ગુજરાત હાઇકોર્ટે પથ્થરમારાની ઘટનામાં કોંગ્રેસના 5 કાર્યકર્તાઓના જામીન કર્યા મંજૂર
અમદાવાદ: કોંગ્રેસ ઓફિસ ખાતે થયેલ પથ્થરમારાની ઘટનામાં કોંગ્રેસના 5 કા
અમદાવાદ: કોંગ્રેસ ઓફિસ ખાતે થયેલ પથ્થરમારાની ઘટનામાં કોંગ્રેસના 5 કાર્યકર્તાઓની ધરપકડ કરવામાં આવી હતી. પાંચેય કાર્યકર્તાઓની ગુજરાત હાઇકોર્ટમાં જામીન અરજી પર આજે સુનાવણી થઈ હતી. ગુજરાત હાઇકોર્ટે પથ્થરમારાની ઘટનામાં કોંગ્રેસના તમામ કાર્યકર્તાઓના જામીન મંજૂર કર્યા છે. વધુ તપાસની જરૂર ના હોવાની બચાવ પક્ષની દલીલ કોર્ટે ગ્રાહ્ય રાખી હતી. સમગ્ર ઘટના મામલે પોલીસ દ્વારા મુદ્દામાલ પણ રિકવર કરી લેવામાં આવ્યો છે. કોંગ્રેસ કાર્યકર્તાઓને 10,000 રૂપિયાના બોન્ડ ઉપર ગુજરાત હાઇકોર્ટ જામીન મંજૂર કર્યા છે.
કોંગ્રેસ કાર્યાલય પર ભાજપ-કોંગ્રેસના કાર્યકર્તાઓ વચ્ચે થઈ હતી બબાલ
પહેલી જુલાઈ 2024ના રોજ લોકસભામાં વિપક્ષનેતા રાહુલ ગાંધીએ સંસદમાં આપેલા નિવેદન બાદ ભાજપ (BJP)ના કાર્યકરો દ્વારા પાલડીમાં આવેલા કોંગ્રેસ કાર્યાલય (રાજીવ ગાંધી ભવન) પાસે વિરોધ પ્રદર્શન દરમિયાન બબાલ થઈ હતી. ત્યારબાદ ત્રણ જુલાઈએ ભાજપ અને કોંગ્રેસના કાર્યકર્તાઓએ સામસામે પથ્થરમારો કર્યો હતો. આ મામલે ભાજપ અને કોંગ્રેસે સામ સામે પોલીસ ફરિયાદ નોંધાવી હતી. જેને પગલે પોલીસે કોંગ્રેસના પાંચ કાર્યકરો સંજય બ્રહ્મભટ્ટ, મનીષ ઠાકોર, મુકેશ દંતાણી અને વિમલ કંસારાની ધરપકડ કરી હતી.
ભાજપના કાર્યકરો વિરુદ્ધ પણ પોલીસ ફરિયાદ નોંધાઈ હતી
રાહુલ ગાંધીના નિવેદન મામલે ભાજપના કાર્યકરોએ કોંગ્રેસના કાર્યાલય પાસે આવીને કોંગ્રેસના કાર્યકરો પર પથ્થરમારો કર્યો હતો. જો કે આ સંદર્ભમાં પોલીસે કોગ્રેસ તરફથી ફરિયાદ નોંધી નહોતી. પરંતુ, ભાજપના નેતાની કોગ્રેસના કાર્યકરો વિરૂદ્વ ફરિયાદ નોંધી હતી. એટલું જ નહી પોલીસે કોંગ્રેસ-ભાજપના કાર્યકરો વિરૂદ્વ દાખલ કરેલી ફરિયાદમાં પણ ભાજપના કાર્યકરોના નામનો ઉલ્લેખ નહોતો કરાયો. છેવટે આ મામલે કોંગ્રેસે આગામી 6 જુલાઇના રોજ રાજ્યવ્યાપી દેખાવ કરવાની જાહેરાત કરતા સરકારની સુચના બાદ એલિસબ્રીજ પોલીસ કોંગ્રેસના શહેર પ્રમુખ હિમતસિંહ પટેલની ભાજપના 16 કાર્યકરોના નામજોગ ફરિયાદ દાખલ કરી હતી.
