Narmada news: ભાજપમાં 'નો-રિપીટ' થીયરી યથાવત, અનેક દિગ્ગજોના પત્તા કપાયા

 નર્મદા જિલ્લામાં આગામી સ્થાનિક સ્વરાજ્યની ચૂંટણીઓ માટે ભાજપે પોતાના ઉમેદવારોની યાદી જાહેર કરી દીધી છે. આ યાદીમાં પક્ષે શિસ્ત અને નવા લોહીને પ્રાધાન્ય આપતા અનેક પૂર્વ હોદ્દેદારો અને દિગ્ગજોની ટિકિટ કાપીને ચોંકાવી દીધા છે.

પંચાયત બેઠકોની સ્થિતિ

ભાજપે જિલ્લા પંચાયતની કુલ 22 બેઠકોમાંથી 21 બેઠકો પર ઉમેદવારો જાહેર કર્યા છે, જ્યારે 1 બેઠક હજુ બાકી રાખવામાં આવી છે. તેવી જ રીતે, તાલુકા પંચાયતની 102 બેઠકોમાંથી 101 બેઠકો ના નામ જાહેર કરી દેવામાં આવ્યા છે.

દિગ્ગજોની ટિકિટ કપાઈ, નવા ચહેરાઓને સ્થાન

ભાજપે આ વખતે '3 ટર્મથી વધુ ચૂંટણી લડનાર' ઉમેદવારોને ટિકિટ ન આપવાની કડક નીતિ અપનાવી છે, જેને કારણે અનેક મોટા માથાઓ ઘરભેગા થયા છે.  જિલ્લા પંચાયતના પૂર્વ પ્રમુખ મનજી વસાવા અને પર્યુષા વસાવાની ટિકિટ કપાઈ છે. હાલના પ્રમુખ ભીમસિંગ તડવીને પણ આ વખતે તક આપવામાં આવી નથી. પૂર્વ ધારાસભ્ય હર્ષદ વસાવાના સાળા અને પૂર્વ ઉપપ્રમુખ કિરણ વસાવાનું નામ પણ યાદીમાંથી ગાયબ છે.

કોને મળી તક?

રસ્મિતા વસાવા (આમલેથા બેઠક): તત્કાલીન આરોગ્ય સમિતિના ચેરમેન રસ્મિતા વસાવા પર પક્ષે ફરી વિશ્વાસ મૂક્યો છે અને તેમને આમલેથા બેઠક પરથી રિપીટ કર્યા છે.

પદમબાબુ તડવી (ખડગદા બેઠક): પૂર્વ વન મંત્રી શબ્દશરણ તડવીના પિતરાઈ ભાઈ પદમબાબુ તડવીને જિલ્લા પંચાયતની ટિકિટ મળી છે.

કેવડિયા બેઠક: કેવડિયા જિલ્લા પંચાયતના હાલના સભ્ય દિનેશ તડવીના પત્નીને પક્ષે ચૂંટણી મેદાનમાં ઉતાર્યા છે.

રાજપીપલા નગરપાલિકામાં પેચ ફસાયો

જિલ્લા અને તાલુકા પંચાયતની યાદી જાહેર થઈ ગઈ હોવા છતાં, રાજપીપલા નગરપાલિકાની 28 બેઠકો માટે હજુ પણ ખેંચતાણ ચાલી રહી છે. આંતરિક ગૂંચવણોને કારણે નગરપાલિકાના ઉમેદવારોની યાદી હાલ પૂરતી અટકાવી દેવામાં આવી છે.