Video: ગાંધીનગરના વિકાસના કામોને પ્રાધાન્ય આપીશું: નવા મેયર રૂપસિંહ ઠાકોરનો સંકલ્પ

ગાંધીનગર મહાનગરપાલિકાના મેયર તરીકે નાની ઉંમરે જવાબદારી સોંપવામાં આવતાં રૂપસિંહ ઠાકોરે પક્ષનો આભાર વ્યક્ત કર્યો છે. મેયર તરીકે પસંદગી થયા બાદ તેમણે શહેરના સર્વાંગી વિકાસને પ્રાથમિકતા આપવાનો સંકલ્પ વ્યક્ત કર્યો હતો.

વિકાસનાં કામોને પ્રાધાન્ય અપાશે

તેમણે જણાવ્યું હતું કે, ગાંધીનગરના વિકાસનાં કામોને પ્રાધાન્ય આપવામાં આવશે. શહેરના નાગરિકોને જરૂરી સુવિધાઓ મળી રહે અને શહેરનો સર્વાંગી વિકાસ થાય તે દિશામાં કામગીરી કરવામાં આવશે. મેયર તરીકે મળેલી જવાબદારીને નિષ્ઠાપૂર્વક નિભાવવાની તેઓએ ખાતરી આપી હતી.

કાર્યવાહીમાં વિલંબ થતા કોંગ્રેસે મુદ્દો ઉઠાવ્યો

ગાંધીનગર મનપાની સામાન્ય સભામાં 3 નવેમ્બર, મંગળવારે જ વિવિધ હોદ્દેદારો વરણીની પ્રક્રિયા શરૂ થઈ ગઈ હતી, પરંતુ ભાજપના સભ્યો માટે મેન્ડેટ નહીં આવતા નિર્ણયો થોડા મોડા લેવાયા હતા. મનપા કમિશનર સામે કોંગ્રેસે આ મુદ્દો ઉઠાવ્યો હતો. છેવટે ભાજપના શહેર પ્રભારી દોઢ વાગ્યે મેન્ડેટ લઈને મનપા કચેરી પહોંચ્યા હતા, જ્યાં બેઠક બાદ વિવિધ નિર્ણયો લેવાયા હતા.

ગાંધીનગર મનપામાં ભાજપે નવી ટીમની રચના કરી

બેઠકમાં કરવામાં આવેલી વરણીમાં 29 વર્ષીય રૂપસિંહ ઠાકોરને ગાંધીનગરના મેયર તરીકે પસંદ કરાયા છે. નોંધનીય છે કે, રુપસિંહ ઠાકોર પ્રથમ વખત ચૂંટણી લડીને મનપામાં પહોંચ્યા છે. વધુમાં ડે. મેયર તરીકે અંજના મહેતા પર પસંદગીનો કળશ ઢોળવામાં આવ્યો છે. આ સાથે સ્ટેન્ડિંગ કમિટીના ચેરમેન તરીકે મહેન્દ્ર પટેલને જવાબદારી સોંપાઈ છે.

કોંગ્રેસે વિપક્ષની જવાબદારી કર્મજીતસિંહ વાઘેલાને સોંપી

ભાજપ દ્વારા સત્તાના મહત્વના હોદ્દાઓ માટે નામોની જાહેરાત કરવામાં આવી હતી, ત્યારે કોંગ્રેસે પણ વિપક્ષના નેતાની પસંદગી કરી છે. કોંગ્રેસે કર્મજીતસિંહ વાઘેલાને વિપક્ષના નેતા તરીકેની જવાબદારી સોંપી છે.

વિપક્ષ બનશે મજબૂત

ગાંધીનગર મનપામાં વિપક્ષનો અવાજ પણ વધુ મજબૂત બનશે. ગત ટર્મમાં વિપક્ષના સભ્યો ઓછા હતા. પરંતુ આ વખતે કોંગ્રેસે 5 બેઠકો મેળવી છે અને સાથે એક અપક્ષ ઉમેદવાર પણ જોડાતા વિપક્ષ પાસે પૂરતી તાકાત રહેશે.