Morbi : લૂંટેરી દુલ્હન, લગ્નના નામે બે લાખની ઠગાઈ કરી ત્રણ દિવસમાં રફૂચક્કર

મોરબીમાં લૂંટેરી દુલ્હન અને તેના સાથીઓએ મળીને લગ્નનું નાટક રચી યુવક પાસેથી બે લાખ રૂપિયાની ઠગાઈ કરી હોવાનો બનાવ સામે આવ્યો છે. માધાપર ગામના યુવાન કાનજી રામજીભાઈ સાથે લગ્ન કરી  લુટેરી દુલ્હન મીનાક્ષી માત્ર  ત્રણ જ દિવસમાં ભાગી છૂટી હતી.  આ ઘટનામાં ફરિયાદી મહેશભાઈએ મોરબી સીટી એ ડિવિઝન પોલીસ મથકે મીનાક્ષી સહિત ચાર આરોપીઓ વિરુદ્ધ ફરિયાદ નોંધાવી છે.

ઘટનાની વિગતો

મોરબીના માધાપર ગામના રહેવાસી કાનજી રામજીભાઈના લગ્ન મીનાક્ષી નામની યુવતી સાથે થયા હતા. લગ્નની વાતચીત અને વ્યવસ્થા માટે ફરિયાદી મહેશભાઈએ કનુભાઈ અને હરેશભાઈ નામના વ્યક્તિઓ દ્વારા બે લાખ રૂપિયાની ચુકવણી કરી હતી. લગ્ન બાદ મીનાક્ષી ફક્ત ત્રણ દિવસ તેના સાસરે એટલે કે ફરિયાદીના ઘરે રોકાઈ અને ત્યારબાદ આંટો મારવાનું કહીને નીકળી ગઈ. તે પછી તે પરત ફરી ન હતી. 

આ ઘટનાને પગલે મહેશભાઈએ મોરબી સીટી એ ડિવિઝન પોલીસ મથકે ચાર આરોપીઓ—કનુભાઈ, હરેશભાઈ, મીનાક્ષી અને પ્રવિણાબેન—વિરુદ્ધ ફરિયાદ નોંધાવી છે. ફરિયાદમાં જણાવાયું છે કે આરોપીઓએ લગ્નની આડમાં બે લાખ રૂપિયાની છેતરપિંડી આચરી છે.