Navsari News: ક્લોથ બેગ વેન્ડિંગ મશીનનું કર્યું ઇન્સ્ટોલેશન, કાપડના થેલા અપનાવવાની પ્રેરણા આપી
છેલ્લું અપડેટ : 17 Nov 2025
વધતા જતા પ્લાસ્ટિકના થેલીના દૂષણને દૂર કરવા માટે નવસારી મહાનગરપાલિકા દ્વારા એક નવતર પ્રયોગ હાથ ધરાયો છે. જેમાં શાકભાજી માર્કેટમાં ઇકો ફ્રેન્ડલી થેલીનું ATM મશીન મૂક્યું છે.
ક્લોથ બેગ વેન્ડિંગ મશીનનું સફળતાપૂર્વક ઇન્સ્ટોલેશન
નવસારી મહાનગરપાલિકાએ આજે શહેરને હરિયાળું અને પ્લાસ્ટિક મુક્ત તરફ એક મહત્વપૂર્ણ અને પ્રશંસનીય પહેલ કરી છે. શહેરના વ્યસ્ત શાકભાજી માર્કેટ વિસ્તારમાં ક્લોથ બેગ વેન્ડિંગ મશીનનું સફળતાપૂર્વક ઇન્સ્ટોલેશન કરવામાં આવ્યું છે, જે પર્યાવરણ રક્ષણના ક્ષેત્રે નવસારીને નવા માપદંડો તરફ આગળ ધપાવે છે.
મહાનગરપાલિકાના સોલિડ વેસ્ટ મેનેજમેન્ટ વિભાગની સૂચનાથી શરૂ કરાયેલ આ પ્રયોગ એ શહેરમાં એક વખત વપરાતા પ્લાસ્ટિકના ઉપયોગને ઘટાડીને કાપડના થેલાને મુખ્ય પ્રવાહમાં લાવવા માટેની ક્રાંતિકારી શરૂઆત ગણાઈ રહી છે.
કાપડના થેલા અપનાવવાની પ્રેરણા
આ મશીન મારફતે કોઈપણ નાગરિક ફક્ત ₹10ની ઍફોર્ડેબલ કિંમતે ઉચ્ચ ગુણવત્તાવાળા કાપડના થેલા મેળવી શકે છે. આ માત્ર એક સુવિધા નથી, પરંતુ પર્યાવરણને બચાવવા નાગરિકોને પ્રેરિત કરતી ગ્રીન મૂવમેન્ટનો સશક્ત ભાગ છે. દરરોજ હજારો લોકોની અવરજવર ધરાવતા શાકભાજી માર્કેટમાં આ મશીનથી વેપારીઓ અને ખરીદદારો બંનેને પ્લાસ્ટિકના થેલાની જગ્યાએ કાપડના થેલા અપનાવવાની પ્રેરણા મળશે.
ઇન્સ્ટોલેશન સમયે નાયબ કમિશનર સહિત મહાનગરપાલિકાના અધિકારીઓ હાજર રહ્યા હતા. તેમણે મશીનની કામગીરીની વિસ્તૃત સમીક્ષા કરીને નાગરિકોને તેનો સતત ઉપયોગ કરવા અનુરોધ કર્યો હતો.
ગુજરાત માટે પર્યાવરણ મૈત્રી દ્રષ્ટિનું પ્રેરણાદાયી ઉદાહરણ નવસારી
મહાનગરપાલિકા દ્વારા જણાવાયું કે, આ તો માત્ર શરૂઆત છે—આગામી સમયમાં નવસારીના વિવિધ મુખ્ય સ્થળોએ વધુ આવા વેન્ડિંગ મશીનો સ્થાપિત કરવાની યોજના તજવીજ હેઠળ છે. ઉદ્દેશ સ્પષ્ટ છે: “પર્યાવરણને બચાવીએ, પ્લાસ્ટિકને દૂર કરીએ અને નવસારીને ગ્રીન મોડેલ સિટી બનાવીએ.” આ પહેલથી નવસારી માત્ર સ્વચ્છતા અભિયાનમાં આગળ નથી વધતું, પરંતુ સમગ્ર ગુજરાત માટે પર્યાવરણ મૈત્રી દ્રષ્ટિનું પ્રેરણાદાયી ઉદાહરણ મૂકે છે.
નાગરિકો તરફથી સારો પ્રતિસાદ
આ પહેલને નાગરિકો તરફથી પણ પ્રશંસનીય પ્રતિસાદ મળી રહ્યો છે, કારણ કે એક સરળ, સસ્તું અને પર્યાવરણ માટે જવાબદાર વિકલ્પ હવે તેમના હાથ સુધી પહોંચી ગયું છે. જો આ અભિયાન સફળ રહેશે તો નવસારી નજીકના ભવિષ્યમાં પ્લાસ્ટિક મુક્ત શહેરોની યાદીમાં શાનથી સ્થાન મેળવે તે નક્કી છે.
