ભાડુઆતોએ બાંધકામ કરતા પહેલા માલિકની લેખિત મંજૂરી  લેવી ફરજિયાત: ગુજરાત હાઈકોર્ટનો ઐતિહાસિક આદેશ

ગુજરાત હાઈકોર્ટે મકાનમાલિક અને ભાડુઆતના હકોને લઈને એક અત્યંત મહત્ત્વનો ચુકાદો આપ્યો છે. કોર્ટે સ્પષ્ટ કર્યું છે કે જો કોઈ ભાડુઆત મકાનમાલિકની પૂર્વ મંજૂરી વિના મિલકતમાં કોઈ પણ પ્રકારનું બાંધકામ કરે છે, તો તેણે મિલકતનો કબજો ગુમાવવો પડી શકે છે. હાઈકોર્ટે આ મામલે ભાડુઆતની રિવિઝન અરજી ફગાવી દઈને ચાર સપ્તાહમાં મિલકત ખાલી કરવાનો આદેશ આપ્યો છે.

શું હતો સમગ્ર કેસ?

એક ભાડુઆત દ્વારા મકાનમાલિકની લેખિત સંમતિ મેળવ્યા વગર મિલકતમાં ફેરફાર અને બાંધકામ કરવામાં આવ્યું હતું. આ મામલે નીચલી અદાલતે મિલકત ખાલી કરવાનો આદેશ આપ્યો હતો, જેની સામે ભાડુઆતે ગુજરાત હાઈકોર્ટમાં રિવિઝન અરજી દાખલ કરી હતી. જોકે, હાઈકોર્ટે ભાડુઆતની દલીલોને ગ્રાહ્ય રાખી નહોતી.

હાઈકોર્ટના ચુકાદાના મુખ્ય અંશ:

• હાઈકોર્ટે ભાડુઆતને આદેશ આપ્યો છે કે આગામી ચાર સપ્તાહમાં મિલકતનો શાંત અને ખાલી કબજો મૂળ માલિકને સોંપી દેવો.
• કોર્ટે નોંધ્યું હતું કે જો ભાડુઆત ટ્રાન્સફર ઓફ પ્રોપર્ટી એક્ટ (TP Act) ની જોગવાઈઓનો ભંગ કરે, તો મકાનમાલિક પોતાની મિલકત પરત લેવા માટે સંપૂર્ણ હકદાર બને છે.
• ભાડુઆત પોતાના ખર્ચે વીજળી કે અન્ય પ્રાથમિક સુવિધાઓ મેળવવા હકદાર છે, પરંતુ માલિકની મંજૂરી વગર બાંધકામ કરી શકતો નથી.
• "ભાડુઆત મિલકતનો ઉપયોગ કરી શકે છે, પરંતુ તેમાં માલિકી હક જેવી રીતે ફેરફાર કરવાનો તેને કોઈ કાનૂની અધિકાર નથી."

મકાનમાલિકો અને ભાડુઆતો માટે શીખ:

આ ચુકાદાથી એ સાબિત થયું છે કે ભાડૂતી મિલકતમાં કોઈપણ કાયમી કે કામચલાઉ બાંધકામ કરતા પહેલા માલિકની લેખિત સંમતિ લેવી અનિવાર્ય છે. જો ભાડુઆત કાયદાનું ઉલ્લંઘન કરે છે, તો તેણે વર્ષો જૂની ભાડૂતી મિલકત પણ ખાલી કરવી પડી શકે છે.