આઝમ ખાન હવે ડાસના જેલમાં મોકલાયા, EDએ જૌહર યુનિવર્સિટી કેસમાં કરી હતી ધરપકડ

સમાજવાદી પાર્ટીના નેતા આઝમ ખાનની મુશ્કેલીઓમાં ફરી વધારો થયો છે. રવિવારે ગાઝિયાબાદની વિશેષ PMLA કોર્ટે મની લોન્ડરિંગ કેસમાં તેમને 14 દિવસની ન્યાયિક કસ્ટડીમાં મોકલવાનો આદેશ આપ્યો છે. એન્ફોર્સમેન્ટ ડિરેક્ટોરેટ (ED)એ કડક સુરક્ષા વચ્ચે આઝમ ખાનને કોર્ટમાં રજૂ કર્યા હતા. આ દરમિયાન CRPF અને પોલીસના જવાનો પણ હાજર રહ્યા હતા. કોર્ટના આદેશ બાદ તેમને ગાઝિયાબાદની ડાસના જેલમાં મોકલવામાં આવશે.

EDએ શનિવારે સાંજે રામપુર જેલમાંથી મુક્ત થતાં જ આઝમ ખાનની ધરપકડ કરી હતી. ત્યારબાદ તેમને EDના મુખ્યાલય લઈ જવામાં આવ્યા હતા, જ્યાં આખી રાત પૂછપરછ કરવામાં આવી હતી. આ મામલો જૌહર યુનિવર્સિટીના નિર્માણમાં સરકારી નાણાંના કથિત દુરુપયોગ સાથે જોડાયેલો છે.

જેલમાંથી બહાર આવતા જ EDએ કરી હતી ધરપકડ

આઝમ ખાન લગભગ 11 મહિના બાદ શનિવારે સાંજે પોતાના પુત્ર અબ્દુલ્લા આઝમ સાથે રામપુર જેલમાંથી બહાર આવ્યા હતા. જોકે, તેમની મુક્તિ લાંબો સમય ટકી નહોતી. સાંજે 6:57 વાગ્યે જેલમાંથી બહાર આવેલા આઝમ ખાનને માત્ર 20 મિનિટ બાદ એટલે કે 7:17 વાગ્યે EDએ ફરી કસ્ટડીમાં લઈ લીધા હતા. બીજી તરફ, તેમના પુત્ર અબ્દુલ્લા આઝમ સમર્થકો સાથે ઘરે પહોંચ્યા હતા. આઝમ ખાનની મુક્તિની ખુશીમાં સમર્થકોએ આતશબાજી પણ કરી હતી.

જૌહર યુનિવર્સિટીની રૂ. 1,170 કરોડની સંપત્તિ જપ્ત

ED જૌહર યુનિવર્સિટી અને મૌલાના મોહમ્મદ અલી જૌહર ટ્રસ્ટમાં કથિત ગેરરીતિઓના મામલે તપાસ કરી રહી છે. એજન્સીએ તાજેતરમાં મની લોન્ડરિંગ એક્ટ હેઠળ રામપુર સ્થિત જૌહર યુનિવર્સિટીની આશરે રૂ. 1,170 કરોડની સંપત્તિ જપ્ત કરી હતી. EDની તપાસમાં યુનિવર્સિટીમાં રૂ. 426.46 કરોડની કથિત કાળી કમાણીનો ઉપયોગ કરવામાં આવ્યો હોવાનો દાવો કરવામાં આવ્યો છે.

EDએ રામપુરના અઝીમનગર પોલીસ સ્ટેશનમાં નોંધાયેલા 26 કેસના આધારે તપાસ શરૂ કરી હતી. તપાસના આધારે આઝમ ખાન, જૌહર ટ્રસ્ટ અને અન્ય લોકો વિરુદ્ધ ભ્રષ્ટાચાર નિવારણ અધિનિયમ સહિતની વિવિધ કલમો હેઠળ વધુ એક કેસ પણ નોંધાયો હતો. ED હાલમાં આઝમ ખાન વિરુદ્ધ નોંધાયેલા 40 કેસોની તપાસ કરી રહી છે.