Video: "એકલા જશે, પાર્ટીને કોઈ ફરક નહીં પડે!" JKNC સાંસદના રાજીનામા પર જમ્મુ-કાશ્મીર સરકારના મંત્રી લાલઘૂમ

જમ્મુ અને કાશ્મીર નેશનલ કોન્ફરન્સ (JKNC) ના સાંસદ આગા સૈયદ રૂહુલ્લાહ મેહદીના રાજીનામાની અટકળો અને ચર્ચાઓ વચ્ચે જમ્મુ-કાશ્મીર સરકારના મંત્રી જાવેદ રાણાએ આકરી પ્રતિક્રિયા આપી છે. તેમણે સ્પષ્ટ શબ્દોમાં જણાવ્યું હતું કે જો રૂહુલ્લાહ સાહેબ પક્ષથી અલગ થવાનો નિર્ણય લેશે તો તેઓ એકલા જ જશે, તેનાથી નેશનલ કોન્ફરન્સ કે સરકાર પર કોઈ પણ પ્રકારની વિપરીત અસર પડશે નહીં.

જમ્મુ ખાતે પત્રકારો સાથે વાતચીત કરતાં જાવેદ રાણાએ જણાવ્યું હતું કે, "જો આગા સાહેબ પક્ષથી અલગ થવાનો નિર્ણય કરે છે, તો તેઓ એકલા જ અલગ થશે. જો તેઓ જશે તો એકલા જ જશે... તેનાથી પાર્ટીને શું ફરક પડવાનો છે? નેશનલ કોન્ફરન્સમાં કોઈ પ્રકારની નારાજગી નથી. પાર્ટી મજબૂત છે, મુખ્યમંત્રીના નેતૃત્વમાં સરકાર મક્કમ રીતે કામ કરી રહી છે અને ડૉ. ફારૂક અબ્દુલ્લાના નેતૃત્વમાં અમારું સંગઠન પહાડની જેમ અડીખમ ઊભું છે."

પક્ષમાં ચાલી રહેલા આંતરિક અસંતોષની વાતોને નકારી કાઢતાં તેમણે મંત્રીપદની લાલસા તરફ ઈશારો કર્યો હતો. તેમણે ઉમેર્યું કે, "વાસ્તવમાં કોઈ ખરી નારાજગી નથી; આ માત્ર એટલી જ વાત છે કે 'દરેક ધારાસભ્યને મંત્રી બનવાની ઇચ્છા હોય છે', પરંતુ મંત્રીપદની બેઠકો અત્યંત મર્યાદિત છે. ઇન્શાઅલ્લાહ, ટૂંક સમયમાં રાજ્યનો દરજ્જો (Statehood) પુનઃસ્થાપિત થશે અને ત્યારબાદ નવા મંત્રીઓની પણ નિમણૂક કરવામાં આવશે."