મહારાષ્ટ્રના રાજકારણમાં મોટો ધડાકો? કટ્ટર વિરોધીઓ ફડણવીસ-ઠાકરે એકસાથે સ્ટેજ પર આવતાં જ ખળભળાટ!

મહારાષ્ટ્રના રાજકારણમાં એક દુર્લભ દૃશ્ય જોવા મળ્યું હતું. રાજકીય મતભેદો વચ્ચે મુખ્યમંત્રી દેવેન્દ્ર ફડણવીસ, શિવસેના (UBT)ના પ્રમુખ ઉદ્ધવ ઠાકરે અને મહારાષ્ટ્ર નવનિર્માણ સેના (MNS)ના પ્રમુખ રાજ ઠાકરે એક જ મંચ પર સાથે જોવા મળ્યા હતા. મુંબઈના દાદર સ્થિત સ્વાતંત્ર્યવીર સાવરકર સ્મારક ખાતે યોજાયેલા એક પુસ્તક વિમોચન કાર્યક્રમમાં ત્રણેય નેતાઓએ એકબીજા પર હળવા અંદાજમાં રમૂજી કટાક્ષ કર્યા હતા. આ કાર્યક્રમમાં વરિષ્ઠ કાર્ટૂનિસ્ટ પ્રશાંત કુલકર્ણી દ્વારા સંપાદિત પુસ્તક ‘મહારાષ્ટ્રાચ્યા હાસ્યરેષા’નું વિમોચન કરવામાં આવ્યું હતું. આ પુસ્તકમાં મહારાષ્ટ્રના રાજકીય કાર્ટૂનનો સમાવેશ કરવામાં આવ્યો છે.

રાજ ઠાકરેની ટિપ્પણીથી હાસ્યનું મોજું

કાર્યક્રમની શરૂઆત મહારાષ્ટ્રના સંસ્કૃતિ મંત્રી આશિષ શેલારના સંબોધનથી થઈ હતી. તેમણે રાજ ઠાકરેનું આમંત્રણ સ્વીકારીને કાર્યક્રમમાં હાજરી આપવા બદલ ફડણવીસની પ્રશંસા કરી હતી. તેમણે કહ્યું કે સાંસ્કૃતિક કાર્યક્રમો રાજકીય મતભેદો હોવા છતાં નેતાઓને એક મંચ પર લાવી શકે છે.

આ વાતનો જવાબ આપતાં રાજ ઠાકરેએ રમૂજી અંદાજમાં કહ્યું કે તેઓ ભવિષ્યમાં પણ મુખ્યમંત્રીને પોતાના કાર્યક્રમોમાં આમંત્રણ આપતા રહેશે. જોકે, તેના માટે આશિષ શેલારે એ સુનિશ્ચિત કરવું પડશે કે ફડણવીસ 2029 સુધી મુખ્યમંત્રી પદે રહે. રાજ ઠાકરેની આ ટિપ્પણી સાંભળીને કાર્યક્રમમાં ઉપસ્થિત લોકો હસી પડ્યા હતા.

ફડણવીસે ઉદ્ધવ ઠાકરેને યાદ કર્યા

રાજ ઠાકરેની ટિપ્પણીનો જવાબ આપતાં ફડણવીસે પણ રાજકીય કટાક્ષ કર્યો હતો. તેમણે કહ્યું કે તેઓ હંમેશાં આમંત્રણ સ્વીકારતા આવ્યા છે, જેમાં ઉદ્ધવ ઠાકરેના આમંત્રણનો પણ સમાવેશ થાય છે. ફડણવીસે કહ્યું, “2019 સુધી ઉદ્ધવજીએ જ્યારે પણ મને બોલાવ્યો, ત્યારે હું ગયો હતો. 2019 પછી તેમણે મને બોલાવ્યો જ નહીં. હું રાહ જોતો રહ્યો.” ઉલ્લેખનીય છે કે 2019ની મહારાષ્ટ્ર વિધાનસભા ચૂંટણી બાદ મુખ્યમંત્રી પદને લઈને ભાજપ અને અવિભાજિત શિવસેના વચ્ચે મતભેદ થયા હતા. તેના કારણે બંને પક્ષોનું જૂનું ગઠબંધન તૂટી ગયું હતું.

વિરોધી વિચારધારાના નેતાઓનું એક મંચ પર આવવું નવું નથી

ફડણવીસે વધુમાં કહ્યું કે મહારાષ્ટ્રની રાજકીય સંસ્કૃતિમાં વિરોધી પક્ષોના નેતાઓનું એક મંચ પર આવવું નવી વાત નથી. નેતાઓ રાજકીય મતભેદો ભૂલીને કાર્યક્રમોમાં મળી શકે છે, વાતચીત કરી શકે છે અને સાથે ચા પણ પી શકે છે. તેમણે રાજ ઠાકરેની કાર્ટૂન બનાવવાની આવડતનો ઉલ્લેખ કરીને પણ રમૂજી ટિપ્પણી કરી હતી.