દિલ્હી-NCRમાં પ્રદૂષણને કાબૂમાં લેવા GRAP-3 લાગુ; 50 ટકા કર્મીઓને વર્ક ફ્રોમ હોમ, આ વાહનો પર પ્રતિબંધ

દિલ્હી-NCRમાં વધતા વાયુ પ્રદૂષણને ધ્યાનમાં રાખીને કમિશન ફોર એર ક્વોલિટી મેનેજમેન્ટ (CAQM) દ્વારા મોટો નિર્ણય લેવામાં આવ્યો છે. CAQMની GRAP સબ-કમિટીએ સાવચેતીના પગલા તરીકે ગ્રેડેડ રિસ્પોન્સ એક્શન પ્લાન (GRAP)નો ત્રીજો તબક્કો એટલે કે GRAP-3 લાગુ કરવાનો નિર્ણય લીધો છે. આ નિર્ણય બાદ દિલ્હી સહિત સમગ્ર NCR વિસ્તારમાં પ્રદૂષણ નિયંત્રણ માટે વિવિધ પ્રતિબંધો અને નિયંત્રણો અમલમાં આવશે.

બાંધકામ અને ખાણકામની કામગીરી પર રોક

GRAP-3 હેઠળ ધૂળ અને પ્રદૂષણ ફેલાવતી બાંધકામ તથા તોડફોડની કામગીરી પર પ્રતિબંધ રહેશે. તેમાં ખોદકામ, ડ્રિલિંગ, પાઇલિંગ, ઈંટકામ, પેઇન્ટિંગ, ટાઇલ્સ કાપવા, રસ્તા બનાવવા અને બાંધકામના કચરાની હેરફેર જેવી કામગીરીનો સમાવેશ થાય છે. જોકે, રેલવે, મેટ્રો, એરપોર્ટ, હોસ્પિટલ, હાઇવે અને રાષ્ટ્રીય સુરક્ષા સાથે જોડાયેલા કેટલાક આવશ્યક પ્રોજેક્ટને નિયમોનું પાલન કરવાની શરતે છૂટ મળી શકે છે. આ ઉપરાંત સમગ્ર NCRમાં સ્ટોન ક્રશર અને ખાણકામની કામગીરી પણ બંધ રહેશે.

જૂના વાહનો પર પ્રતિબંધ

દિલ્હી, ગુરુગ્રામ, ફરીદાબાદ, ગાઝિયાબાદ અને ગૌતમ બુદ્ધ નગરમાં BS-3 પેટ્રોલ તથા BS-4 ડીઝલની ફોરવ્હીલ ગાડીઓના ઉપયોગ પર પ્રતિબંધ રહેશે. દિવ્યાંગો માટે ખાસ તૈયાર કરાયેલા વાહનોને અંગત ઉપયોગ માટે છૂટ આપવામાં આવી છે. આ ઉપરાંત દિલ્હીમાં નોંધાયેલા BS-4 અને તેનાથી જૂના ડીઝલ મિડિયમ ગુડ્સ વાહનો તેમજ બહારના વિસ્તારોમાં નોંધાયેલા BS-4 ડીઝલ લાઇટ કોમર્શિયલ વાહનોના પ્રવેશ પર પણ નિયંત્રણ રહેશે. આવશ્યક ચીજવસ્તુઓ અને સેવાઓ સાથે સંકળાયેલા વાહનોને છૂટ મળી શકે છે.

ધોરણ 5 સુધીના વિદ્યાર્થીઓ માટે હાઇબ્રિડ શિક્ષણ

દિલ્હી, ગુરુગ્રામ, ફરીદાબાદ, ગાઝિયાબાદ અને ગૌતમ બુદ્ધ નગરમાં ધોરણ 5 સુધીના વિદ્યાર્થીઓ માટે હાઇબ્રિડ શિક્ષણની વ્યવસ્થા લાગુ રહેશે. એટલે કે વિદ્યાર્થીઓ શાળાએ જઈને અથવા ઓનલાઈન માધ્યમથી અભ્યાસ કરી શકશે.

સરકારી અને ખાનગી કચેરીઓમાં WFH

NCRની રાજ્ય સરકારો અને દિલ્હી સરકારને સરકારી, મ્યુનિસિપલ તથા ખાનગી કચેરીઓમાં 50 ટકા કર્મચારીઓ સાથે કામકાજ ચલાવવા અને બાકીના કર્મચારીઓને વર્ક ફ્રોમ હોમ આપવાની વ્યવસ્થા અંગે નિર્ણય લેવાની સૂચના છે. કેન્દ્ર સરકાર પણ પોતાના કર્મચારીઓ માટે WFH અંગે નિર્ણય લઈ શકે છે.

નાગરિકોને પણ નિયમોનું પાલન કરવાની અપીલ

CAQM દ્વારા લોકોને ટૂંકા અંતર માટે ચાલીને અથવા સાઇકલથી જવા, જાહેર પરિવહનનો ઉપયોગ કરવા અને કાર-શેરિંગ અપનાવવાની સલાહ આપવામાં આવી છે. ઘરમાં કોલસા કે લાકડાં સળગાવવાનું ટાળવા તેમજ કચરો ન બાળવા પણ અપીલ કરવામાં આવી છે.

GRAP-3 સામાન્ય રીતે AQI 401થી 450 વચ્ચે પહોંચે ત્યારે લાગુ કરવામાં આવે છે. જોકે, પ્રદૂષણ અને હવામાનની સ્થિતિને ધ્યાનમાં રાખીને CAQM સાવચેતીના ભાગરૂપે પણ આ તબક્કો લાગુ કરી શકે છે.