'ઠાકરે ભાઈ હવે ઘરે રહો, વર્કફ્રોમ હોમ કરો'; શિવસેનાનો BMC ચૂંટણીના વલણો પર કટાક્ષ 

બૃહન્મુંબઈ મ્યુનિસિપલ કોર્પોરેશન (BMC)ના 227 વોર્ડ માટે મત ગણતરી ચાલી રહી છે. હાલના વલણો જોતાં BMCમાં ભાજપ ગઠબંધન 118 બેઠકો પર આગળ છે. ઠાકરે બંધુઓ 69 બેઠકો જીતવાનો અંદાજ છે. કોંગ્રેસ 12 બેઠકો પર આગળ છે.શિવસેનાના નેતા શાઈના એનસીએ મહારાષ્ટ્ર મ્યુનિસિપલ ચૂંટણીમાં મહાયુતિ (મહાગઠબંધન) માટે જંગી વિજયનો વિશ્વાસ વ્યક્ત કર્યો છે. સાથે જ વિપક્ષના વારંવારના આરોપો પર સવાલ ઉઠાવી ઠાકરે બંધુઓને સ્ક્રિપ્ટ બદલવાની સલાહ આપી છે. 

સ્ક્રિપ્ટરાઇટરને બદલવો જોઈએ

શિવસેનાના નેતાએ કહ્યું, ઉદ્ધવ ઠાકરેએ પોતાના સ્ક્રિપ્ટરાઇટરને બદલવો જોઈએ અને નવું બહાનું શોધવું જોઈએ. હાર જીતનો નિર્ણય જનતા નક્કી કરે છે. જે લોકો જમીન પર કામ કરે છે તેમને તક મળે છે. જે લોકો ઘરેથી કામ કરે છે તેમને ઘરે જ રહેવું પડશે.તેમણે રાજ્યમાં નાયબ મુખ્યમંત્રી એકનાથ શિંદે દ્વારા કરવામાં આવેલા પ્રયાસો પર પ્રકાશ પાડ્યો. એ  સાથે શિવસેના યુબીટી પર રાજ્યનો વિકાસ કરવામાં નિષ્ફળ રહેવાનો આરોપ લગાવ્યો.
 
ઠાકરે બંધુઓ પર કટાક્ષ 

મહાયુતિના પ્રદર્શન અંગે શાઈના એનસીએ કહ્યું, "તેમણે 25 વર્ષમાં કંઈ કર્યું નહીં. પરંતુ અમારા નાયબ મુખ્યમંત્રી એકનાથ શિંદેએ બે તબક્કામાં ખાડાની સમસ્યા હલ કરી. તેમણે 26 ભ્રષ્ટ કોન્ટ્રાક્ટરોને જેલમાં મોકલી દીધા. પાછલી સરકાર સીવેજ ટ્રીટમેન્ટ પ્લાન્ટ પણ આપી શકી નહીં. વિકાસની દૃષ્ટિએ અમે 5,000 ઇલેક્ટ્રિક બસો, 435 કિમી મેટ્રો કનેક્ટિવિટી અને પર્યાવરણને અનુકૂળ પહેલો અમલમાં મૂકી છે. બીએમસી ચૂંટણી માટે ગઠબંધન બનાવનારા ઠાકરે બંધુઓએ ઘરેથી કામ કરવું જોઈએ અને ઘરે જ રહેવું જોઈએ.

માત્ર અટકના આધારે મત ના મળે 

શાઈના એનસીએ કહ્યું કે, જે લોકો માને છે કે ઘરેથી કામ કરી શકાય છે, તેમના માટે આ સમય રાજકારણ અને પ્રદર્શનનો છે, ફક્ત અટકના આધારે મત કમાવવાનો નહીં. અમારા નેતા એકનાથ શિંદે સામાન્ય લોકો પ્રત્યે સમર્પિત રહ્યા અને તેમના માટે કામ કર્યું, તેમનો વિશ્વાસ મેળવ્યો. 2017ની ચૂંટણીમાં અવિભાજિત શિવસેનાએ કુલ 227 માંથી 84 બેઠકો જીતી હતી.ભાજપ સાથેના જોડાણે 114 બેઠકોમાંથી અડધાથી વધુ બેઠકો મેળવી હતી, જેમાંથી ભાજપે 82 બેઠકો જીતી હતી. અવિભાજિત રાષ્ટ્રવાદી કોંગ્રેસ પાર્ટી (NCP) એ 9 બેઠકો અને કોંગ્રેસે 31 બેઠકો જીતી હતી. તાજેતરમાં પૂર્ણ થયેલી બૃહન્મુંબઈ મ્યુનિસિપલ કોર્પોરેશનની ચૂંટણીમાં મતદાન 52.94 ટકા થયું હતું.