Video/ નસવાડી તાલુકામાં રસ્તાની દયનીય હાલત, પલસાણીથી ખંભાયતા ચોકડીનો માર્ગ 10 વર્ષથી ખાડામાં!

નસવાડી તાલુકામાં આવેલા પલસાણી ગામથી ખંભાયતા ચોકડી તરફ જતો માર્ગ છેલ્લા એક દાયકાથી (10 વર્ષથી) અત્યંત જર્જરિત હાલતમાં છે. રસ્તા પર મોટા-મોટા ખાડાઓ પડી ગયા છે, જેના કારણે વાહન ચાલકો માટે અહીંથી પસાર થવું મુશ્કેલ બન્યું છે અને અકસ્માતોનું જોખમ વધી ગયું છે.

બે જિલ્લાને જોડતો માર્ગ, છતાં બેદરકારી

આ માર્ગ નર્મદા અને છોટાઉદેપુર જિલ્લાને જોડતો એક મહત્ત્વનો માર્ગ છે, જે પંચાયત માર્ગ અને મકાન વિભાગની માલિકીનો છે. 10 વર્ષથી આ રસ્તાનું નવીનીકરણ કરવામાં ન આવતાં, રસ્તાનો ડામર સંપૂર્ણપણે ઘસાઈ ગયો છે અને કપચી બહાર નીકળી ગઈ છે. રસ્તામાં ઠેર ઠેર પડેલા વિશાળ ખાડાઓને કારણે અનેક વાહન ચાલકો ખાડામાં પટકાયા છે, જેના પરિણામે અનેક લોકોને ઈજાઓ થઈ છે અને વાહનોને પણ મોટું નુકસાન થયું છે.

વિકાસના દાવા પોકળ સાબિત

એક તરફ સરકાર આદિવાસી વિસ્તારને જોડતા રસ્તાઓ બનાવવા માટે કરોડો રૂપિયાની ગ્રાન્ટ ફાળવવાની વાતો કરે છે, પરંતુ અધિકારીઓની બેદરકારીને કારણે આ ગ્રાન્ટનો ઉપયોગ થતો નથી, જેનો આ રસ્તો વરવો નમૂનો છે. છેવાડાના માનવીના વિકાસની મોટી વાતો કરતી સરકાર નસવાડી ટાઉનથી માત્ર 10 કિલોમીટર દૂર આવેલા આ મહત્ત્વના રસ્તાને બનાવતી નથી.

રાહદારી રમણભાઈ ભીલના જણાવ્યા મુજબ, "સરકાર દર વર્ષે ખરાબ રસ્તાના ખાડા પૂરવા માટે કરોડો રૂપિયા ખર્ચો કરે છે, પરંતુ આ રસ્તાના ખાડા પૂરવામાં આવતા નથી, જેના કારણે સ્થાનિક લોકોમાં ભારે રોષ જોવા મળી રહ્યો છે." જો તાત્કાલિક ધોરણે આ રસ્તાનું સમારકામ કે નવીનીકરણ કરવામાં નહીં આવે, તો વાહન ચાલકોની મુશ્કેલીઓ અને અકસ્માતોની સંખ્યામાં વધારો થવાની સંભાવના છે.