Video: સોનું લૂંટવા આવી હતી, વેપારીએ પકડીને લાફા માર્યા, જ્વેલર્સની દુકાનમાં મહિલા ગ્રાહકનો નિષ્ફળ લૂંટનો પ્રયાસ

અમદાવાદના રાણીપ વિસ્તારમાં એક સનસનાટીપૂર્ણ ઘટના સામે આવી છે, જ્યાં ખરીદી કરવા આવેલી એક મહિલાએ લૂંટના ઇરાદે જ્વેલર્સના માલિક પર મરચું ફેંક્યું હતું. આ સમગ્ર ઘટના દુકાનમાં લાગેલા સીસીટીવી (CCTV) કેમેરામાં કેદ થઈ છે અને તેનો વીડિયો વાયરલ થયો છે.

મરચું ફેંકીને લૂંટનો પ્રયાસ

રાણીપ વિસ્તારમાં આવેલી એક જ્વેલર્સની દુકાનમાં એક મહિલા ગ્રાહકના સ્વાંગમાં ખરીદી કરવા આવી હતી. તક મળતાં જ આ મહિલાએ દુકાનના માલિક પર મરચાની ભૂકી ફેંકીને લૂંટ કરવાનો પ્રયાસ કર્યો હતો. જોકે, વેપારીએ સમયસૂચકતા વાપરીને હિંમત બતાવી હતી.

વાયરલ થયેલા સીસીટીવી ફૂટેજ મુજબ, મરચું ફેંકાયા બાદ વેપારીએ તરત જ મહિલાને પકડી લીધી હતી અને તેને લાફા ઝીંકી દીધા હતા. વેપારીની હિંમત જોઈને આ મહિલા ગભરાઈ ગઈ હતી અને લૂંટ કરવામાં નિષ્ફળ રહેતા તાત્કાલિક દુકાનમાંથી ફરાર થઈ ગઈ હતી.

પોલીસ ફરિયાદ વગર જ તપાસ શરૂ

રસપ્રદ વાત એ છે કે, જ્વેલર્સના માલિકે આ ઘટના અંગે પોલીસ ફરિયાદ નોંધાવી નથી. તેમ છતાં, રાણીપની આ જ્વેલર્સની દુકાનના CCTV ફૂટેજ વાયરલ થતાં પોલીસ સક્રિય થઈ છે.

પોલીસે સ્વયં સંજ્ઞાન લઈને ઘટનાની તપાસ શરૂ કરી દીધી છે. પોલીસ દ્વારા વાયરલ વીડિયોના આધારે લૂંટનો પ્રયાસ કરનાર મહિલાની ઓળખ કરવા અને તેને ઝડપી પાડવા માટે કાર્યવાહી હાથ ધરવામાં આવી છે.