પૂર્વ IPS અધિકારી સંજીવ ભટ્ટને રાહત, આ કેસમાં પોરબંદર કોર્ટે જાહેર કર્યા નિર્દોષ

ગુજરાતના પોરબંદરની અદાલતે 1997ના કસ્ટોડિયલ ટોર્ચર કેસમાં ભૂતપૂર્વ IPS અધિકારી સંજીવ ભટ્ટને નિર્દોષ જાહેર કર્યા હતા. કોર્ટે કહ્યું છે કે ફરિયાદ પક્ષ પાસે આ કેસ સાબિત કરવા માટે કોઈ પુરાવા નથી.

એડિશનલ ચીફ જ્યુડિશિયલ મેજિસ્ટ્રેટ મુકેશ પંડ્યાએ શનિવારે પોરબંદરના તત્કાલિન પોલીસ અધિક્ષક (એસપી) સંજીવ ભટ્ટને પુરાવાના અભાવે તેમની સામે કબૂલાત મેળવવા માટે ગંભીર ઈજા પહોંચાડવા અને અન્ય જોગવાઈઓ હેઠળ નોંધાયેલા કેસમાં શંકાનો લાભ આપી નિર્દોષ જાહેર કર્યા હતા. 

હાલ કયા છે સંજીવ ભટ્ટ? 

સંજીવ ભટ્ટને અગાઉ 1990માં જામનગરમાં કસ્ટોડિયલ ડેથ કેસમાં આજીવન કેદ અને 1996માં પાલનપુરમાં રાજસ્થાનના વકીલને ફસાવવાના કેસમાં 20 વર્ષની જેલની સજા ફટકારવામાં આવી હતી. હાલ તેઓ રાજકોટ સેન્ટ્રલ જેલમાં બંધ છે.

સુનાવણી દરમિયાન કોર્ટે આ વાત કહી

કોર્ટે કહ્યું કે ફરિયાદ પક્ષ આ કેસમાં શંકા સિવાય કશું સાબિત કરી શક્યું નથી. ફરિયાદ પક્ષે આરોપ લગાવ્યો હતો કે તેની કબૂલાત મેળવવા માટે તેને જેલમાં ભારે ત્રાસ આપવામાં આવ્યો હતો. કોર્ટે એમ પણ કહ્યું કે આરોપી જે તે સમયે જાહેર સેવક હતો અને પોતાની ફરજ નિભાવી રહ્યો હતો.

સંજીવ ભટ્ટ પર આ આરોપો લગાવવામાં આવ્યા હતા

નારણ જાદવ નામની વ્યક્તિની ફરિયાદના આધારે સંજીવ ભટ્ટ પર આ આરોપો લગાવવામાં આવ્યા હતા. જાદવ 1994ના હથિયાર જપ્તીના કેસમાં 22 આરોપીઓમાંનો એક હતો. પ્રોસિક્યુશન મુજબ, પોરબંદર પોલીસની એક ટીમ 5 જુલાઈ, 1997ના રોજ ટ્રાન્સફર વોરંટ પર જાદવને અમદાવાદની સાબરમતી સેન્ટ્રલ જેલમાંથી પોરબંદરમાં ભટ્ટના ઘરે લઈ ગઈ હતી. જાદવને તેના શરીરના વિવિધ ભાગો અને પ્રાઈવેટ પાર્ટ પર પણ ઈલેક્ટ્રીક શોક આપવામાં આવ્યા હતા.

પુરાવાના આધારે કોર્ટે 31 ડિસેમ્બર 1998ના રોજ કેસ નોંધવાનું કહ્યું હતું અને સમન્સ જારી કર્યું હતું. 15 એપ્રિલ, 2013ના રોજ કોર્ટે ભટ્ટ અને કોન્સ્ટેબલ વજુભાઈ ચૌ વિરુદ્ધ FIR નોંધવાનો આદેશ આપ્યો હતો.