DEO કચેરીમાં શાળાની માન્યતાને નામે કરોડોનું કૌભાંડ, પૂર્વ DEOની બોગસ સહી, 21 શાળાની માન્યતા રદ

સુરત જિલ્લા શિક્ષણાધિકારી (DEO) કચેરીની તપાસમાં ખાનગી શાળાઓની માન્યતાને લઈને એક મોટું કૌભાંડ સામે આવ્યું છે. હાલના DEO દ્વારા કરવામાં આવેલી તપાસમાં પૂર્વ DEOની બોગસ સહી કરીને બંધ અને કાર્યરત શાળાઓના રેકોર્ડમાં ચેડાં કરવામાં આવ્યા હોવાનું બહાર આવ્યું છે, જેના કારણે કરોડો રૂપિયાના કૌભાંડની આશંકા સેવાઇ રહી છે.

સુરત જિલ્લા શિક્ષણાધિકારી ડૉ. ભગીરથસિંહ પરમારની આગેવાની હેઠળ આ કાર્યવાહી હાથ ધરાઈ છે.

કૌભાંડની મુખ્ય વિગતો અને કાર્યવાહી

આ કૌભાંડમાં કચેરીના જ પાંચેક કર્મચારીઓ ખાનગી સ્કૂલના સંચાલકો સાથે મળીને ષડયંત્ર ચલાવી રહ્યા હતા. તેઓ પૂર્વ DEOની બોગસ સહી કરીને વહીવટી મંજૂરીના ઓર્ડર ઇશ્યુ કરતા હતા. હાલમાં તપાસના અંતે 21 શાળાની માન્યતા રદ કરવામાં આવી છે. DEOની તપાસમાં 106 સ્કૂલોના દસ્તાવેજો શંકાસ્પદ મળ્યા છે, જેને પગલે તેમના યુડાયસ (U-DISE) ડેટાને લોક કરી દેવાયા છે.

તપાસનો વ્યાપ

હાલમાં 80 જેટલી શાળાની તપાસ ચાલી રહી છે, અને વધુ 50 જેટલી શાળાની માન્યતા રદ કરવા માટેનો રિપોર્ટ તૈયાર કરવામાં આવ્યો છે.  આ કૌભાંડમાં સ્કૂલોની માન્યતા આપવા માટે કરોડોની કમાણી કરવામાં આવી હોવાનો આક્ષેપ છે.

આ કાર્યવાહી માટે 8 અધિકારીઓની ટીમ બનાવવામાં આવી છે. ગોડાદરા, ડીંડોલી, વરાછા, ઉધના અને લીંબાયત વિસ્તારમાં વાર્ષિક નિરીક્ષણ દરમિયાન આ ગેરરીતિઓ બહાર આવી હતી.

વિદ્યાર્થીઓનું ભાવિ અને આગામી પગલાં

આ કૌભાંડમાં બંધ શાળાઓને ચાલુ બતાવી ગેરકાયદેસર રીતે ચલાવવામાં આવતી હતી. DEO ડૉ. ભગીરથસિંહ પરમારના જણાવ્યા મુજબ, છેલ્લા 17 વર્ષ સુધીના તમામ શાળાઓના રેકોર્ડની તપાસણી કરવામાં આવશે. માન્યતા રદ કરવામાં આવેલી શાળાઓમાં અભ્યાસ કરતા વિદ્યાર્થીઓને અન્ય શાળામાં પ્રવેશ આપવામાં આવશે.

નવા શૈક્ષણિક સત્ર સુધીમાં ગેરકાયદેસર ચાલતી તમામ શાળાઓ બંધ કરી દેવામાં આવશે.

આ કૌભાંડ શિક્ષણ જગતમાં ખળભળાટ મચાવી દીધો છે, અને હવે અન્ય શાળાઓની તપાસમાં વધુ ગેરરીતિઓ બહાર આવે તેવી શક્યતા છે.