ગુજરાતમાં કુદરતનો પ્રકોપ: 9 જિલ્લામાં 'રેડ એલર્ટ' સાથે ભારે વરસાદ અને કરાની આગાહી, 80 કિમીની ઝડપે ફૂંકાશે પવન
છેલ્લું અપડેટ : 19 Mar 2026
Gujarat weather update: ગુજરાતમાં ઉનાળાની શરૂઆતે જ ચોમાસા જેવો માહોલ સર્જાયો છે. વેસ્ટર્ન ડિસ્ટર્બન્સ અને સાયક્લોનિક સર્ક્યુલેશનની બેવડી સિસ્ટમ સક્રિય થવાને કારણે રાજ્યના વાતાવરણમાં મોટો પલટો આવ્યો છે. હવામાન વિભાગે આગામી કલાકો માટે અત્યંત ગંભીર ગણાય તેવું 'રેડ એલર્ટ' જાહેર કર્યું છે, જેમાં ભારે પવન સાથે કરા પડવાની પણ શક્યતા છે.
નાવકાસ્ટ અને એલર્ટની વિગતો
હવામાન વિભાગ દ્વારા જાહેર કરવામાં આવેલા તાજેતરના નાવકાસ્ટ (Nowcast) મુજબ, ગુજરાતના દરિયાકાંઠાના અને સૌરાષ્ટ્ર-કચ્છના વિસ્તારોમાં કુદરતી આફત જેવી સ્થિતિ સર્જાઈ શકે છે. ખાસ કરીને દેવભૂમિ દ્વારકા, પોરબંદર, જામનગર, રાજકોટ, જૂનાગઢ, ગીર સોમનાથ, દીવ, કચ્છ, અમરેલી અને પાટણમાં વહીવટીતંત્રને સતર્ક રહેવા જણાવાયું છે. આ વિસ્તારોમાં પવનની ગતિ 62થી 87 કિલોમીટર પ્રતિ કલાક સુધી પહોંચી શકે છે.
માવઠાની આખા ગુજરાતમાં અસર
ગત મોડી રાતથી જ અમદાવાદ અને ગાંધીનગર સહિતના શહેરોમાં ધૂળની ડમરીઓ સાથે પવન ફૂંકાવાનું શરૂ થઈ ગયું છે. કમોસમી વરસાદને કારણે ખેડૂતોમાં ચિંતાનું મોજું ફરી વળ્યું છે, કારણ કે ખેતરોમાં ઉભા પાકને આનાથી મોટું નુકસાન થવાની ભીતિ સેવાઈ રહી છે. આ ઉપરાંત માછીમારોને દરિયો ન ખેડવા અને નાગરિકોને બિનજરૂરી બહાર ન નીકળવાની પણ અપીલ કરવામાં આવી છે.
આગાહીની મુખ્ય બાબતો:
ઝડપી પવન: 60થી 80 કિમીની ઝડપે પવન ફૂંકાવાની શક્યતા.
કરા સાથે વરસાદ: અનેક વિસ્તારોમાં ગાજવીજ સાથે વરસાદ અને કરા પડી શકે છે.
રેડ એલર્ટ: ખાસ કરીને સૌરાષ્ટ્ર અને ઉત્તર ગુજરાતના 9 જિલ્લાઓમાં હાઈ એલર્ટ.