VIDEO: 'પુષ્પા' ફિલ્મ જેવો સીન: મહારાષ્ટ્રમાં નદીમાં વહેતા જોવા મળ્યા ૩૦૦૦ ગેસ સિલિન્ડર
છેલ્લું અપડેટ : 09 Jul 2026
Gas Cylinder Floating In Water : સુપરહિટ ફિલ્મ 'પુષ્પા: ધ રાઈઝ' (Pushpa: The Rise)નો એ આઇકોનિક સીન તો તમને યાદ જ હશે, જ્યાં પુષ્પા (અલ્લુ અર્જુન) પોલીસથી બચવા માટે લાલ ચંદનના કિંમતી લાકડાના ભારાને વહેતી નદીના પાણીમાં વહાવી દે છે. રિલ લાઈફનો એ જ નજારો મહારાષ્ટ્રના રાયગઢમાં રિયલ લાઈફમાં જોવા મળ્યો છે. બસ ફરક એટલો જ હતો કે આ વખતે નદીમાં કિંમતી લાલ ચંદન નહીં, પરંતુ મોતનો સામાન એટલે કે આશરે 3000 LPG ગેસ સિલિન્ડર તરતા નજરે પડ્યા હતા. ભારે વરસાદ બાદ આવેલા પૂરમાં HPCL પ્લાન્ટમાંથી વહી રહેલા આ સિલિન્ડરોનો વિડીયો સોશિયલ મીડિયા પર જોરદાર વાયરલ થઈ રહ્યો છે.
એચપીસીએલ પ્લાન્ટમાં ઘૂસ્યા પૂરના પાણી
આ ચોંકાવનારી ઘટના રાયગઢ જિલ્લાના ખાલાપુર તાલુકાના ચાવણે વિસ્તારની છે. વિસ્તારમાં થયેલા મુશળધાર વરસાદના કારણે પહાડી નાળાઓનું જળસ્તર અચાનક વધી ગયું અને પૂરના તેજ પાણી સીધા ચાવણે સ્થિત એચપીસીએલના ગેસ રિફિલિંગ પ્લાન્ટમાં ઘૂસી ગયા હતા. પાણીનો પ્રવાહ એટલો ઝડપી હતો કે પ્લાન્ટના કર્મચારીઓને સંભાળવાની તક જ ન મળી અને જોતજોતામાં ત્યાં રાખેલા આશરે 3000 સિલિન્ડર કાગળની હોડીની જેમ પાણીમાં વહેવા લાગ્યા હતા.
પાતાળગંગા નદીમાં સમાયા 3000 સિલિન્ડર
પ્લાન્ટમાંથી વહીને આ તમામ ભારે-ભરખમ સિલિન્ડર સીધા આગળ જઈને વહેતી પાતાળગંગા નદીમાં જઈ પડ્યા હતા. રિપોર્ટ મુજબ, આમાંથી કેટલાક સિલિન્ડર ભરેલા છે અને કેટલાક ખાલી છે. વહેતા સિલિન્ડરોમાં મોટી સંખ્યા ખાલી સિલિન્ડરોની હતી, નહીંતર પાણીના તેજ પ્રવાહમાં એકબીજા સાથે ટકરાવા પર ગેસ લીકેજ કે ભયાનક બ્લાસ્ટનો મોટો ખતરો ઉભો થઈ શકત. ખાલી હોવાના કારણે જ વિસ્તારમાં એક બહુ મોટી દુર્ઘટના ટળી ગઈ હતી.
કલેક્ટરની કડક અપીલ: અડવાની ભૂલ ન કરતા
મામલાની ગંભીરતાને જોતા રાયગઢના જિલ્લા કલેક્ટર કિશન જાવલેએ નાગરિકોને ખૂબ જ મહત્વની અપીલ કરી છે. તેમણે સ્પષ્ટ શબ્દોમાં જણાવ્યું કે, 'નદીમાં વહીને આવેલા સિલિન્ડરોમાં ગેસ છે કે નહીં, અથવા તે સુરક્ષિત સ્થિતિમાં છે કે નહીં, તેની કોઈ ગેરંટી નથી. તેવામાં માત્ર ઉત્સુકતા કે મફતમાં વાપરવાની લાલચે આ સિલિન્ડરોને ઉઠાવવા, ખોલવા કે ઘરે લઈ જવા જીવલેણ સાબિત થઈ શકે છે.' તંત્રએ લોકોને કડક સૂચના આપી છે કે તેઓ નદી કિનારે ન જાય અને પોતે કોઈ જોખમ ન ખેડે.
સર્ચ ઓપરેશન શરૂ, એક-એક સિલિન્ડરની શોધખોળ
હાલમાં HPCL કંપની અને સ્થાનિક વહીવટી તંત્રની ટીમો સંયુક્ત રીતે સર્ચ ઓપરેશન ચલાવી રહી છે. પાતાળગંગા નદીના તેજ પ્રવાહના કારણે હાલમાં કોઈ પણ સામાન્ય નાગરિકને પાણીમાં ઉતરવાની મંજૂરી નથી. કંપની નુકસાનનું આકલન કરી રહી છે અને વહીને દૂર ગયેલા એક-એક સિલિન્ડરની શોધખોળ કરવામાં આવી રહી છે. હવામાન વિભાગે મહારાષ્ટ્રના ઘણા વિસ્તારોમાં ભારે વરસાદનું એલર્ટ જાહેર કરેલું છે, જેના કારણે તંત્ર પૂરી રીતે એલર્ટ છે.
