ગુજરાત સરકારે 15 ઓગસ્ટ સુધી અરબી સમુદ્રમાં માછીમારી પર પ્રતિબંધ મૂક્યો, કોંગ્રેસે કર્યો વિરોધ

ગુજરાત સરકારે અરબી સમુદ્રમાં માછીમારી પરનો પ્રતિબંધ 15 ઓગસ્ટ સુધી લંબાવી દીધો છે. કેન્દ્ર સરકાર સાથે પરામર્શ કરીને લેવાયેલા આ નિર્ણયની કોંગ્રેસ  દ્વારા આકરી ટીકા કરવામાં આવી છે. કોંગ્રેસે આ નિર્ણયને અયોગ્ય અને અવિચારી ગણાવ્યો છે.

2021થી ગુજરાતમાં દર વર્ષે 1 જૂનથી 31 જુલાઈ સુધી  માછીમારી પ્રતિબંધ મુકવમાં આવે છે. જો કે, 31મી જુલાઈના રોજ રાજ્યના મત્સ્યોદ્યોગ વિભાગે ગુજરાત ફિશરીઝ (સુધારા) નિયમોમાં સુધારો કરતું જાહેરનામું બહાર પાડ્યું હતું. નવા નિયમો હેઠળ, 1 જૂનથી 15 ઓગસ્ટ સુધી, વાર્ષિક કુલ 76 દિવસ સુધી આંતરરાષ્ટ્રીય અને પ્રાદેશિક જળસીમામાં માછીમારી પર પ્રતિબંધ રહેશે. 

માછીમારોના સંગઠનની વિનંતીને ધ્યાનમાં રાખી નિર્ણય લેવામાં આવ્યો 

ગુજરાત મત્સ્યોદ્યોગ વિભાગના એક વરિષ્ઠ અધિકારીએ જણાવ્યું હતું કે માછલીઓના સંવર્ધન માટે વધુ સમય આપવા માટે માછીમારોના સંગઠનની વિનંતીને ધ્યાનમાં લઈને આ નિર્ણય લેવામાં આવ્યો છે. અધિકારીએ જણાવ્યું હતું કે વૈજ્ઞાનિક ડેટા અને પ્રવર્તમાન હવામાન પરિસ્થિતિઓને પણ ધ્યાનમાં લેવામાં આવી હતી અને અન્ય પશ્ચિમ દરિયાકાંઠાના રાજ્યો દ્વારા નીતિમાં ફેરફાર કરવામાં આવે તેવી અપેક્ષા છે.

માછીમારોને આર્થિક નુકસાન થશે - કોંગ્રેસ 

પ્રદેશ કોંગ્રેસ પ્રમુખ શક્તિસિંહ ગોહિલે સરકારના આ પગલાને વખોડી કાઢ્યું હતું અને મુખ્યમંત્રી ભૂપેન્દ્ર પટેલ અને રાજ્ય સરકારને આ અંગે પુનઃવિચાર કરવા અને માછીમારોને તાત્કાલિક ધોરણે કામ શરૂ કરવા દેવા વિનંતી કરી હતી. તેમણે કહ્યું હતું કે ફિશરીઝ કમિશનરે અગાઉ 31 જુલાઈના રોજ બપોરે એક પરિપત્ર બહાર પાડ્યો હતો, જેમાં હવામાનના આધારે 1, 2 અથવા 3 ઓગસ્ટથી માછીમારી ફરીથી શરૂ કરવાનું સૂચન કર્યું હતું, પરંતુ પછીથી નિર્ણય પાછો ખેંચી લેવામાં આવ્યો હતો.

1 ઓગસ્ટથી માછીમારીની સીઝન ફરી શરૂ થવાની છે, તેથી ઘણા માછીમારોએ ડીઝલ, બરફ અને અન્ય વસ્તુઓ ભરીને તેમની બોટ તૈયાર કરી લીધી હતી. કેટલાક માછીમારો કચ્છના જખૌ જેવા માછીમારી કેન્દ્રો સુધી પહોંચવા માટે લાંબા અંતરની મુસાફરી પણ કરી રહ્યા હતા, તેમને મુસાફરી ખર્ચ સહન કરવાની ફરજ પડી હતી અને બે અઠવાડિયાની નિષ્ક્રિયતાનો સામનો કરવો પડશે.

અન્ય રાજ્યોથી વિપરીત, ગુજરાત બે મહિનાના પ્રતિબંધ દરમિયાન માછીમારોને આર્થિક મદદ કરતું નથી. પ્રતિબંધ પર અણધાર્યા વિસ્તરણને કારણે માછીમારોને હવે વધારાની આર્થિક અછતનો  સામનો કરવો પડી રહ્યો છે.

આ નિર્ણય વૈજ્ઞાનિક અને પર્યાવરણીય બાબતો પર આધારિત  - મત્સ્યોદ્યોગ કમિશ્નર

ગુજરાતના મત્સ્યોદ્યોગ કમિશ્નર નરેન્દ્ર કુમાર મીણાએ કહ્યું હતું કે આ નિર્ણય વૈજ્ઞાનિક અને પર્યાવરણીય બાબતો પર આધારિત છે અને માછીમારોના સંગઠનની રજૂઆતોના જવાબમાં લેવામાં આવ્યો છે. મીણાએ એમ પણ કહ્યું હતું કે આ ફેરફાર કેન્દ્ર સરકાર સાથે સંકલન કરવામાં આવ્યો હતો અને આગામી વર્ષથી અન્ય પશ્ચિમ દરિયાકાંઠાના રાજ્યો દ્વારા અપનાવવામાં આવે તેવી શક્યતા છે.