કોંગ્રેસ પ્રમુખે ભાજપના 150 કાર્યકર્તાઓ વિરુદ્ધ ફરિયાદ નોંધાવી હતી
શહેર કોંગ્રેસના પ્રમુખ હિંમતસિંહ પટેલે પથ્થરમારાની ઘટના અંગે ફરિયાદ નોંધાવી હતી. ફરિયાદમાં જણાવાયું હતું કે, ગત 1લી જુલાઇના રોજ સસંદમાં વિપક્ષના નેતા રાહુલ ગાંધીએ આપેલા નિવેદન મામલે વિરોધ કરવા માટે બીજી તારીખે સાંજે ભાજપ યુવા મોર્ચાના 150 જેટલા કાર્યકરો પાલડી રાજીવ ગાંધી ભવન તરફ પ્રિતમનગરના ઢાળથી આવી રહ્યા હતા. આ સમયે સ્થિતિ વણસે નહિ તે માટે પોલીસને પણ જાણ કરવામાં આવી હતી. સાથેસાથે નુકશાન ન થાય તે માટે કોંગ્રેસના કાર્યકરો પણ રાજીવ ગાંધી ભવનના ગેટ પાસે એકઠા થયા હતા. આ સમયે ભાજપ યુવા મોરચાના કાર્યકરો રાજીવ ગાંધી ભવન તરફ આવ્યા હતા અને તેમણે કોંગ્રેસના કાર્યકરો પર પથ્થરમારો શરૂ કરી દીધો હતો. જેમાં કોંગ્રેસના કેટલાંક કાર્યકરો અને પોલીસ કર્મચારીઓને ઇજા પહોંચી હતી. આ ફરિયાદમાં ઇસીત ભટ્ટ, કશ્યપ જાની, અવિનાશ ગહરવાલ, આકાશ ગેહલોત, રૂશાંગ મર્ચન્ટ, રવિ પટેલ, હેમંત મગરે, યશ પટેલ, ગીરીશ વણઝારા, સુહાગ પટેલ સહિત 150 જેટલા ટોળાનો ઉલ્લેખ કરાયો છે. આ સમગ્ર કેસની તપાસ સિનિયર અધિકારીના સુપરવિઝનમાં તટસ્થપણે કરવામાં આવે તેવી માંગણી પણ કરવામાં આવી છે.
ધારાસભ્ય શૈલેષ પરમારે 12 લોકો સામે નોંધાવી હતી ફરિયાદ
કોંગ્રેસ કાર્યાલયમાં પથ્થરમારો, તોડફોડને લઈને ધારાસભ્ય શૈલેષ પરમારે પણ ફરિયાદ નોંધાવી હતી. તેમણે જ્વલિત મહેતા, ઋત્વિક શ્રૈયાંસ શાહ, ચિંતન લોધા તેમજ અન્ય 9 લોકો સામે ફરિયાદ નોંધાવી છે. અગાઉ આ ઘટનામાં એલિસબ્રીજ પોલીસ મથકે બે અલગ અલગ ફરિયાદ નોંધવામાં આવી હતી. જેમાં ભાજપના યુવા મોરચાના પ્રમુખની કોંગ્રેસના નેતાઓ અને 200 જેટલા કાર્યકરોના ટોળા વિરૂદ્વ ફરિયાદ નોંધી હતી. જ્યારે બીજી ફરિયાદ પોલીસ પરના હુમલાની નોંધવામાં આવી હતી. જેમાં કોગ્રેસ અને ભાજપના કાર્યકરો વિરૂદ્વની હતી. જો કે પોલીસે કોંગ્રેસ દ્વારા ભાજપના કાર્યકરો વિરુદ્ધ કરવામાં આવેલી ફરિયાદ લીધી નહોતી અને પોલીસ પરના હુમલાની ફરિયાદમાં પણ માત્ર કોંગ્રેસના કાર્યકરોના નામ જ નોંઘ્યા હતા.
