સૌરભ દાસનું અસલી નામ યોગેશ શર્મા? માતા-પિતા અને નાગરિકતાની તપાસની માગ સાથે હાઈકોર્ટમાં અરજી

કોકરોચ જનતા પાર્ટી (CJP)ના પ્રવક્તા સૌરભ દાસની ઓળખ, નાગરિકતા અને પૃષ્ઠભૂમિ (Background)ની તપાસ કરવાની માગણી સાથે મદ્રાસ હાઈકોર્ટમાં જનહિત અરજી (PIL) દાખલ કરવામાં આવી છે. અરજીમાં દાવો કરવામાં આવ્યો છે કે સૌરભ દાસનું અસલી નામ 'યોગેશ શર્મા ઉર્ફે સૌરભ દાસ' છે. તેમની માતા-પિતા, નાગરિકતા અને ઓળખ અંગે તપાસ કરવાની માગ કરવામાં આવી છે. આ ઉપરાંત ન્યાયતંત્ર અને સુપ્રીમ કોર્ટના ન્યાયાધીશો વિરુદ્ધ કથિત અપમાનજનક ટિપ્પણીઓના મામલે તેમના X અને Instagram એકાઉન્ટ બ્લોક કરવાની પણ માગ કરાઈ છે.

મદ્રાસ હાઈકોર્ટે શુક્રવારે આ મામલે સંબંધિત પક્ષકારોને નોટિસ (Notice) પાઠવી જવાબ માગ્યો છે. કેસની આગામી સુનાવણી છ અઠવાડિયા બાદ યોજાશે.

સૌરભ દાસની ઓળખ અને નાગરિકતાની તપાસની માગ

'બાર એન્ડ બેન્ચ'ના અહેવાલ મુજબ, ગણેશ કુમાર દ્વારા આ જનહિત અરજી દાખલ કરવામાં આવી છે. અરજીમાં કેન્દ્રના ગૃહ મંત્રાલય અને સંબંધિત અધિકારીઓને સૌરભ દાસની ઓળખ, માતા-પિતાની વિગતો અને નાગરિકતાની તપાસ કરવાનો આદેશ આપવા વિનંતી કરવામાં આવી છે.

અરજદારનો દાવો છે કે સૌરભ દાસે ન્યાયતંત્ર અને સુપ્રીમ કોર્ટના ન્યાયાધીશો વિશે અપમાનજનક નિવેદનો આપ્યાં છે. અરજીમાં એવી પણ માગ કરવામાં આવી છે કે જો તપાસમાં તેઓ વિદેશી નાગરિક હોવાનું સાબિત થાય તો તેમનો પાસપોર્ટ અને આધારકાર્ડ રદ કરવા સંબંધિત અધિકારીઓને નિર્દેશ આપવામાં આવે. જોકે, આ તમામ બાબતો હાલ અરજીમાં કરવામાં આવેલા દાવા છે, કોર્ટ દ્વારા સાબિત થયેલા તથ્યો નથી.

X અને Instagram એકાઉન્ટ બ્લોક કરવાની માગ

અરજદારે ઇલેક્ટ્રોનિક્સ અને ઇન્ફોર્મેશન ટેક્નોલોજી મંત્રાલયને સૌરભ દાસના નામે ચાલતાં X અને Instagram એકાઉન્ટ બ્લોક કરવાનો આદેશ આપવા પણ માગ કરી છે. અરજીમાં જણાવાયું છે કે ન્યાયતંત્ર અને સુપ્રીમ કોર્ટના ન્યાયાધીશો વિરુદ્ધ કથિત અપમાનજનક ટિપ્પણીઓ રોકવા માટે જરૂરી કાર્યવાહી થવી જોઈએ.

અરજદારના જણાવ્યા પ્રમાણે, આ મામલે 7 ઓક્ટોબર, 2026ના રોજ કેન્દ્ર સરકારના સંબંધિત અધિકારીઓને રજૂઆત (Representation) પણ કરવામાં આવી હતી. જોકે, કોઈ કાર્યવાહી ન થતાં હાઈકોર્ટનો દરવાજો ખખડાવવામાં આવ્યો છે.

હાઈકોર્ટમાં દસ્તાવેજો અંગે થઈ ચર્ચા

મુખ્ય ન્યાયાધીશ એસ.એ. ધર્માધિકારી અને જસ્ટિસ જી. અરુળ મુરુગનની ખંડપીઠે આ કેસની સુનાવણી કરી હતી. અરજદારના વકીલ બી. જગન્નાથે અરજી સાથે જોડાયેલા કેટલાક દસ્તાવેજો રજૂ કર્યા હતા. આ દસ્તાવેજો કથિત રીતે સૌરભ દાસની ઓળખ અને સરનામાં સાથે સંબંધિત હતા.

ખંડપીઠે દસ્તાવેજોની તપાસ કરી અને કેટલીક વિગતો અંગે સ્પષ્ટતા માગી હતી. સુનાવણી દરમિયાન ન્યાયતંત્ર વિરુદ્ધ કરવામાં આવેલી કથિત ટિપ્પણીઓનો પણ ઉલ્લેખ થયો હતો. પ્રાથમિક દલીલો સાંભળ્યા બાદ કોર્ટે સૌરભ દાસ સહિત પાસપોર્ટ અધિકારી, UIDAI, ગૃહ મંત્રાલય, વિદેશ મંત્રાલય, કાયદા મંત્રાલય, IT મંત્રાલય તેમજ X અને Instagramના ફરિયાદ અધિકારીઓને નોટિસ પાઠવી છે.

હવે તમામ સંબંધિત પક્ષકારોના જવાબ બાદ આગામી સુનાવણીમાં આ મામલે આગળની કાર્યવાહી થશે.