Surendranagar: ગોમટામાં ફૂડ પોઇઝનિંગનો કહેર યથાવત, વધુ 50 લોકો અસરગ્રસ્ત, 600 લોકોએ ભોજન લીધું હોવાનો ધડાકો

સુરેન્દ્રનગરના ગોમટા ગામમાં ફૂડ પોઇઝનિંગના કેસમાં સતત વધારો થઈ રહ્યો છે. જમણવારમાં ભોજન કર્યા બાદ ગ્રામજનોની તબિયત બગડવાના કેસોમાં વધારો થતાં આરોગ્ય અને વહીવટી તંત્ર દોડતું થયું છે.

સ્થિતિમાં ગંભીર વધારો

પ્રાથમિક માહિતી મુજબ, ફૂડ પોઇઝનિંગનો ભોગ બનનાર લોકોની સંખ્યામાં મોટો વધારો થયો છે. વધુ 50  લોકો આ ઝેરી અસરનો ભોગ બન્યા છે. ઘેર-ઘેર ઝાડા, ઉલ્ટી અને તાવના દર્દીઓ જોવા મળી રહ્યા છે. મળતી માહિતી મુજબ, આ જમણવારમાં અંદાજે 600 લોકોએ ભોજન લીધું હોવાનો ધડાકો થયો છે, જેના કારણે તંત્રની ચિંતા વધી છે. નાના બાળકોને સૌથી વધુ અસર થતાં તેમની સ્થિતિ વધુ ગંભીર બની છે.

આરોગ્ય અને વહીવટી તંત્રની કાર્યવાહી

ગામમાં વકરતી જતી પરિસ્થિતિને ધ્યાનમાં રાખીને વહીવટી તંત્ર દ્વારા તાત્કાલિક પગલાં લેવામાં આવ્યા છે. વધુ 4 આરોગ્યની ટીમોને ગોમટા ગામમાં મોકલવામાં આવી છે, જે ઘરે ઘરે જઈને દર્દીઓની તપાસ કરી રહી છે.

600  લોકોએ ભોજન લીધું હોવાના કારણે તંત્રએ તમામ ગ્રામજનોનું આરોગ્ય ચેકઅપ કરવા માટે સૂચના આપી છે.

વહીવટી તંત્ર દ્વારા આ ફૂડ પોઇઝનિંગની ઘટના પાછળનું ચોક્કસ કારણ જાણવા માટે ઊંડાણપૂર્વક તપાસના આદેશો આપવામાં આવ્યા છે.

ગામના લોકોની તબિયત સુધારવા અને રોગચાળો ફેલાતો અટકાવવા માટે આરોગ્ય વિભાગ યુદ્ધના ધોરણે કામગીરી કરી રહ્યું છે.