર રાજકીય નાટક ગણાવ્યું હતું.
સંજય નિરુપમે સ્પષ્ટ શબ્દોમાં જણાવ્યું કે, "મહાભિયોગ એ બંધારણીય માળખાનો એક ભાગ છે. આવો પ્રસ્તાવ સામાન્ય રીતે ઉચ્ચ બંધારણીય પદો પર બિરાજમાન મહાનુભાવો વિરુદ્ધ લાવવામાં આવતો હોય છે. આ સમગ્ર પ્રક્રિયા દેશની સંસદના બે ગૃહોમાંથી કોઈ એક ગૃહની અંદર જ ચલાવી શકાય છે, તેને રસ્તાઓ કે શેરીઓમાં ન લાવી શકાય."
કોંગ્રેસ અને વિરોધ પક્ષોની કાર્યશૈલી પર નિશાન સાધતાં તેમણે ઉમેર્યું કે, "કોંગ્રેસ પાર્ટી જે રીતે સતત નૌટંકી, રાજકીય પેંતરાબાજી અને રસ્તાઓ પર ઊતરીને અરાજકતા ફેલાવવાનું વર્તન કરી રહી છે, તેનાથી તેમને કશું જ હાંસલ થવાનું નથી. આવા તમાશાઓ કરવાથી કોઈ પરિણામ નહીં મળે, પરંતુ ઉલટાનું કોંગ્રેસ પાર્ટી પોતાની જ શાખ અને પ્રતિષ્ઠા જનતા વચ્ચે ગુમાવી બેસશે."
