IPLમાં રોબોટનું નામ ‘ચંપક’ રાખતા BCCIની વધી મુશ્કેલી, દિલ્હી હાઈકોર્ટે જારી કરી નોટિસ

BCCI's trouble: દિલ્હી પ્રેસ ન્યૂઝપેપર પબ્લિકેશન દ્વારા IPL 2025 માં રોબોટ ડોગનું નામ 'ચંપક' રાખવા સામે વાંધો ઉઠાવવામાં આવ્યો છે. 1968 થી ચંપક કોમિક બુક પ્રકાશિત થઇ રહ્યું છે. દિલ્હી પ્રેસનું કહેવું છે કે તેનું નામ બાળકોના કોમિક બુક 'ચંપક' પરથી રાખવામાં આવ્યું છે. એટલું જ નહીં, પ્રેસે ભારતીય ક્રિકેટ કંટ્રોલ બોર્ડ (BCCI) વિરુદ્ધ દિલ્હી હાઈકોર્ટમાં અરજી પણ દાખલ કરી છે. જેમાં એવો આરોપ મૂકવામાં આવ્યો હતો કે બીસીસીઆઈએ રોબોટ ડોગને 'ચંપક' કહીને રજિસ્ટર્ડ ટ્રેડમાર્કનું ઉલ્લંઘન કર્યું છે.

આ પણ વાંચો :

BCCI એ લીધો મોટો નિર્ણય, આ 9 ખેલાડીઓને સેન્ટ્રલ કોન્ટ્રાક્ટમાંથી કર્યા બહાર

ICC ટૂર્નામેન્ટમાં પણ ભારત અને પાકિસ્તાન વચ્ચે નહીં થાય કોઈ મેચ, શું BCCIએ ભર્યું મોટું પગલું?

પ્રેસે કરી BCCI વિરુદ્ધ દિલ્હી હાઈકોર્ટમાં અરજી

બાર અને બેન્ચના અહેવાલ મુજબ, દિલ્હી પ્રેસ વતી એડવોકેટ અમિત ગુપ્તાએ કોર્ટ સમક્ષ દલીલ કરી હતી કે, 'ચંપક કોમિક બુક બાળકોમાં ખૂબ જ લોકપ્રિય છે અને BCCI દ્વારા લોન્ચ કરાયેલ AI રોબોટ ડોગનું નામ કોમિક બુક પર રાખવું એ મેગઝીનના રજીસ્ટર્ડ નામનું સ્પષ્ટ ઉલ્લંઘન છે.' 

ચાર અઠવાડિયામાં અરજીનો લેખિત જવાબ આપવો 

ન્યાયાધીશ સૌરભ બેનર્જીએ કહ્યું કે, 'ચંપક હંમેશાથી એક જાણીતું બ્રાન્ડ નામ રહ્યું છે અને BCCI ને ચાર અઠવાડિયામાં અરજીનો લેખિત જવાબ આપવાનો રહેશે.' કોર્ટે કેસની આગામી સુનાવણી 9 જુલાઈના રોજ નક્કી કરી છે. આ અરજી દિલ્હી પ્રેસ પબ્લિકેશન્સ પ્રાઇવેટ લિમિટેડ દ્વારા દાખલ કરવામાં આવી છે. 

23 એપ્રિલના રોજ કરવામાં આવ્યું હતું નામકરણ 

જો આ AI રોબો ડોગની વાત કરીએ તો હાલ આઈપીએલ દરમિયાન જ તેને લોન્ચ કરવામાં આવ્યું હતું, પરંતુ પાછળથી ફેન્સના વોટિંગના આધારે 23 એપ્રિલના રોજ આ રોબો ડોગનું નામકરણ કરવામાં આવ્યું હતું. 

BCCIના વકીલે કર્યો વિરોધ 

પ્રકાશક વતી હાજર રહેલા એડવોકેટ અમિત ગુપ્તાએ જણાવ્યું હતું કે રોબો ડોગનું નામ 'ચંપક' રાખવું એ તેના રજિસ્ટર્ડ ટ્રેડમાર્કનું ઉલ્લંઘન છે અને ચંપક એક જાણીતી બ્રાન્ડ હોવાથી વ્યાપારી શોષણ પણ છે.  જોકે, BCCI વતી હાજર રહેલા વરિષ્ઠ વકીલ જે ​​સાઈ દીપકે અરજીનો વિરોધ કરતા કહ્યું કે, 'ચંપક એક ફૂલનું નામ છે અને લોકો રોબો ડોગને કોઈ કોમિક બુક સાથે નહીં પરંતુ ટીવી સિરીઝ તારક મહેતા ક ઉલ્ટા ચશ્માના પાત્ર સાથે જોડી રહ્યા છે.

પ્રકાશકે તેમની સામે કાર્યવાહી કેમ ન કરી?

સુનાવણી દરમિયાન, ન્યાયાધીશે મૌખિક રીતે કહ્યું કે, 'ક્રિકેટર વિરાટ કોહલીનું નીકનેમ 'ચીકુ' છે, જે ચંપક કોમિક બુકના પાત્રોમાંનું એક છે. તો પ્રકાશકે તેમની સામે કાર્યવાહી કેમ ન કરી?'  જ્યારે કોર્ટે પૂછ્યું કે આ ટ્રેડમાર્ક ઉલ્લંઘન કેવી રીતે છે, ત્યારે વકીલે કહ્યું કે, 'આઈપીએલ એક વ્યાપારી સંસ્થા છે અને તે જાહેરાત, માર્કેટિંગ અને કમાણી પર આધારિત છે.' કોર્ટમાં કેસની આગામી સુનાવણી 9 જુલાઈના રોજ કરવામાં આવશે.