બેંગલુરુ: ગેરકાયદે રોક બ્લાસ્ટિંગે લીધો ચાર દીપડાનો ભોગ, એક માદા અને તેના ત્રણ અજન્મ્યા બચ્ચાંના મોત

કર્ણાટકની રાજધાની બેંગલુરુના સીમ વિસ્તારમાં આવેલી ખાણોમાં થતા ગેરકાયદે વિસ્ફોટોએ વન્યજીવો માટે મોટું સંકટ ઊભું કર્યું છે. તાજેતરમાં બેંગલુરુ નજીક બસવંતારા જંગલ વિસ્તારમાં એક માદા દીપડી અને તેના ગર્ભમાં રહેલા ત્રણ બચ્ચાંના કરૂણ મોત નિપજતા પર્યાવરણ પ્રેમીઓમાં ભારે રોષ જોવા મળી રહ્યો છે. આ ઘટના બાદ કર્ણાટક સરકાર જાગી છે અને વન મંત્રી ઈશ્વર ખંડ્રેએ આ મામલે ઉચ્ચ સ્તરીય તપાસના આદેશ આપ્યા છે.

શું છે સમગ્ર ઘટના?

માહિતી મુજબ, બેંગલુરુ સિટી ડિવિઝનના કગ્ગલીપુરા રેન્જમાં વન અધિકારીઓ જ્યારે રૂટિન પેટ્રોલિંગ પર હતા, ત્યારે તેમને એક દીપડાનો મૃતદેહ મળી આવ્યો હતો. પ્રાથમિક તપાસમાં માલૂમ પડ્યું કે આ ૩ થી ૪ વર્ષની માદા દીપડી હતી. જ્યારે તેનું પોસ્ટમોર્ટમ કરવામાં આવ્યું ત્યારે ડોક્ટરો પણ સ્તબ્ધ થઈ ગયા હતા, કારણ કે માદા દીપડીના ગર્ભમાં ત્રણ અજન્મ્યા  બચ્ચાં પણ હતા. આમ, એક સાથે ચાર દીપડાના મોત થયા છે.

મોતનું કારણ: પથ્થરોનું વિસ્ફોટક બ્લાસ્ટિંગ

વન મંત્રી ઈશ્વર ખંડ્રેએ જણાવ્યું હતું કે, આ માદા દીપડીનું મોત 27 ડિસેમ્બર 2025 ના રોજ સર્વે નંબર 51માં થયું હોવાનું જણાય છે. પ્રાથમિક તપાસના અહેવાલો સૂચવે છે કે દીપડીનું મોત કુદરતી નથી, પરંતુ નજીકની ખાણોમાં કરવામાં આવેલા ભારે 'રોક બ્લાસ્ટિંગ' (પથ્થરો તોડવા માટેના વિસ્ફોટો) ના આંચકાને કારણે થયું છે. વિસ્ફોટ એટલો શક્તિશાળી હતો કે તેની અસરથી જંગલી પ્રાણીએ જીવ ગુમાવવો પડ્યો.

તંત્ર દ્વારા કડક કાર્યવાહીના આદેશ

આ ઘટના અંગે યશવંતપુરના ધારાસભ્ય એસ.ટી. સોમશેખરે પણ ગંભીર આક્ષેપો કર્યા છે કે જંગલ વિસ્તારની અંદર ગેરકાયદે ખનન પ્રવૃત્તિઓ ચાલી રહી છે. આ મામલે વન મંત્રીએ ગહન તપાસના આદેશ આપ્યા છે. જંગલની હદમાં ગેરકાયદે ખનન થઈ રહ્યું છે કે કેમ તેની વિગતવાર તપાસ કરવા કહ્યું છે. 

વન વિભાગે આ મામલે પહેલેથી જ FIR નોંધી છે.

જે ખાણ માલિકો અથવા વ્યક્તિઓ આ બ્લાસ્ટિંગ માટે જવાબદાર છે, તેમની સામે કડક કાયદાકીય કાર્યવાહી કરવી.

વન્યજીવોની સુરક્ષા પર સવાલ

બેંગલુરુ જેવા મહાનગરની આસપાસ વધી રહેલા શહેરીકરણ અને ગેરકાયદે ખાણકામને કારણે જંગલી પ્રાણીઓના રહેઠાણો જોખમાયા છે. આ ઘટનાએ ફરી એકવાર સાબિત કર્યું છે કે માનવીય લાલચને કારણે અબોલ વન્યજીવોએ ભોગ બનવું પડી રહ્યું છે.